کراچی: وزیر بلدیات سندھ جام خان شورو نے کہا ہے کہ کراچی کے شہریوں کو پانی کی جلد سے جلد فراہمی کے لئے پاکستان پیپلز پارٹی اور اس کی قیادت شب و روز کاوشوں میں مصروف ہیں۔
تفصیلات کے مطابق وزیر بلدیات سندھ جام خان شورو نے اپنی پارٹی کے سربراہ بلاول بھٹو زرداری کا شکریہ ادا کرتے ہوئے کہا ہے کہ شہر میں کئی مزید میگا پروجیکٹ کا آغاز کردیا گیا ہے،کراچی میں پانی کی قلت کے خاتمے کے لیے کے-فور منصوبے کو ایف ڈبلیو او کے ذریعے آئندہ 2 سال میں مکمل کرلیا جائے گا، جس سے شہر کو اضافی 260 ملین گیلن یومیہ پانی فراہم ہوسکے گا۔
ان خیالات کا اظہار انہوں نے بدھ کے روز اپنے کیمپ آفس میں K-4 منصوبے کے کراچی واٹر بورڈ اور ایف ڈبلیو او کے مابین کنٹریکٹ کے دستخط کے حوالے سے منعقدہ ایک پروقار تقریب سے خطاب کرتے ہوئے کیا، تقریب سے صوبائی وزیر خزانہ سید مراد علی شاہ، صوبائی وزیر ٹرانسپورٹ ممتاز جاکھرانی، رکن سندھ اسمبلی محمد جاوید ناگوری، کے فور منصوبے کے پروجیکٹ ڈائریکٹر سلیم صدیقی، ایف ڈبلیو او کے برگیڈئیر وسیم، ایم ڈی واٹر بورڈ مصباح الدین فرید، ایڈمنسٹریٹر کراچی لئیق احمد، سیکرٹری بلدیات بقاء اللہ انڑ، سابق سیکرٹری بلدیات نور محمد لغاری اور دیگر نے بھی خطاب کیا۔
اس موقع پر وزیر بلدیات نے مزید کہا کہ میں اپنی پارٹی کے چیئرمین بلاول بھٹو زرداری، شریک چیئرمین آصف علی زرداری اور وزیر اعلیٰ سندھ کا مشکور ہوں کہ جنہوں نے مجھے بلدیات کا قلمدان سنبھالنے کے بعد اس بات کی مکمل یقین دہانی کرائی تھی کہ کراچی کے لئے فنڈز کی کوئی کمی نہیں ہونے دی جائے گی اور اس میں وزیر خزانہ سید مراد علی شاہ کا مجھے بھرپور ساتھ ملا ہے۔
