Tag: وزیر تعلیم سندھ

کراچی: صوبائی وزیر تعلیم سعید غنی نے والدین سے اپیل کی ہے کہ بچوں کو ماسک کی پابند کرائیں۔

تفصیلات کے مطابق اے آروائی نیوز کے پروگرام باخبر سویرا میں گفتگو کرتے ہوئے وزیر تعلیم سندھ سعید غنی نے کہا کہ ڈسٹرکٹ کی سطح پر اسکولوں کی مانیٹرنگ کا انتظام کیاگیا ہے،ٹیمیں اسکولوں میں ایس اوپیز پر عملدرآمد کا جائزہ لیں گی۔

سعید غنی کا کہنا تھا کہ والدین سے اپیل ہے بچوں کو ماسک کی پابندی کرائیں،وبا سے محفوظ رہنے کے لیے والدین کا تعاون ضروری ہے۔

صوبائی وزیر نے کہا کہ حکومتی ٹیمیں تعلیمی اداروں کا وزٹ کریں گی،ٹیموں کو ہدایت کی گئی ہے وہ وزٹ میں اپنا رویہ نرم رکھیں، تعلیمی ادارے فاصلہ قائم رکھنے کے لیے اپنا نظام بناسکتے ہیں۔

انہوں نے پروگرام باخبر سویرا میں کفتگو کے دوران مزید کہا کہ 2 ہفتے بعد صورتحال کا جائزہ لیں گے پھر پرائمری اسکول کھولنے کا فیصلہ ہوگا۔

ملک بھر میں 6 ماہ بعد تعلیمی ادارے کھل گئے

واضح رہے کہ ملک بھر میں کرونا وائرس کے باعث چھ ماہ سے بند تعلیمی ادارے آج سے کھل گئے ہیں۔پہلے مرحلے میں احتیاطی تدابیر کے ساتھ ثانوی واعلیٰ ثانوی اسکول،کالج اور یونیورسٹیاں کھولی گئی ہیں۔

این سی او سی کے مطابق دوسرے مرحلے میں آٹھویں جماعت کے طلباء کو اسکول آنے کی اجازت ہوگی جبکہ تیسرے مرحلے میں پرائمری اسکول کے بچے اسکول جائیں گے۔

کراچی: وزیر تعلیم سندھ سعید غنی نے کہا ہے کہ والدین فیس نہیں دیں گے تو اسکولز ملازمین کو تنخواہ کیسے دیں گے۔

تفصیلات کے مطابق وزیر تعلیم سندھ نے سندھ اسمبلی کے اجلاس میں اظہار خیال کرتے ہوئے کہا کہ والدین کی ایک بہت بڑی تعداد ہے جن کا کہنا ہے کہ اسکولز بند ہیں تو فیس دیں کیوں تو یہ ایک ایسا سوال ہے کہ میں سمجھتا ہوں جس پر غورا کرنا چاہیے۔

سعید غنی نے اسکولز اور والدین سے گزارش کرتے ہوئے کہا کہ جب ہم یہ کہہ رہے ہیں کہ اسکولز اپنے ملازمین کو تنخواہیں دیں تو اس کے لیے جو ان کے پاس ذریعہ ہے وہ فیس ہے، اگر والدین فیس نہیں دیں گے تو اسکولز بند ہو جائیں گے اور اگر اسکولز بند ہوجائیں گے کہ تو جب حالات ٹھیک ہو جائیں گے تو سارے اسکولز دوبارہ نہیں کھلیں گے اور اگر اسکولز نہیں کھلے گے تو جو بچوں کا نقصان ہوگا وہ ان کے والدین کا بھی نقصان ہوگا۔

وزیر تعلیم سندھ کا کہنا تھا کہ ہم جب کہتے ہیں کہ والدین کو فیس دیں تو یہ ایک مشکل کام ہے، ہم اسکولز کو کہتے ہیں کہ آپ تنخواہیں دیں اپنے ملازمین کو یہ بھی مشکل کام ہے۔انہوں نے گزارش کی کہ اس مشکل میں ہم اپنے حصے کا جتنہ بوجھ ہوسکتا ہے اٹھائیں۔

کراچی: وزیر تعلیم سندھ سعید غنی نے کہا ہے کہ تمام پیپرز میں فیل ہونے والوں کو بھی پاس کر دیں گے۔

تفصیلات کے مطابق کراچی میں میڈیا سے گفتگو کرتے ہوئے صوبائی وزیر تعلیم سندھ سعید غنی نے کہا کہ اعلان کیا تھا یکم سے 8ویں جماعت کو پروموٹ کیا جا رہا ہے،9ویں سے 12ویں جماعت کے امتحانات پر اسٹیئرنگ کمیٹی نے سفارشات طے کی ہیں۔

سعید غنی کا کہنا تھا کہ 9ویں سے10ویں جماعت کے طالبعلموں کو پروموٹ کیا جائےگا،10ویں جماعت کے طالبعلموں کو 9ویں جماعت کے نتیجے پر پروموٹ کیا جائے گا۔

انہوں نے کہا کہ 11ویں جماعت کے طالبعلموں کو بھی پروموٹ کر دیا جائے گا،10ویں اور 12ویں جماعت کے طالبعلموں کو3 فیصدمارکس دے کر پروموٹ کیا جائے گا۔

وزیر تعلیم سندھ کا کہنا تھا کہ 9ویں اور11ویں جماعت کے طالبعلموں کو بھی بغیر پرسنٹیج کے پروموٹ ہوجائے گا،12ویں جماعت کے طالبعلموں کو 11ویں جماعت کے نتیجے پر پروموٹ کیا جائے گا۔

سعید غنی نے کہا کہ وفاق کا فیصلہ تھا 40 فیصد تک پیپرز میں فیل بچوں کو پاس کر دیا جائے گا،وفاق کا فیصلہ تھا 40فیصد سے زائد پیپرز میں فیل بچوں کو پاس نہیں کیا جائے گا۔

انہوں نے کہا کہ سندھ میں ہم تمام پیپرز میں فیل ہونے والوں کو بھی پاس کردیں گے،پیپرز میں فیل بچوں کو 33 فیصد نمبرز دے کر پاس کر دیا جائے گا۔

وزیر تعلیم سندھ کا کہنا تھا کہ پرائیوٹ اسکولز کے بچوں کے لیے بھی یہی فارمولہ اپنایا جائےگا،پاس یا فیل ہونے پر پروموٹ کرنے میں کوئی تفریق نہیں ہوگی۔

سعید غنی نے مزید کہا کہ اس سال کوئی اسپیشل امتحانات نہیں ہوں گے،اس سال جمع شدہ فیس کی بنیاد پر اگلے سال امتحانات لیے جا سکتے ہیں۔

اسلام آباد: وزیر تعلیم سندھ سعید غنی کا کہنا ہے کہ کافی عرصے سے اسکولز ملک میں بند ہیں، فی الحال ہم اسکولز کھولنے کی پوزیشن میں نہیں ہیں۔

تفصیلات کے مطابق کراچی میں میڈیا سے گفتگو کرتے ہوئے صوبائی وزیر تعلیم سعید غنی نے کہا کہ سندھ ایجوکیشن اینڈ لیٹریسی ڈیپارٹمنٹ کی جانب سے ایپ بنائی ہے،یہ ایپ سندھی زبان میں بھی ہے۔

سعید غنی کا کہنا تھا کہ انٹرنیٹ کی سہولت بہت سے طلبا کو میسر نہیں،اس پر کام کر رہے ہیں،موبائل فون کمپنیوں سےرابطے میں ہیں، چاہتے ہیں موبائل نیٹ ورک صوبوں کے دیگر علاقوں میں بھی پہنچائیں،بچے موبائل فون،ٹیبلٹ،کمپیوٹر سے کلاس میں شامل ہوسکتے ہیں۔

انہوں نے کہا کہ ایف ایم ریڈیوکے ذریعے تعلیم دینے کی کوشش کر رہے ہیں،لرننگ ایپ موبائل ایپ کے ذریعے ڈاؤن لوڈ کی جاسکتی ہے، لاک ڈاؤن میں بھی نرمی ہوچکی ہے۔

سعید غنی کا کہنا ہے کہ کافی عرصے سے اسکولز ملک میں بند ہیں، فی الحال ہم اسکولز کھولنے کی پوزیشن میں نہیں ہیں۔

یکم جون سے اسکولز کھولنے کا مطالبہ

دوسری جانب صدرآل پاکستان پرائیوٹ اسکولز کاشف مرزا نے حکومت سے اپیل کی ہے کہ اسکولز ایس اوپیز کے تحت یکم جون سے کھولے جائیں، 15جولائی تک تعلیمی اداروں کو بند رکھنا تعلیم دشمنی ہے۔