Tag: وزیر تعلیم

لاہور: وفاقی وزیر تعلیم شفقت محمود  نے کہا ہے کہ ہمیں کشمیریوں پر ہونے والے مظالم کو نظم اور شعر و شاعری سے نمایاں کرنا چاہیے۔

ایوان اقبال میں وفاقی وزیر تعلیم شفقت محمود کی مصنفین اور دانشوروں کے ساتھ ملاقات ہوئی جس میں ڈاکٹر انعام الحق جاوید سمیت بڑی تعداد میں سینئر شعراء , ادیب اور دانشور موجود تھے۔

ادبی بیٹھک میں اظہار خیال کرتے ہوئے وزیر تعلیم کا کہنا تھا  کہ کشمیر میں بھارتی مظالم کے خلاف قوم متحد ہوگئی ہے ہمیں اس مسئلے کو نظم اور شعر و شاعری کے ذریعے بھی  اجاگر کرنا چاہیے۔

اُن کا کہنا تھا کہ جب حکومت ملی تو مشکل حالات تھے مگر اب معیشت کے حوالے سے اچھی خبریں سامنے آرہی ہیں، آج روپے کی قدر بھی مستحکم ہورہی ہے اور اسٹاک مارکیٹ میں بھی کاروبار اچھا ہورہا ہے۔

وفاقی وزیر نے تمام دانشوروں اور مصنفین سے مخاطب ہوکر کہا کہ تعلیم کا نظام آپ سب لوگوں نے مل کر بہتر کرنا ہے، حکومت ایک ایسا تعلیمی نظام تشکیل دینے جارہی جہاں سارے پاکستان کا تعلیمی نصاب ایک جیسا ہوگا البتہ  زبان کونسی رکھنا ہے اس پر دانشوروں کی کمیٹی سوچ بچار کررہی ہے۔

شفقت محمود کا کہنا تھا کہ میرا ذاتی خیال ہے کہ نصاب کو اردو زبان میں ہی ہونا چاہیے جبکہ انگریزی کو بطور ایک مضمون پڑھایا جائے، تقریب میں شرکاء نے مختلف سوالات کیے جن کے وفاقی وزیر نے جوابات دیے ۔

پشاور: وفاقی وزیر تعلیم شفقت محمود نے کہا ہے کہ ملک میں تین مختلف تعلیمی نظام رائج ہیں، سرکاری، انگریزی، مدارس کا تعلیمی نظام رائج ہے، یکساں تعلیمی نصاب کی جانب بڑھ رہے ہیں۔

تفصیلات کے مطابق وفاقی وزیر تعلیم شفقت محمود نے پشاور میں پریس کانفرنس کرتے ہوئے کہا کہ نصاب مرتب کرنا مشکل کام ہے، حکومت غور کررہی ہے، ہنر سے متعلق پروگرام کے لیے 21 ارب روپے مختص کیے گئے ہیں۔

شفقت محمود نے کہا کہ ملک میں معیاری تعلیم کو بہتر بنارہے ہیں، نظام تعلیم پر مسائل سامنے آئے ہیں، ٹیچر ٹریننگ کی ضرورت ہے۔

انہوں نے کہا کہ اسلام آباد کے تعلیمی اداروں میں آئس رپورٹ حقائق کے برعکس تھی، جو بھی الزامات لگتے ہیں اس کے خلاف تحقیقات کریں گے،

مزید پڑھیں: خواتین کی تعلیم کے بغیر قوم آگے نہیں بڑھ سکتی‘ شفقت محمود

وزیر تعلیم نے کہا کہ قبائلی اضلاع میں اسکولوں کی سہولت کے لیے اقدامات کررہے ہیں، قبائلی اضلاع میں ایک ارب روپے کی اسکولز کی سہولتوں کے لیے مختص ہیں، 8 لاکھ بچوں کو انرول کرنے کا ہدف رکھا ہے، 6500 اساتذہ بھرتی کریں گے۔

شفقت محمود نے کہا کہ وزیراعظم ہاؤس میں تین مختلف شعبہ جات کی یونیورسٹی بنے گی، کسی نے اضافی فیس کی شکایت کی تو معاملہ دیکھا جائے گا، سپریم کورٹ نے فیسوں سے متعلق نوٹس لیا ہے۔

واضح رہے کہ گزشتہ ماہ وزیر تعلیم شفقت محمود کا کہنا تھا کہ اسکولوں سے باہر بچوں کو اسکولوں میں داخل کرانا ہے، خواتین کی تعلیم کے بغیر قوم آگے نہیں بڑھ سکتی ہے۔