Tag: وزیر اعلیٰ پنجاب

لاہور: وزیر اعلیٰ پنجاب عثمان بزدار نے موبائل پولیس خدمت مراکز پروگرام کا افتتاح کر دیا، پروگرام کے تحت پنجاب کے 36 اضلاع میں موبائل پولیس خدمت مراکز کے ذریعے عوام کو سہولت فراہم کی جائے گی۔

تفصیلات کے مطابق آج ہفتے کو وزیر اعلیٰ پنجاب عثمان بزدار نے گریٹر اقبال پارک میں پنجاب کے 36 اضلاع کے لیے موبائل پولیس خدمت مراکز کے پروگرام کا افتتاح کیا۔

وزیر اعلیٰ پنجاب نے گریٹر اقبال پارک میں پولیس خدمت مرکز کا بھی افتتاح کیا، انھوں نے پولیس خدمت مرکز اور موبائل پولیس خدمت مراکز کا معائنہ کیا اور خدمت مراکز کے ذریعے شہریوں کو فراہم کی جانے والی سہولتوں کا جائزہ لیا۔

عثمان بزدار نے اس موقع پر کہا کہ ان خدمت مراکز میں بینک آف پنجاب کے کاؤنٹر بھی قائم کیے جائیں، مراکز کے ذریعے شہریوں کو ان کی دہلیز پر سہولتیں مہیا ہوں گی، پولیس مراکز کو پورے صوبے میں پھیلا رہے ہیں۔

وزیر اعلیٰ کا کہنا تھا کہ شہریوں کو دہلیز پر خدمات کی فراہمی حکومت کا مشن ہے، آج کے دن پنجاب کے لوگوں کے لیے آسانی کا افتتاح کر رہے ہیں، شہریوں کو سفر کی زحمت سے نجات ملے گی۔

انھوں نے یہ ہدایت بھی کی کہ اسٹامپ پیپرز کی فراہمی خدمت مراکز پر ہونی چاہیے، مراکز میں شہریوں کو بار بار چکر لگانے کی زحمت نہ دی جائے۔ علاوہ ازیں انھوں نے کہا کہ مراکز سے ایف آئی آر کی کاپی اور دیگر خدمات کی فراہمی یقینی بنائی گئی ہے۔

وزیر اعلیٰ نے اس موقع پر یہ بھی کہا کہ پنجاب شہدا کے تمام کیسز حل کر کے حق ان تک پہنچایا۔

لاہور: پنجاب حکومت نے مخصوص محکموں کے انجینئرز کو بنیادی تنخواہ کا ڈیڑھ گنا ٹیکنیکل الاؤنس دینے کا اعلان کر دیا۔

تفصیلات کے مطابق وزیر اعلیٰ پنجاب عثمان بزدار نے سعودی عرب میں قیام کے دوران ٹویٹ کر کے کہا ہے کہ مخصوص محکموں میں انجینئرز کو بنیادی تنخواہ کا ڈیڑھ گنا ٹیکنیکل الاؤنس ملے گا۔

عثمان بزدار نے کہا کہ ہم پنجاب میں پروفیشنلز کو بھرپور مواقع فراہم کرنے پرعمل پیرا ہیں، پبلک سیکٹر میں پروفیشنلز کے دیرینہ مسائل حل کیے جا رہے ہیں۔

وزیر اعلیٰ پنجاب کا کہنا تھا کہ انجینئرز کے لیے ٹیکنیکل الاؤنس کی منظوری ان کی قابلیت کا اعتراف ہے، امید ہے کہ اب انجینئرز پہلے سے بھی بہتر کارکردگی کا مظاہرہ کریں گے۔

یہ بھی پڑھیں:  دہشت گردی کو اسلام سے علیحدہ کرنا ہوگا، اسلام کا دہشت گردی سے کوئی تعلق نہیں، عمران خان

خیال رہے کہ عثمان بزدار وزیر اعظم عمران خان اور دیگر وزرا کے ہم راہ سعودی عرب کے دورے پر ہیں، آج انھوں نے وزیر اعلیٰ خیبر پختون خوا محمود خان کے ہم راہ مدینے میں روضۂ رسولﷺ کے متولی اور کلید بردار شیخ نوری محمد احمد علی سے خصوصی ملاقات کی۔

واضح رہے کہ آج مکے میں وزیر اعظم عمران خان نے اسلامی تعاون کی تنظیم کے اجلاس سے خطاب کرتے ہوئے کہا کہ مسلمانوں کی سیاسی جدوجہد پر دہشت گردی کا لیبل درست نہیں، اسلام کا دہشت گردی سے کوئی تعلق نہیں ہے، اقوام متحدہ کی قراردادوں کے مطابق مسئلہ کشمیر کا حل نا گزیر ہے۔

لاہور: وزیر اعلیٰ پنجاب عثمان بزدار اور وفاقی وزیر ریلویز شیخ رشید احمد کی ملاقات ہوئی ہے، جس میں فلاح عامہ کے منصوبوں اور سیاسی صورت حال پر تبادلۂ خیال کیا گیا۔

تفصیلات کے مطابق آج عثمان بزدار اور شیخ رشید نے ملاقات کی جس میں صوبے میں فلاح عامہ کے منصوبوں اور سیاسی صورت حال پر گفتگو کی گئی۔

عثمان بزدار نے کہا کہ ماضی میں صوبے میں میرٹ کے نام پر اقربا پروری کے کلچر کو فروغ دیا گیا، سابق ادوار کی غلط پالیسیوں سے ہی قومی خزانے کو نقصان پہنچا۔

وزیر اعلیٰ پنجاب کا کہنا تھا کہ سابق حکمرانوں نے قومی وسائل کا بے دریغ ضیاع کیا، کرپشن کے ناسور نے ملک کی بنیادوں کو کھوکھلا کیا، ملک کو مقروض بنانے والے کس منہ سے رہنمائی کا دعویٰ کر سکتے ہیں۔

یہ بھی پڑھیں:  یوم شہادت حضرت علیؓ پرجلوسوں کی کڑی نگرانی کی جائے،عثمان بزدار

عثمان بزدار نے کہا کہ وزیر اعظم عمران خان کا کرپشن فری پاکستان کا نعرہ قوم کے دل کی آواز بن گیا ہے۔

خیال رہے کہ آج یوم شہادت حضرت علیؓ پر صوبے میں نکلنے والے جلوسوں کے حوالے سے وزیر اعلیٰ نے سخت سیکورٹی انتظامات کی ہدایت جاری کی ہے، انھوں نے کہا کہ جلوسوں کی کڑی نگرانی کی جائے اور طے شدہ سیکورٹی پلان پرعمل درآمد ہر صورت یقینی بنایا جائے۔

لاہور: وزیر اعلیٰ پنجاب عثمان بزدار سے وفاقی وزیر داخلہ اعجاز شاہ نے ملاقات کی، جس میں صوبے میں امن کے لیے مشترکہ اقدامات پر غور کیا گیا۔

تفصیلات کے مطابق عثمان بزدار سے وفاقی وزیر داخلہ نے ملاقات کی، جس میں امن عامہ کی بہتری کے لیے پنجاب اور وفاق میں مربوط کوآرڈینیشن پر اتفاق کیا گیا۔

ملاقات میں صوبے میں سیکورٹی صورت حال کی مزید بہتری سے متعلق اقدامات پر غور کرتے ہوئے مذہبی منافرت پر مبنی لٹریچر کی اشاعت و تقسیم کے خلاف کریک ڈاؤن کا فیصلہ کیا گیا۔

وزیر اعلیٰ عثمان بزدار نے کہا کہ اشتعال انگیز تقاریر کرنے والوں کے خلاف بلا امتیاز کارروائی ہوگی، قانون ہاتھ میں لینے والے عناصر کے خلاف سخت کارروائی کریں گے۔

یہ بھی پڑھیں:  وزیر داخلہ اعجاز شاہ کی وزیر خارجہ سے ملاقات

وزیر اعلیٰ پنجاب کا کہنا تھا کہ صوبے میں امن و امان کی صورت حال مزید بہتر بنانے کے لیے ہر ضروری اقدام کیا جائے گا، اور قبضہ مافیا کے خلاف بلا امتیاز آپریشن جاری رہے گا۔

وفاقی وزیر داخلہ اعجاز شاہ نے کہا کہ پنجاب کے بعد دیگر صوبوں کے بھی دورے کروں گا، امن و امان کے حوالے سے پنجاب حکومت کو سپورٹ کریں گے۔

یاد رہے گزشتہ ہفتے وزیرِ داخلہ اعجاز شاہ نے وزیر خارجہ شاہ محمود قریشی سے بھی ملاقات کی تھی جس میں ای ویزے کے اجرا اور داخلی سلامتی کی صورت حال پر تبادلۂ خیال کیا گیا تھا۔

لاہور: وزیرِ اعلیٰ پنجاب عثمان بزدار نے صوبے میں سرکاری خرچ پر افطاریوں پر پابندی لگا دی، انھوں نے کہا کہ ہم قومی وسائل کے امین ہیں۔

تفصیلات کے مطابق وزیر اعلیٰ پنجاب سردار عثمان بزدار نے صوبے میں سرکاری خرچ پر دی جانے والی افطاریوں کا سلسلہ ختم کر دیا۔

وزیر اعلیٰ نے کہا کہ کفایت شعاری ہماری پالیسی کا بنیادی عنصر ہے اور ہم قومی وسائل کے امین ہیں، عوام کو یہ احساس دلانا ہے کہ ان کا پیسا صرف عوام پر ہی خرچ ہوگا۔

ان کا کہنا تھا کہ رمضان میں ریلیف دینے کے لیے ہر ممکن کوشش کی جا رہی ہے، رمضان بازاروں کی مانیٹرنگ کے لیے بھی ذمہ داریاں تفویض کی گئی ہیں، میں خود بھی رمضان بازاروں کے دورے کر کے جائزہ لے رہا ہوں۔

یہ بھی پڑھیں:  رمضان ریلیف پیکج کی منظوری، صارفین کو 2 ارب روپے کا ریلیف ملے گا

قبل ازیں، وزیر اعلیٰ پنجاب نے صادق آباد میں رمضان بازاروں کا دورہ کیا، انھوں نے رمضان پیکج کے تحت ریلیف کی فراہمی کے لیے کیےجانے والے اقدامات کا جائزہ لیا اور اشیائے ضروریہ، سبزیوں، پھلوں اور دالوں کی قیمتوں اور کوالٹی کو چیک کیا۔

اس موقع پر عثمان بزدار نے کہا کہ رمضان پیکج کے ثمرات عام آدمی تک پہنچائے جائیں گے، عوام کو ہر سطح پر ریلیف کی فراہمی جاری رہے گی، آج پہلا روزہ ہے اور میں خود دورے پر نکلا ہوں۔