Tag: وزیر داخلہ چوہدری نثار

  • جن  قیدیوں کی اپیلیں مسترد ہوگئیں انہیں فوری سزا دی جائے، چوہدری نثار

    جن قیدیوں کی اپیلیں مسترد ہوگئیں انہیں فوری سزا دی جائے، چوہدری نثار

    اسلام آباد: حکومت نے سزائےموت کےتمام قیدیوں کوفوری پھانسی دینے کی ہدایت کردی۔ وزیرداخلہ چوہدری نثارنےچاروں صوبوں سےکہا ہے کہ جن قیدیوں کی اپیلیں مسترد ہوگئیں ان کی سزائےموت پرعمل درآمد کیا جائے۔

    اسلام آباد میں وزیرداخلہ چوہدری نثار کی زیرصدارت نیکٹا کے ایگزیکٹو بورڈ کا اہم اجلاس ہوا۔۔اجلاس میں ڈی جی ایم آئی، ڈی جی آئی ایس آئی سمیت نیکٹا کے دیگرارکان شریک ہوئے اور دہشتگردی کی خاتمے کیلئے مختلف تجاویز پر تبادلہ خیال کیا گیا۔

    اجلاس میں وزیرداخلہ چوہدری نثار نے چاروں صوبوں میں قید سزائے موت کے وہ قیدی جن کی اپیلیں مسترد ہوئی ہیں ان کو فوری پھانسی دینے کی ہدایت کی، انہوں نے دہشتگری کی روک تھام کیلئے چاروں صوبوں میں انٹیلی جنس شئیرنگ کے نظام کو مزید مربوط بنانے کا اعلان کیا ۔

     وزیرداخلہ کا کہناتھا کہ نیکٹا کو موثر بنانے کیلئے تمام وسائل فراہم کیے جائیں گے۔انہوں نے کہا کے ملک سے دہشتگردی کے خاتمے کیلئے نیکٹا فعال ہونا ناگزیر ہے۔

  • حکومت اور تنظیمات مدارس دینیہ کا اہم اجلاس30دسمبر کو طلب

    حکومت اور تنظیمات مدارس دینیہ کا اہم اجلاس30دسمبر کو طلب

    اسلام آباد: حکومت نے تنظیمات مدارس دینیہ کے ساتھ اہم اجلاس تیس دسمبر کو اسلام آباد میں طلب کر لیا ہے۔

    ذرائع کے مطابق اجلاس میں وزیر داخلہ چوہدری نثار ،وزیر مذہبی امور سردار محمد یوسف،سیکرٹری داخلہ،سیکرٹری مذہبی امور ،چاروں صوبوں کے ہومز سیکریٹریز اور محکمہ اوقاف کے حکام شرکت کریں گے۔ اجلاس میں دینی مدارس کی تمام تنظیمات کے ذمہ داروں کو بھی شرکت کی دعوت دی گئی ہے۔ ذرائع کے مطابق اجلاس میں دینی مدارس اصلاحات ،ملک میں دہشت گردی سے نمٹنے کیلئے حکومتی اقدامات پر تبادلہ خیال کیا جائے گا۔

  • کوئی تین گنا کرایہ دےیاپچاس روٹیاں لےتواطلاع دیں، چوہدری نثار

    کوئی تین گنا کرایہ دےیاپچاس روٹیاں لےتواطلاع دیں، چوہدری نثار

    اسلام آباد: چوہدری نثارنے ہدایت کی ہے کہ کوئی تین گنا کرایہ دے یاپچاس روٹیاں لے توپولیس کواطلاع دیں،مالک مکان نےدہشت گرد کوکرایہ دار رکھا تو وہ بھی ذمہ دار ہوگا، مسجدوں کے امام کسی مشتبہ شخص کودیکھیں تو اطلاع دیں۔

    وفاقی وزیر داخلہ چودھری نثار علی خان کا پریس کانفرنس سے خطاب میں کہنا تھا کہ پاک فوج جمہوری حکومت کی نمائندگی کرتی ہے۔ افواج پاکستان نے کبھی بھی خواتین اور بچوں کو نشانہ نہیں بنایا اور نہ ہی کبھی بناتی ہے۔ اگر خواتین اور بچوں کو نقصان پہنچانا ہوتا تو دہشتگردوں کے خاندان آرام سے نہ رہ رہے ہوتے، پاکستان سے اسامہ بن لادن کے بیوی بچوں کو بھی بحفاظت بیرون ملک بھجوایا گیا تھا۔

    وفاقی وزیر نے کہا کہ پارلیمانی کمیٹی کو کام کرنے کیلئے سات دنوں کا وقت دیا گیا، ہم اپنا کام تیزی سے کر رہے ہیں اور دن رات مصروف عمل ہیں، کل شام یا پرسوں قوم کے سامنے اپنی سفارشات رکھیں گے۔ ان کا کہنا تھا کہ اپنے ایکشن پلان کے دوران پاکستانی میڈیا کے کردار کا بھی جائزہ لے رہے ہیں کیونکہ وقت آ گیا ہے کہ پاکستان کا آزاد میڈیا بھی اپنی ذمہ داریاں پہچان لے، نہ صرف دہشتگردوں بلکہ ان کے حمایتیوں کو میڈیا پر اپنا پرچار کرنے سے روکنا ہو گا کیونکہ جس کے گھر میں کوئی نہیں سنتا وہ میڈیا پر آ کر عوام کو گمراہ کر رہا ہے، ضرورت ہے کہ میڈیا اب قومی ذمہ داری کا مظاہرہ کرے۔

    ان کا کہنا تھا کہ پاکستان کے نوے فیصد مدرسے دہشتگردی سے منسلک نہیں ہیں بلکہ دہشتگردی کیخلاف جنگ میں ہمارے دست راست ہیں. ایسا بالکل نہیں کہنا چاہیے کہ مدرسوں میں پڑھنے والے تمام دہشتگرد ہیں۔ لیکن جو بھی پاکستان کیخلاف دہشتگردی کی کارروائیوں میں ملوث ہیں ان کیخلاف سخت ایکشن لیا جائے گا۔

    انہوں نے آپریشن ضرب عضب کا حوالہ دیتے ہوئے کہا کہ میران شاہ میں عام شہری اور دہشتگرد ایک ہی جگہ پر رہ رہے تھے، مگر ہم نے وہاں کاروائی کرنے کیلئے پہلے وارننگ جاری کی تا کہ عام لوگ وہاں سے امدادی کیمپوں میں چلے جائیں، جب وزیر اعظم نے آپریشن کا فیصلہ کیا تو یہ تمام معاملات اسی وقت طے کر لئے گئے تھے۔

  • وزیر داخلہ چوہدری نثار سے امیر جماعت اسلامی سراج الحق کی ملاقات

    وزیر داخلہ چوہدری نثار سے امیر جماعت اسلامی سراج الحق کی ملاقات

    اسلام آباد: وفاقی وزیر داخلہ چوہدری نثار علی خان سے امیر جماعت اسلامی سراج الحق نے ملاقات کی۔

    اسلام آباد پنجاب ہاوس میں وزیر داخلہچوہدری نثار اور امیر جماعت اسلامی کے درمیان ملاقات ہوئی، دونوں رہنماوں نے ملکی صورتحال پر تبادلہ خیال کیا، امیر جماعت اسلامی سراج الحق نے مذاکرات کی بحالی کے حوالے سے سیاسی جرگے کی کاوشوں سے چوہدری نثار کو آگاہ کیا، اس موقع پر چوہدری نثار کا کہنا تھا کہ حکومت مذاکرات کے ذریعے ملک کی سیاسی صورتحال پر قابو پانا چاہتی ہے۔

  • چوہدری نثار کا گورنر، وزیراعلٰی سندھ سمیت ڈی جی رینجرزکو ٹیلیفون

    چوہدری نثار کا گورنر، وزیراعلٰی سندھ سمیت ڈی جی رینجرزکو ٹیلیفون

    اسلام آباد: وزیرداخلہ چوہدری نثارکا کہنا ہے کہ پرامن احتجاج ہرشہری کا جمہوری حق ہے لیکن احتجاج کی آڑ میں ہنگامہ آرائی کی اجازت نہیں دی جاسکتی۔

    کراچی میں تحریک انصاف کے سونامی کو بپھرنے سے روکنے کیلئے سندھ حکومت نے تو تیاری کرلی ہے، لیکن وفاقی حکومت کو تحریک انصاف کے سونامی سے لاحق کچھ خدشات ہیں، اس لیے وزیرداخلہ چوہدری نثار نے گورنرسندھ ڈاکٹر عشرت العباد،وزیراعلٰی سندھ قائم علی شاہ اور ڈی جی رینجرز کو ٹیلی فون کیا اورکراچی میں تحریک انصاف کے احتجاج کے حوالے مشاورت کی ۔

    چوہدری نثار کا کہنا تھا کہ جمہوری رائے کے اظہار کا سب کو حق ہے لیکن امن وامان میں خلل ڈالنا اورعوام کیلئے مشکلات پیداکرنےکاحق کسی کونہیں دیا جاسکتا، انہوں نے ڈی جی رینجرز سے گفتگو میں تمام نجی و سرکاری اداروں اور تنصیبات کی حفاظت کویقینی بنانے کیلئے ہرممکن اقدامات کرنے کی ہدایت کی۔

  • حکومت نے پی ٹی آئی کے ساتھ مذاکرات کا اعلان کردیا

    حکومت نے پی ٹی آئی کے ساتھ مذاکرات کا اعلان کردیا

    اسلام آباد: حکومت نے پی ٹی آئی کے ساتھ مذاکرات کا اعلان کردیا، وزیر داخلہ چوہدری نثار کہتے ہیں مذاکرات وزیراعظم کی واپسی پر شروع ہوں گے۔

    پارلیمنٹ ہاوس میں میڈیا سے گفتگو کرتے ہوئے چوہدری نثار علی خان کا کہنا تھا کہ حکومت پی ٹی آئی کے ساتھ مذاکرات کا مثبت جواب دے رہی ہے، انہوں نے کہا کہ کہ وزیراعظم کی وطن واپسی پر مذاکرات کی بحالی ہوگی۔

    چوہدری نثار نے کہا کہ عمران خان کے دائیں بائیں زہر اگلنے والے ان سے پنجاب ہاو س میں ملاقاتیں کر کے وضاحتیں پیش کرتے ہیں، انہوں نے کہا کہ کنٹینر میں کوئی اور زبان استعمال کی جاتی ہے بعد میں معافی تلافی کی جاتی ہے عمران خان کو ایسے لوگوں کو سمجھنا چاہیئے، ان کا کہنا تھا کہ موجودہ صورتحال کے تناظر میں عمران خان پر ترس آتا ہے۔

  • جلسہ کس جگہ پر ہو انتظامیہ بتائے گی، چوہدری نثار

    جلسہ کس جگہ پر ہو انتظامیہ بتائے گی، چوہدری نثار

    اسلام آباد: وفاقی وزیر داخلہ چوہدری نثار کا کہنا ہے پی ٹی آئی کے تیس نومبر کے جلسے میں کوئی رکاوٹ نہیں ڈالی جائے گی، ان کا کہنا تھا حکومت پر دھاوا بولا گیا تو قانون حرکت میں آئے گا۔

    اسلام آباد میں میڈیا سے بات چیت میں چودھری نثارنے کہا ہے کہ تحریک انصاف ایجنڈا واضح کرے، دھاوابولنے کی کوشش کی گئی توقانون تیس نومبرسے بہت پہلے حرکت میں آئے گا۔

    ان کا کہنا تھا کہ ملک میں ” گو گو” کا نیا قانون بنایا جا رہا ہے، لیکن جب گو گو کی آواز خیبر پی کے سے آئی تو تو ان سے برداشت نہیں ہوا۔گو خٹک گو کے نعرے لگانے پر رکن اسمبلی کو پارٹی سے نکال دیاگیا۔

    وزیرداخلہ نے کہا ہے کہ ضلعی انتظامیہ جلسے کیلئے تحریک انصاف سے رابطہ کرے گی، ریڈزون میں جلسے کی اجازت سے متعلق فیصلہ چند روزمیں ہوجائے گا،چودھری نثارکا کہناتھا کہ ریڈزون میں دہشتگردی سے ملتی جلتی سرگرمیاں ہورہی ہیں۔ حکومت کوبلیک میل اورشاہراہیں بند کرنے کا تماشاختم ہوناچاہیئے۔

    وزیر داخلہ نے مزید کہا کہ تحریک انصاف جلسہ کرے یا ریلی نکالے ہم اس کو نہیں روکیں گے ۔پچھلے ڈھائی ماہ سے اسلام آباد کے لوگوں کی زندگی اجیرن ہے۔جبکہ ریڈ زون میں دہشت گردی سے ملتی جلتی چیز جاری ہے۔

    چودھری نثار کا کہنا تھا کہ 30 نومبر کے جلسے کیلئے تحریک انصاف کو اسلام آباد کی ضلعی انتظامیہ سے اجازت لینا ہوگی۔ ضلعی انتظامیہ تحریک اںصاف سے رابطہ کرکے جلسہ کی جگہ اور جن اطراف سے لوگوں نے آنا ہے اس کا تعین کرے گی۔ ضلعی انتظامیہ فیصلہ کرے گی کہ تحریک انصاف کے جلسے کیلئے کون سی جگہ موزوں ہے۔

  • کراچی میں آپریشن کو منطقی انجام تک پہنچائیں گے، چوہدری نثار

    کراچی میں آپریشن کو منطقی انجام تک پہنچائیں گے، چوہدری نثار

    کراچی: وزیر داخلہ چوہدری نثارکا کہنا ہے کہ کراچی میں دہشت گردوں کیخلاف آپریشن کو منطقی انجام تک پہنچائیں گے۔

    کراچی میں سندھ رینجرز کی اٹھارہویں پاسنگ آؤٹ پریڈ میں وزیرداخلہ چوہدری نثار نے شرکت کی۔ اس موقع پران کا کہنا تھا کہ کراچی میں دہشت گردوں کے خلاف آپریشن منطقی کو انجام تک پہنچائیں گے۔ انھوں نےکراچی آپریشن کا حوالہ دیتے ہوئے کراچی رینجرز کے سابق سربراہ رضوان اختر کو بھی مبارک باد دی۔

    چوہدری نثار نے نوجوان رینجرز اہلکاروں کو مبارک باد دیتے ہوئے کہا کہ پاک رینجرز پوری قوم کے ماتھے کا جومر ہیں ۔ وزیرداخلہ نے رینجرز کے جوانوں کو مخاطب کرکے کہا کہ فورسز کے جوان پاکستان کے محافظ ہیں۔

    وزیر داخلہ چوہدری نثار نے سندھ رینجرزکی اٹھارہویں پاسنگ آؤٹ پریڈ تقریب کے اختتام پر میڈیا سے گفتگو کرتے ہو ئے کہا کہ کراچی میں امن و امان کی صورتحال بہتر نہیں ہےتاہم امن وامان کےکام کومنطقی انجام تک پہنچایاجائیگا۔ انھوں نے مزید کہا کہ کرا چی میں چودہ مہینوں سے آپریشن جاری ہے داعش میں پاکستان میں موجودگی کی کوئی واضح ثبوت نہیں ملے ہے۔

  • وزیر داخلہ چوہدری نثار کی گورنرسندھ سے ملاقات

    وزیر داخلہ چوہدری نثار کی گورنرسندھ سے ملاقات

    کراچی: وفاقی وزیر داخلہ چوہدری نثارکاکہناہے کراچی آپریشن بغیرکسی دباؤکے اہداف کے حصول تک جاری رہے گا۔

    کراچی آپریشن میں پیش رفت کاجائزہ لینے کیلئے وزیرداخلہ چوہدری نثار کراچی پہنچ گئے، چوہدری نثار نے گورنرسندھ ڈاکٹرعشرت العباد سےملا قات کی اورکراچی میں امن وامان کی صورتحال پرتبادلہ خیال کیا، دونوں رہنماؤں نے کراچی میں قانون نافذ کرنے والے اداروں کی کارکردگی کوسراہا، وزیرداخلہ چوہدری نثار نے ایک مرتبہ پھر کراچی آپریشن بغیر کسی دباؤ کے اوراہداف کےحصول تک جاری رکھنے کے عزم کااعادہ کیا۔

    ان کا کہنا تھا کراچی میں امن اور ترقی اولین ترجیح ہے، قانون نافذ کرنے والے اداروں کو ہر ممکن وسائل فراہم کریں گے۔امن کیلئےوفاق سندھ حکومت کےساتھ ملکراقدامات کررہاہے،چوہدری نثار نے جرائم پیشہ افرادکےخلاف بلاامتیازکارروائی کرنے کی بھی ہدایت کی۔

  • عاشورہ، محرم: بتیس ہزار فوجی اہلکار سیکورٹی فرائض انجام دیں گے

    عاشورہ، محرم: بتیس ہزار فوجی اہلکار سیکورٹی فرائض انجام دیں گے

    اسلام آباد:وزارت داخلہ نےمحرم میں امن و امان برقرار رکھنے کیلئے بتیس ہزار فوجی اور نیم فوجی اہلکار تعینات کرنے کی ہدایت کی ہے، جبکہ بارہ ہیلی کاپٹرجلوسوں کی نگرانی کرینگے۔

    وفاقی وزیرداخلہ چوہدری نثار علی خان نے ہدایت کی ہے کہ عاشورہ سمیت آئندہ چند دنوں میں ملک بھر میں سیکورٹی ہائی الرٹ رکھی جائے۔ وزیرداخلہ نے کہا ہے کہ وزارت داخلہ نے ملک کے 54 شہروں میں آرمی اور نیم فوجی دستوں کے بتیس ہزار چھ سو پچانوے اہلکار تعینات کیے ہیں تاکہ وہ محرم الحرام کے دوران امن و امان اور سیکورٹی یقینی بنانے میں متعلقہ صوبائی حکومتوں کی مدد کریں۔ فضائی نگرانی کے لیے مختلف اسٹیشنوں پر بارہ ہیلی کاپٹرز بھی رکھے گئے ہیں۔اس کے علاوہ 9 اور 10 محرم کو طے شدہ وقت اور مقامات پر موبائل فون سروس بھی بند کی جاسکتی ہے۔

    چوہدری نثار علی خان کا کہنا ہے کہ محرم سے متعلقہ تمام سرگرمیوں کو چوبیس گھنٹے وزارت داخلہ کے کنٹرول روم سے مانیٹر کیا جائے گا جبکہ وفاقی حکومت جلوسوں اور عوام کی زیادہ سے زیادہ حفاظت کے لیے صوبائی حکومتوں سے مسلسل رابطے میں رہے گی۔