فیصل آباد: وزیر اعلیٰ پنجاب عثمان بزدار کا کہنا ہے کہ صحت انصاف کارڈ غریبوں کے لیے امید کی کرن ہے، غریبوں کو اسپتال لانے لے جانے کے اخراجات بھی حکومت برداشت کرے گی۔
تفصیلات کے مطابق وزیر اعلیٰ پنجاب عثمان بزدار نے فیصل آباد اور چنیوٹ کے لیے صحت انصاف کارڈ پروگرام کا افتتاح کیا، انہوں نے مستحق افراد میں صحت انصاف کارڈ تقسیم کیے۔
اس موقع پر وزیر اعلیٰ پنجاب عثمان بزدار کا کہنا تھا کہ االلہ کا شکر ادا کرتا ہوں جس نے معاشرے کی خدمت کا موقع دیا، صحت انصاف کارڈ پاکستان کی تاریخ کا ایسا منصوبہ ہے جس کی مثال نہیں ملتی۔
انہوں نے کہا کہ پاکستان تحریک انصاف کی حکومت غریب اور لاچار کے لیے کام کر رہی ہے، صحت انصاف کارڈ غریبوں کے لیے امید کی کرن ہے، غریبوں کو اسپتال لانے لے جانے کے اخراجات حکومت برداشت کرے گی۔
وزیر اعلیٰ پنجاب کا کہنا تھا کہ ہیلتھ کارڈ کے ذریعے ہر قسم کی سرجری اور کنسلٹینسی سمیت تمام سہولتیں مہیا ہوں گی، آج فیصل آباد اور چنیوٹ بھی اس پروگرام میں شامل ہو رہے ہیں۔ فیصل آباد کی 22 اور چنیوٹ کی 23 فیصد آبادی کو صحت انصاف کارڈ فراہم ہوں گے۔
انہوں نے کہا کہ فیصل آباد میں تقریباً 500 منصوبے شروع کر رکھے ہیں، پنجاب کو ہم نے سب سے خوبصورت صوبہ بنانا ہے۔
اس سے قبل وزیر اعلیٰ پنجاب نے اٹک میں مستحق افراد میں صحت انصاف کارڈ تقسیم کرنے کی تقریب سے خطاب کرتے ہوئے کہا تھا کہ کارڈ رکھنے والا معیاری اسپتال میں علاج کروا سکتا ہے۔
عثمان بزدار کا کہنا تھا کہ صحت کارڈ کے ذریعے 7 لاکھ 20 ہزار روپے کا علاج ممکن ہے، اسے بڑھایا بھی جاسکتا ہے۔ صحت انصاف کارڈ سے 3 کروڑ افراد مستفید ہوں گے۔
انہوں نے کہا تھا کہ پنجاب کے 18 اضلاح میں صحت کارڈ اسکیم شروع کی جاچکی ہے، غریب لوگ اب علاج کی سہولت سے محروم نہیں رہیں گے۔
