ARYNews.tv | Urdu – Har Lamha Bakhabar

Tag: وزیر داخلہ شیخ رشید

  • پُرامن احتجاج کرنیوالوں کو نہ روکا جائے، وزیراعظم کی شیخ رشید کوہدایت

    پُرامن احتجاج کرنیوالوں کو نہ روکا جائے، وزیراعظم کی شیخ رشید کوہدایت

    اسلام آباد : وزیر اعظم عمران خان نے وزیر داخلہ شیخ رشید کو ہدایت کی ہے کہ پُرامن احتجاج کرنیوالوں کو نہ روکا جائے،   اپوزیشن جماعتیں آج الیکشن کمیشن کے باہراحتجاج کریں گی۔

    تفصیلات کے مطابق وزیر اعظم عمران خان سے وزیر داخلہ شیخ رشید کی ملاقات ہوئی ، ملاقات میں پی ڈی ایم کےاحتجاج پر بات چیت کی گئی اور وزیر داخلہ نے وزیر اعظم کوسیکیورٹی سےمتعلق بریفنگ دیتے ہوئے بتایا کہ سیکیورٹی کے تمام انتظامات مکمل ہے۔

    وزیراعظم نے شیخ رشید کو ہدایت کی کہ پُرامن احتجاج کرنیوالوں کو نہ روکا جائے۔

    اس سے قبل وفاقی وزیر داخلہ شیخ رشید نے سیکریٹری داخلہ یوسف نسیم کھوکھر کے ہمراہ کنٹرول روم کا دورہ کیا اور کنٹرول روم میں سہولتوں کا جائزہ لیتے ہوئے صورتحال خود مانیٹر کرنے کا فیصلہ کیا۔

    اس موقع پر وفاقی وزیر داخلہ شیخ رشید نے کہا کہ شہر میں امن وامان بحال رکھنےکیلئےہر چیز پر نظر رکھی جائے گی اور کیمروں سے داخلی راستوں کی سخت نگرانی کی جائے گی۔

    شیخ رشید احمد کا کہنا تھا کہ پرامن احتجاج کی اجازت ہے ، شاہراہ دستور پر پہلی دفعہ اجازت دی گئی ہے ، امید ہے پی ڈی ایم الیکشن کمیشن کے باہر احتجاج پر امن رکھے گی۔

    خیال رہے اپوزیشن جماعتیں آج الیکشن کمیشن کے باہراحتجاج کریں گی ، جس میں پی ڈی ایم فارن فنڈنگ کیس جلد نمٹانے کا مطالبہ کرے گی اور قائدین الیکشن کمیشن کویادداشت پیش کریں گے۔

    مظاہرےکی قیادت پی ڈی ایم سربراہ مولانافضل الرحمان کریں گے جبکہ مریم نواز،شاہدخاقان،پرویزاشرف،احسن اقبال ، عبدالغفورحیدری،اکرم درانی، محمود اچکزئی، آفتاب شیرپاؤ یاں افتخار،میرکبیر،شاہ اویس نورانی،ساجدمیرودیگر بھی شرکت کریں گے۔

  • پی ڈی ایم کو ریڈ زون میں اجازت دے رہے ہیں، مدارس کے بچے نہیں لائے جائیں گے: وزیر داخلہ

    پی ڈی ایم کو ریڈ زون میں اجازت دے رہے ہیں، مدارس کے بچے نہیں لائے جائیں گے: وزیر داخلہ

    اسلام آباد: وزیر داخلہ شیخ رشید نے کہا ہے کہ پی ڈی ایم کو پہلی بار ریڈ زون میں آنے کی اجازت دی جا رہی ہے، مدارس کے بچے لائے گئے تو قانون حرکت میں آئے گا۔

    اے آر وائی نیوز کے مطابق آج وزیر داخلہ شیخ رشید کی زیر صدارت اعلیٰ سطحی اجلاس منعقد ہوا جس میں کل پی ڈی ایم کے احتجاج کے حوالے سے جائزہ لیا گیا، اجلاس میں آئی جی اسلام آباد اور دیگر اداروں کے لوگ شریک ہوئے، کے پی اور پنجاب پولیس کے نمائندے بھی ویڈیو لنک کے ذریعے شریک ہوئے۔

    اجلاس کے بعد وزیر داخلہ نے میڈیا سے گفتگو کرتے ہوئے کہا پی ڈی ایم کو ریڈ زون آنے کی اجازت دی جا رہی ہے، فیصلہ کیا ہے کہ ان کو فری ہینڈ دیں، کوئی کنٹینر یا رکاوٹ نظر نہیں آئے گی لیکن حفاظتی انتظامات پورے کریں گے۔

    انھوں نے کہا یہ ذہین نشین کر لیں کہ یہاں سپریم کورٹ اور ایف بی آر بھی ہے، یہاں پر وزیر اعظم ہاؤس بھی ہے، ہم اپنی حفاظت کریں گے، حکومت کی جانب سے حفاظتی اقدامات ضرور کیے جائیں گے، اسلام آباد اور راولپنڈی میں 15 دسمبر سے ہائی الرٹ ہے، سپریم کورٹ اور وزیر اعظم ہاؤس کے احترام کو سامنے رکھا جائے، کسی نے قانون ہاتھ میں لیا تو پھر یہ نہ کہنا کہ قانون نے کس طرح اس کو ہاتھ میں لے لیا۔

    شیخ رشید نے کہا میں ڈرا نہیں رہا، آپ شوق سے آئیں، میری خواہش ہے ہر پارٹی کا کارکن اور لیڈر محفوظ رہے، تاہم مدارس کے بچے لائے گئے تو قانون حرکت میں آئے گا، مدارس کے بچے سیاست کے لیے استعمال کیےگئے تو قانون اپنی جگہ بنائےگا۔