اسلام آباد : وزیر توانائی خرم دستگیر کا کہنا ہے کہ وولٹیج اور فریکوئنسی کے اتارچڑھاؤ کی وجہ سے بجلی کے نظام میں تعطل آیا تاہم جلد بجلی بحال کرنےکی کوششیں جاری ہیں۔
تفصیلات کے مطابق وزیر توانائی خرم دستگیر نے ملک بھر میں بریک ڈاؤن کے حوالے سے کہا ہے کہ کوئی بڑا مسئلہ نہیں، جلد بجلی بحال کرنےکی کوششیں جاری ہیں۔
خرم دستگیر کا کہنا ہے کہ رواں سیزن کے دوران بجلی کی طلب بہت کم ہوتی ہے، بجلی کی کم طلب کی وجہ سے کچھ پلانٹ بند کئے جاتے ہیں۔
وزیر توانائی نے بتایا کہ صبح پلانٹ کھولنے کے بعد مسئلہ درپیش ہوا، وولٹیج اور فریکوئنسی کے اتارچڑھاؤ کی وجہ سے تعطل آیا۔
خیال رہے ملک میں بجلی کا بڑا بریک ڈاؤن ہوا ، گدو سے کوئٹہ جانیوالی ٹرانسمیشن لائن میں خرابی کے بعد گدو،جام شورو، مظفر گڑھ،حویلی شاہ بہادر، بلوکی پاور پلانٹس بند ہو گئے۔
تربیلا اور منگلا ڈیم سے پن بجلی کی پیداوار پانچ سو میگاواٹ بجلی کی فراہمی لوڈ بڑھنے پر بند ہو گئی ، بجلی کی ترسیل کے نظام کو بچانے کے لئے این پی سی سی کا فیوز بند کرنا پڑا۔
جنوبی پنجاب، سندھ اور خیبرپختونخوا کے مختلف علاقوں میں بھی بجلی بند ہے ، آئیسکو، لیسکو، میپکو اور گیپکو ریجنز میں بجلی کی فراہمی معطل ہے۔
این ٹی ڈی سی اور بجلی کی تقسیم کار کمپنیوں نے بحالی کا کام شروع کردیا ہے ، بجلی کی مکمل بحالی میں 27 گھنٹے سے زائد وقت لگ سکتا ہے۔
