اسلام آباد : نئے پاکستان میں حکومت کو سو دن پورے ہونے میں صرف ایک دن باقی رہ گیا ہے، وفاقی وزرا نے کارکردگی رپورٹس وزیراعظم کو ارسال کردیں، کارکردگی میں وفاقی وزیر مراد سعید اور شیخ رشید میں سخت مقابلہ ہے جبکہ باقی وزرا بھی ٹاپ ٹین کی دوڑ میں شامل ہیں۔
تفصیلات کے مطابق تحریک انصاف کی حکومت کو سو دن پورے ہونے کے قریب ہیں، 100 دنوں میں عوام کو ریلیف فراہم کرنے کے لیے کیا اقدامات اٹھائے؟ کفایت شعاری مہم سے قومی خزانے کو کتنا فائدہ پہنچایا؟حکومتی منشور پر عمل درآمد کے اہداف حاصل کئے یا نہیں؟
وفاقی وزراء کی رپورٹس وزیراعظم ہاؤس کو موصول ہونا شروع ہوگئیں ہیں ، کارکردگی رپورٹس نے ذاتی نمبر پر وصول کیں۔
کارکردگی میں وفاقی وزیر مراد سعید اور شیخ رشید میں سخت مقابلہ ہیں ، دونوں وفاقی وزراء نے سو روزہ اہداف بر وقت مکمل کرلئے ہیں ، شیخ رشید نے وزارت میں 2 ارب ،مراد سعید نے 3 ارب سے زائد کی آمدن کا ریکارڈ بنایا۔
کامیاب سفارتکاری اور غیر ملکی رابطوں میں تیزی کے شاندار ریکارڈز میں وفاقی وزیر خارجی شاہ محمود قریشی بھی کارکردگی میں آگے ہیں جبکہ تجاوزات کے خلاف آپریشن میں وزیر مملکت برائے داخلہ شہر یار آفریدی سب سے آگے۔
وفاقی وزیر آبی منصوبہ بندی فیصل واوڈا نے بھی مطلوبہ اہداف حاصل کر لئے، 40 روزہ وزارت میں داسو ڈیم اور پانی چوری کی روک تھام کے لئے ہنگامی اقدامات کئے اور ملک میں پہلی بار صوبوں کو ٹیلی میٹرز کی تنصیب پر راضی کر لیا۔
اوورسیز پاکستانیوں کے لئے اہم منصوبوں کی شروعات،ذوالفقار بخاری بھی ٹاپ 10 میں شامل ہیں جبکہ وفاقی وزیر قانون فروغ نسیم نے بھی مطلوبہ اہداف حاصل کئے۔
وفاقی وزیر پورٹس اینڈ شپنگ علی زیدی کی کارکردگی بھی بہترین رہی ، 9 بلین ڈالر کی غیر ملکی سرمایہ کاری کے معاہدے کئے۔
دوسری جانب متعدد وزراء تا حال اہم کامیابیاں حاصل کرنے میں ناکام، وفاقی وزیر برائے آئی ٹی خالد مقبول صدیقی کوئی بڑا منصوبہ شروع نہ کر سکے، وفاقی وزیر برائے آئی پی سی فہمیدہ مرزا بھی کارکردگی دکھانے میں پیچھے رہ گئیں، سو روز میں کھیلوں سے متعلق کوئی بڑے فیصلے نہ ہو سکے۔
وفاقی وزیر سائنس اینڈ ٹیکنالوجی اعظم سواتی بھی متاثر کن کارکردگی نہ دکھاسکے اور وفاقی وزیرنجکاری میاں محمد سومرو بھی خاطر خواہ اہداف حاصل نہ کر سکے۔
خیال رہے حکومت نے 100 دن پورے ہونے پر کارکردگی رپورٹ شائع کرنے کا فیصلہ کیا ہے، 100 دن مکمل ہونے پر خصوصی تقریب جناح کنونشن سینٹر میں منعقد ہوگی، جس میں وزیراعظم عمران خان حکومتی کارکردگی پرقوم کو اعتماد میں لیں گے۔
یاد رہے چند روز قبل 100روزہ پلان کے تحت وزیر اعظم عمران خان وزارتوں کی کارکردگی قوم کے سامنے لانے کا فیصلہ کرتے ہوئے وزارتوں کو پہلے مرحلے کی کارکردگی رپورٹ جمع کرانے کی ہدایت کی تھی۔
وزراء کو رپورٹ میں بتانا ہوگا کہ قومی خزانے کو کتنا فائدہ پہنچایا، کفایت شعاری،سادگی پرعمل ہوا؟ عوام کو ریلیف کے لیے کیا اقدامات کیے اور حکومتی منشورپرعملدرآمد ، نئی اسکیموں، کرپشن کے سد باب کے لیے کیا اقدامات کیے۔
وزیر اعظم وزارتوں کی کارکردگی قوم کے سامنےلائیں گے اور اعلیٰ کارکردگی کے حامل وزراکوحکومتی و عوامی سطح پر کریڈٹ دیں گے۔
واضح رہے عام انتخابات 2018 سے قبل 20 مئی کو پاکستان تحریکِ انصاف کے چیئرمین عمران خان نے سو دن کی منصوبہ بندی کا اعلان کیا تھا اور کہا تھا کہ 100 دن کا منشور دے دیا ہے، یہ منشور ہماری سمت کا تعین کررہا ہے۔
سربراہ تحریک انصاف نے مزید کہا تھا کہ سو دن کے پلان کا مقصد حکومت کی تمام پالیسیاں بنانا ہے، سو دن کے پلان میں سوا3کروڑ سرکاری اسکولوں کے بچوں کی تعلیم پر توجہ دینی ہے، مدارس کے25لاکھ بچوں کو اعلیٰ تعلیم دینی ہے، مدارس کے بچوں کو بھی ڈاکٹر بنانا ہے، ہم نے نچلے طبقے کو اوپر لانا ہے، بیورو کریسی کو غیرسیاسی کیا جائے گا، سرکاری اسپتالوں کو ٹھیک کرنے گئے تو مافیا کا سامنا کرنا پڑا۔
