اسلام آباد وزارت قومی صحت نے کفایت شعاری مہم پر عملدر آمد کرتے ہوئے وزارت کے اثاثوں کی تفصیلات طلب کرلیں۔
تفصیلات کے مطابق وزارت قومی صحت میں کفایت شعاری کی مہم بھرپور انداز میں جاری ہے۔ وفاقی وزیر صحت عامر محمود کیانی نے وزارت کے اثاثوں کی تفصیلات طلب کرلیں۔
ذرائع کا کہنا ہے کہ وزارت قومی صحت کی جانب سے ذیلی اداروں کو مراسلہ ارسال کیا گیا ہے جس میں پہلے مرحلے میں ذیلی اداروں سے زیر استعمال گاڑیوں کی تفصیلات طلب کی گئی ہیں۔
مراسلے میں کہا گیا ہے کہ افسران و عملے کے زیر استعمال گاڑیوں کی تفصیلات فراہم کی جائیں، وزارت کی ملکیت سرکاری و عطیہ شدہ گاڑیوں کی تفصیل فراہم کی جائے۔
ذرائع کے مطابق وزارت صحت کی متعدد گاڑیاں غیر متعلقہ افراد کے زیر استعمال ہیں، جونیئر افسران خلاف قواعد بڑی گاڑیوں کا آزادانہ استعمال کر رہے ہیں، وزارت صحت کے افسران کو گاڑی کے ساتھ پیٹرول بھی فراہم کیا جاتا ہے۔
اس سے قبل وزارت قومی صحت نے کفایت شعاری مہم پر عملدر آمد کا آغاز کرتے ہوئے کفایت شعاری سے متعلق ہدایات بھی جاری کی تھیں۔
ذرائع کے مطابق وزارت صحت میں صبح 10 بجے سے پہلے اے سی کے استعمال پر پابندی عائد کردی گئی۔
وزیر صحت عامر کیانی نے دن کےاوقات میں غیر ضروری لائٹس جلانے سے گریز کی ہدایت کرتے ہوئے کہا کہ افسران بجلی کا غیر ضروری استعمال روک کر بچت کریں۔
ذرائع کا کہنا ہے کہ وزیر صحت نے مہمانوں کی تواضع کے لیے غیر ضروری خرچ پر بھی پابندی عائد کردی ہے۔ وزیر صحت نے ہدایت کی ہے کہ اجلاسوں، کانفرنسز میں صرف چائے پیش کی جائے گی۔
عامر کیانی نے وزارت کے لیے کسی بھی خریداری کو پیشگی اجازت سے مشروط کرتے ہوئے کہا تھا کہ وزارت کے لیے کسی بھی بڑی خریداری سے پہلے پیشگی اجازت لی جائے۔
