اسلام آباد : وزیراعظم عمران خان کی زیر صدارت وفاقی کابینہ کا اجلاس آج ہو گا، جس میں وزیر اعظم دورہ سعودی عرب پرکابینہ ارکان کواعتماد میں لیں گے۔
تفصیلات کے مطابق وزیراعظم عمران خان کی زیر صدارت وفاقی کابینہ کا اجلاس آج ہو گا، اجلاس میں ملک کی سیاسی ،معاشی اور امن و امان کی صورتحال کا جائزہ لیا جائے گا۔
وزیر خزانہ اسد عمر معاشی صورتحال پر جبکہ وزیر ہاؤسنگ طارق بشیر چیمہ 50لاکھ گھروں کی تعمیر پر بریفنگ دیں گے۔
وزیر اعظم دورہ سعودی عرب پر کابینہ ارکان کواعتماد میں لیں گے، اجلاس کے ایجنڈے میں شامل مختلف امور پر منظوری دی جائے گی۔
وزیر قانون فروغ نسیم اور مشیر برائے احتساب بھی بریفنگ دیں گے۔
گذشتہ اجلاس میں سابقہ حکومت کی ٹیکس استثنیٰ پالیسی واپس لینے پر ترمیم لانے کا فیصلہ کیا گیا تھا، ترمیم کے بعد چارلاکھ سے آٹھ لاکھ تک سالانہ آمدن پر ایک ہزارروپے ٹیکس ہوگا، آٹھ لاکھ سے بارہ لاکھ تک سالانہ آمدن پر دوہزارروپے ٹیکس ہوگا، جب کہ بارہ لاکھ سے چوبیس لاکھ سالانہ آمدن پر 5 فی صد ٹیکس لگے گا۔
خیال رہے کہ عمران خان نے وزیراعظم بننے کے بعد وفاقی کابینہ پہلے اجلاس میں سابق وزیراعظم نواز شریف اور ان کی صاحبزادی مریم نواز کا نام ایگزٹ کنٹرول لسٹ ( ای سی ایل) میں ڈالنے کی منظوری دی تھی۔
وفاقی کابینہ کے 24 اگست کو ہونے والے دوسرے اجلاس میں صدر، وزیراعظم، وزرا اور ارکان پارلیمنٹ کے صوابدیدی فنڈز ختم کرنے کی منظوری دی گئی تھی جبکہ تیسرے اجلاس میں صدر نیشنل بینک کو ہٹانے اور جنوبی پنجاب صوبے کے لیے کمیٹی کے قیام سمیت متعدد اہم فیصلے کیے گئے۔
