Tag: وزیر اعلیٰ پنجاب

لاہور: پنجاب حکومت نے اورنج لائن میٹرو ٹرین کا کرایہ مقرر کر دیا۔

تفصیلات کے مطابق وزیر اعلیٰ پنجاب عثمان بزدار کی زیر صدارت پنجاب کابینہ کے اجلاس میں کابینہ نے اورنج لائن میٹرو ٹرین کا کرایہ مقرر کرنے کی منظوری دے دی۔

کابینہ نے 50 روپے کرایہ مقرر کرنے کی تجویز دی تاہم وزیر اعلیٰ نے ٹرین کا کرایہ 50 روپے مقرر کرنے کی تجویز مسترد کرتے ہوئے لاہور کے شہریوں کو ریلیف دینے کے لیے ٹرین کا کرایہ 40 روپے مقرر کرنے کی منظوری دے دی۔

اجلاس میں ٹرانسپورٹ رجسٹریشن کے لیے اختیارات عارضی طور پر موٹر وہیکلز ایگزامنرز کو دینے کا بھی فیصلہ کیا گیا۔

جولائی میں وزیر اعلیٰ پنجاب عثمان بزدار نے کہا تھا کہ اورنج لائن میٹرو ٹرین سی پیک کا منصوبہ ہے، اسے جلد از جلد چلانے کی کوشش کریں گے، تعمیراتی کام تقریباً مکمل ہو چکا، افتتاح کے لیے سازگار حالات کا انتظار کر رہے ہیں۔

وزیر اعظم کے معاون خصوصی عاصم سلیم باجوہ نے سینیٹ کی قائمہ کمیٹی برائے سی پیک منصوبہ جات کو بریفنگ میں کہا تھا کہ اورنج لائن منصوبے کے لیے 1600 افراد بھرتی کیے جائیں گے۔

گزشتہ برس پنجاب حکومت کی جانب سے اورنج لائن ٹرین کے الیکٹرک ٹرین ٹیسٹ رن کا افتتاح بھی کیا جا چکا ہے۔ اس سے قبل سابق وزیر اعلیٰ پنجاب شہباز شریف بھی اورنج لائن ٹرین منصوبے کا ڈیزل لوکوموٹیو کے ٹیسٹ رن کا افتتاح کر چکے ہیں۔

لاہور: وزیر اعلیٰ پنجاب عثمان بزدار نے کہا ہے کہ گجرپورہ واقعے کی متاثرہ خاتون سے متعلق متنازع بیان پر سی سی پی او لاہور عمر شیخ سے 7 دن میں جواب طلب کیا ہے۔

تفصیلات کے مطابق آج لاہور میں گجرپورہ زیادتی و تشدد کیس کے سلسلے میں وزیر اعلیٰ پنجاب عثمان بزدار نے نیوز بریفنگ میں کہا اس واقعے کی جتنی بھی مذمت کی جائے کم ہے، سی سی پی او لاہور سے متنازع بیان پر 7 دن میں جواب طلب کر لیا ہے، ان کا جواب آنے کے بعد قانونی ایکشن لیا جائے گا۔

وزیر اعلیٰ نے کہا کہ غیر ضروری بیان پر سی سی پی او لاہور کو شوکاز جاری کر دیا گیا ہے۔ خیال رہے کہ سی سی پی او نے کہا تھا کہ زیادتی کا نشانہ بننے والی خاتون کو رات کو اکیلے نہیں نکلنا چاہیے تھا اور گاڑی میں پٹرول چیک کرنا چاہیے تھا۔

وزیر اعلیٰ نے کہا متاثرہ خاتون سے بھی رابطہ ہوا ہے، انھیں انصاف کی یقین دہانی کرائی گئی ہے، ایسے واقعات میں ملوث ملزمان کسی رعایت کے مستحق نہیں۔

گجرپورہ واقعہ: ملزمان کی اطلاع دینے والوں کو 25،25 لاکھ انعام دینے کا اعلان

واضح رہے کہ وزیر اعلیٰ پنجاب عثمان بزدار نے گجرپورہ واقعے میں ملوث ملزمان کی اطلاع دینے والوں کو 25،25 لاکھ انعام دینے کا اعلان بھی کر دیا ہے۔ انھوں نے کہا کہ ہم 72 گھنٹے سے بھی کم وقت میں ملزمان تک پہنچنے میں کامیاب ہوئے، ملزمان جلد قانون کی گرفت میں ہوں گے۔

وزیر اعلیٰ نے کہا ملزمان کی گرفتاری میں مدد دینے والوں کے نام صیغہ راز میں رکھےجائیں گے، ملزمان کے خلاف قانون کے مطابق کارروائی ہوگی، کوشش کریں گے کہ قانون کے مطابق ملزمان کو سخت سے سخت سزا ہو۔

ادھر آئی جی پنجاب انعام غنی نے آج اہم نیوز بریفنگ میں گرفتاریوں کی تردید کرتے ہوئے بتایا کہ گجر پورہ زیادتی واقعے میں ملوث ملزمان کو ابھی تک گرفتار نہیں کیا جا سکا ہے تاہم ملزمان جلد قانون کی گرفت میں ہوں گے۔

لاہور: وزیر اعلیٰ پنجاب عثمان بزدار نے کہا ہے کہ مسلم لیگ ق کے ساتھ ورکنگ ریلشن شپ پہلے سے بھی زیادہ مضبوط بنائیں گے، اتحادی جماعت کو ہر موقع پر ساتھ لے کر چلیں گے۔

تفصیلات کے مطابق آج وزیر اعلیٰ پنجاب عثمان بزدار سے اسپیکر پنجاب اسمبلی پرویز الٰہی نے خصوصی ملاقات کی، جس میں سیکریٹری پنجاب اسمبلی محمد خان بھٹی بھی موجود تھے، پرویز الٰہی نے وزیر اعلیٰ کو پنجاب اسمبلی کی نئی عمارت کی تعمیر سے متعلق آگاہ کیا۔

ملاقات میں اسمبلی عمارت کی تعمیر کے لیے فنڈ جاری کرنے کے حوالے سے تبادلہ خیال کیا گیا، اور 2 ستمبر کو حکومت اور اپوزیشن کے بلائے گئے اسمبلی اجلاس پر مشاورت کی گئی، پرویز الٰہی نے کہا نئی عمارت کی تعمیر جلد مکمل کرانے کے لیے 3 شفٹ میں کام کیا جائے گا، ہم چاہتے ہیں نومبر میں ہونے والا اجلاس نئی عمارت میں ہو۔

وزیر اعلیٰ نے اس موقع پر کہا عوام کی خدمت کے سفر میں رکاوٹ حائل نہیں ہونے دیں گے، پرویز الٰہی نے 2 برس میں پنجاب اسمبلی کی کارروائی کو احسن طریقے سے چلایا، سازشیں کرنے والے پیچھے رہ جائیں گے، ہمارا اتحاد آگے بڑھتا جائے گا۔

عثمان بزدار کا کہنا تھا تنقید برائے تنقید کرنے والوں کو اپنی کارکردگی سے جواب دیں گے، اور عوام کو ریلیف کی فراہمی کے لیے مل کر کام کرتے رہیں گے۔

انھوں نے مزید کہا حکومت کی مؤثر پالیسیوں کے تحت کرونا کا پھیلاؤ رکا ہے، جب کہ اپوزیشن نے کرونا سمیت ہر نازک موقع پر سیاسی پوائنٹ اسکورنگ کی، آج اپوزیشن جماعتیں مایوسی کا شکار ہیں۔