اسلام آباد: وزیرِ داخلہ اعجاز شاہ نے وزیر خارجہ شاہ محمود قریشی سے ملاقات کی ہے جس میں ای ویزا کے اجرا اور داخلی سلامتی کی صورت حال پر تبادلۂ خیال کیا گیا۔
تفصیلات کے مطابق آج وزیر داخلہ اعجاز شاہ نے شاہ محمود قریشی سے پارلیمنٹ ہاؤس کے فارن منسٹر چیمبر میں ملاقات کر کے ای ویزا اجرا سمیت مختلف امور پر تبادلۂ خیال کیا۔
ملاقات میں دونوں وزرا نے تارکین وطن کے لیے امیگریشن کے عمل کو آسان اور مؤثر بنانے پر اتفاق کیا۔
اس موقع پر وزیر خاجہ نے کہا کہ آن لائن ویزے کے اجرا سے پاکستان میں آنے اور سرمایہ کاری کے خواہش مندوں کو بے جا پریشانی سے نجات ملے گی۔
یہ بھی پڑھیں: 48 ممالک کے شہریوں کے لیے ویزے میں نرمی، نئی ویزا پالیسی جاری
وزیر داخلہ نے بتایا کہ سعودی عرب کی جیلوں میں قید 2107 قیدیوں کی جلد وطن واپسی کے لیے سعودی وزارت داخلہ سے رابطے میں ہیں۔
واضح رہے کہ حکومت نے نئی ویزا پالیسی کے تحت 48 ممالک کے شہریوں کے لیے ویزے میں نرمی کر دی ہے، نئی پالیسی کا اطلاق 15 اپریل سے شروع ہو گیا ہے، پالیسی کے تحت ابتدائی طور پر 3 ماہ کا ویزا دیا جائے گا۔
جن ممالک کے شہریوں کے لیے ویزے میں نرمی کی گئی ہے ان میں ایران، ملائیشیا، روس، ترکی، چین، سری لنکا، آسٹریلیا، ڈنمارک، برازیل اور جرمنی شامل ہیں جب کہ بھارت، امریکا، برطانیہ اور افغانستان اس فہرست میں شامل نہیں۔
