اسلام آباد: حکومت کے جاتے ہی وفاقی اسپتالوں پولی کلینک، اور پمز میں کی گئی بھرتیاں منسوخ کردی گئیں اور منسوخی کا حکمنامہ جاری کردیا۔
تفصیلات کے مطابق پی ڈی ایم سرکار کی وزارت صحت میں نوکریوں کی مبینہ فروخت کے الزامات کے بعد حکومت جاتے ہی وفاقی اسپتالوں میں کی گئی بھرتیاں منسوخ کردی گئیں۔
وزارت صحت سے وفاقی اسپتالوں میں بھرتیوں کی منسوخی کا حکم نامہ جاری کردیا ،اس حوالے سے جاری مراسلے میں کہا گیا ہے پولی کلینک، اور پمز اسپتال میں کی گئیں بھرتیاں منسوخ اوربھرتیوں کیلئے قائم ڈپارٹمنٹل سلیکشن کمیٹیاں تحلیل کردی گئیں۔
پمز، اور پولی کلینک میں گریڈ ایک سے پندرہ تک کی بھرتیاں گزشتہ ماہ ہوئی تھیں، پمز میں گریڈ ایک تا 15 کی 349 آسامیوں اور پولی کلینک میں گریڈ ایک تا چار کی 60 آسامیوں پر بھرتیاں کی گئی۔
پولی کلینک میں گریڈ 1 تا 4 بھرتی کیلئے انٹرویو جولائی میں ہوئے تھے، وزارت صحت نے وفاقی اسپتالوں سے بھرتیوں کا اختیار واپس لے لیا تھا اور وزارت صحت کی ڈیپارٹمنٹل سلیکشن کمیٹیوں نے بھرتیاں کی تھی۔
