سیالکوٹ : وفاقی وزیر خارجہ نے کہا ہے کہ عوام جب بولتے ہیں تو وہ اللہ کی آواز ہوتی ہے اور خلق خدا کی آواز نواز شریف کے حق میں ہے.
وہ سیالکوٹ میں جلسے سے خطاب کررہے تھے خواجہ آصف نے کہا کہ نواز شریف کا نام اس ملک کی ترقی اور خوشحالی کی ضمانت ہے اور گوادر سے لے کر گلگت تک نظر آنے والی ترقی اس بات کو ثابت کرتی ہے کہ ملک میں ترقیاتی کام صرف نواز شریف کے دور میں ہی ہو سکتے ہیں.
خواجہ آصف نے کہا کہ جب نواز شریف نے حکومت سنبھالی تھی تو 12 گھنٹے لوڈ شیڈنگ ہوتی تھی، مہنگائی عروج پر تھی، دہشت گردوں نے ملک کا امن برباد کر رکھا تھا اور کسی شہری کی جان و مال اور عزت و آبرو محفوظ نہیں تھی اور ناقص خارجہ پالیسی کے باعث عالمی دنیا میں ملک تنہائی کا شکار تھا.
وفاقی وزیر نے کہا کہ نواز شریف کی دور اندیشی اور منصوبہ بندی کے باعث آج بجلی اور گیس کی لوڈ شیڈنگ نہیں ہوتی ہے، پُل بن رہے ہیں، موٹر وے کا جال ملک کے کونے کونے میں پھیلا دیا گیا ہے، درسگاہیں تعمیر کیں اور اسپتالوں کے سنگ بنیاد رکھے، یہ سارے کام نواز شریف کی بدولت ہوئے اور یہی کام لے کر ہم آئندہ الیکشن میں عوام کے پاس جائیں گے.
یہ خبر پڑھیں : انصاف کرو، انتقام نہ لو، نوازشریف کی کرپشن ہے تو دکھاؤ، اس کےاثاثے نہ دکھاؤ، مریم نواز
خواجہ آصف نے کہا کہ تمام تر سازشوں کے باوجود عوام اور نواز شریف کے درمیان رشتہ قائم ہے اور جس طرح سے بڑے بڑے عوامی جلسوں میں عوام اپنی محبت کا اظہار کر رہے ہیں وہ بے مثال ہے یہ آئندہ ہونے والے الیکشن کا نوشتہ دیوار بھی ہے جب کہ چار پانچ دن بعد سینیٹ کے الیکشن ہو رہے ہیں اُس کا نتیجہ بھی سامنے آ جائے گا جس میں نواز شریف سُر خرو ہوگا.
