ARYNews.tv | Urdu – Har Lamha Bakhabar

Tag: وفیات

  • ڈیانا کے ساتھ کار حادثے میں جاں بحق ہونے والے دودی الفائد کے والد انتقال کر گئے

    ڈیانا کے ساتھ کار حادثے میں جاں بحق ہونے والے دودی الفائد کے والد انتقال کر گئے

    لندن: مصری نژاد برطانوی تاجر محمد الفائد 94 برس کی عمر میں انتقال کر گئے۔

    غیر ملکی میڈیا رپورٹس کے مطابق مصر میں پیدا ہونے والے ارب پتی تاجر محمد الفائد انتقال کر گئے، ان کے اہل خانہ نے تصدیق کر دی ہے۔ محمد الفائد کے بیٹے دودی الفائد برطانوی شہزادی لیڈی ڈیانا کے ساتھ کار حادثے میں جاں بحق ہوئے تھے۔

    محمد الفائد لندن میں واقع معروف اسٹور ہیرڈز اور فٹبال کلب فلہام کے مالک بھی رہ چکے تھے، 1997 میں ڈیانا کے ساتھ پیرس میں کار حادثے میں بیٹے کی ناگہانی ہلاکت نے انھیں نڈھال کر دیا تھا۔

    انھوں نے بیٹے کی موت پر برسوں تک سوگ منایا، اور برطانوی اسٹیبلشمنٹ کو اپنے بیٹے کی موت کا ذمہ دار قرار دیتے ہوئے اس کے خلاف برسوں تک لڑتے رہے۔

    محمد الفائد کی موت کی خبر جمعہ کو فلہام فٹبال کلب کے ایکس اکاؤنٹ پر جاری کیا گیا، جس میں ان کے اہل خانہ نے موت کی تصدیق کی اور کہا کہ وہ بدھ 30 اگست کو انتقال کر گئے۔

    واضح رہے کہ محمد الفائد کو اس بات کا یقین تھا کہ دودی اور ڈیانا کو ملکہ الزبتھ دوم کے شوہر شہزادہ فلپ نے سازش کے تحت قتل کیا تھا۔

  • سندھ کے نامور تاریخ دان گل حسن کلمتی انتقال کر گئے

    سندھ کے نامور تاریخ دان گل حسن کلمتی انتقال کر گئے

    کراچی: سندھ کے نامور تاریخ دان گل حسن کلمتی انتقال کر گئے۔

    تفصیلات کے مطابق صوبہ سندھ سے تعلق رکھنے والے معروف محقق، ادیب اور تاریخ دان گل حسن کلمتی جہانِ فانی سے کوچ کر گئے، وہ سندھی، اردو، انگریزی کی کئی کتابوں کے مصنف تھے۔

    گل حسن کلمتی کی نماز جنازہ آج حاجی عرضی گوٹھ گڈاپ ملیر میں 11 بجے ادا کی جائے گی۔

    گل حسن کلمتی جگر کے کینسر کے مرض میں مبتلا تھے، دسمبر 2022 کے بعد ان کی طبیعت بہت زیادہ ناساز ہو گئی تھی اور وہ بستر پر آ گئے تھے، کراچی کے ایک اسپتال میں ان کا علاج جاری تھا۔

    گل حسن کلمتی کو صوبائی دارالحکومت کراچی کے حوالے سے تحقیقی کام سامنے لانے پر شہرت حاصل ہے، انھیں کراچی کے لافانی کرداروں میں شمار کیا جاتا ہے، انھوں نے متعدد تاریخی کتابیں لکھیں، تاہم ان کی سب سے مشہور کتاب کراچی سندھ جی مارئی ہے، جس میں انھوں نے صوبائی دارالحکومت کی تاریخ کو جدید انداز میں پیش کیا۔

    9 بہن بھائیوں میں سے ایک گل حسن کلمتی 5 جولائی 1957 کو کراچی ڈویژن کے قصبے گڈاپ کے چھوٹے سے گاؤں گولاپ میں پیدا ہوئے، اس وقت حاجی رضی بلوچ گاؤں گولاپ ضلع ٹھٹھہ میں تھا، ایوب کے دور میں 1963 میں گڈاپ کو ضلع ملیر میں شامل کیا گیا، گل حسن کے والد محمد خان ایک مزدور تھے۔

    گل حسن کملتی کی شادی خاندان ہی میں ہوئی، ان کی ایک بیٹی ہے جنھوں نے ایم اے سوشیالوجی کی ڈگری حاصل کی۔ گل حسن نے زمانہ طالب علمی ہی میں ادبی دنیا میں قدم جمائے۔ انھوں نے 1974 میں ایس ایم آرٹ کالج کراچی میں داخلہ لیا اور کالج سے شائع ہونے والے ادبی میگزین میں سندھی ادب پر ​​لکھا اور اس کالج میں سندھی ادبی حلقہ بنایا۔

    گل حسن کلمتی نے 1979 میں کراچی یونیورسٹی میں صحافت میں داخلہ لیا، جہاں سے 1983 میں ماسٹر کی ڈگری مکمل کی۔

  • مشہور ہالی ووڈ فلم ’جان وِک‘ کے اہم اداکار کا انتقال

    مشہور ہالی ووڈ فلم ’جان وِک‘ کے اہم اداکار کا انتقال

    مشہور ہالی ووڈ فلم ’جان وِک‘ کے اہم اداکار لانس ریڈک انتقال کر گئے۔

    امریکی میڈیا کے مطابق ایچ بی او سیریز The Wire کے اداکار لانس ریڈک 60 سال کی عمر میں انتقال کر گئے ہیں۔

    ہالی ووڈ کی مشہور ایکشن تھرلر مووی جان وک میں لانس ریڈک نے شارون کا کردار ادا کیا تھا، جس پر انھیں بہت پذیرائی ملی تھی، سیکریٹری کے بیان کے مطابق جمعہ کے روز وہ لاس اینجلس میں واقع گھر میں تھے، جب اچانک انتقال کر گئے۔

    لانس ریڈک جان وِک فلموں کی چوتھی فلم کی تشہیری مہم پر تھے، یہ فلم 24 مارچ کو ریلیز ہونے والی ہے، لیکن بدقسمتی سے وہ چند دن قبل ہی زندگی کی بازی ہار گئے۔

    بالٹیمور کے رہنے والے ریڈک اپنے 25 سالہ اداکاری کے کیریئر کے دوران ایک درجن سے زیادہ فلموں اور شوز میں نظر آئے۔ جان وک فلموں کی سیریز کی تینوں فلموں میں انھوں نے اداکاری کے جوہر دکھائے اور اب چوتھی فلم میں بھی جلوہ گر ہو رہے ہیں۔

    ریڈک نے نیو یارک کی یونیورسٹی آف روچسٹر کے میوزک اسکول سے کلاسیکی موسیقی کی تعلیم بھی حاصل کی۔ ان کے پس ماندگان میں ان کی اہلیہ سٹیفنی کے علاوہ ایک بیٹی یوون نکول ریڈک اور ایک بیٹا کرسٹوفر ریڈک شامل ہیں۔

  • سینیئر بالی ووڈ اداکار ستیش کوشک کا انتقال

    سینیئر بالی ووڈ اداکار ستیش کوشک کا انتقال

    نئی دہلی: بالی ووڈ کے سینیئر اداکار اور ہدایت کار ستیش کوشک کا انتقال ہو گیا۔

    تفصیلات کے مطابق بالی ووڈ کے بہترین اداکار ستیش کوشک 66 برس کی عمر میں بدھ کو جہان فانی سے گزر گئے، دو دن قبل ہی انھوں نے ہولی کی خوشی منائی تھی۔

    ستیش کوشک کی اچانک موت کی خبر نے ہندی فلم انڈسٹری کو صدمے میں ڈال دیا ہے، بڑی تعداد میں لوگ ان کے انتقال پر تعزیت کر رہے ہیں۔

    بھارتی میڈیا رپورٹس کے مطابق ستیش دہلی میں تھے جب انھیں کار میں سفر کے دوران دل کا دورہ پڑا، ان کی میت جمعرات کو ممبئی لائی جائے گی۔ ستیش کوشک نے آخری ٹویٹ ہولی پارٹی کے حوالے سے کی تھی، جس میں انھوں نے جاوید اختر کے ساتھ اپنی تصاویر ٹوئٹر پر شیئر کی تھیں۔

    ستیش کوشک کی موت کی خبر بالی وڈ اداکار اور ستیش کے قریبی دوست انوپم کھیر نے اپنے ٹوئٹ کے ذریعے دی۔ انھوں نے لکھا: ’’میں جانتا ہوں موت اس دنیا کی آخری سچائی ہے، لیکن میں نے خواب میں بھی نہیں سوچا تھا کہ میں اپنی زندگی میں بہترین دوست ستیش کوشک کے بارے میں یہ بات لکھوں گا۔‘‘

    انوپم کھیر کا کہنا تھا کہ 45 سال کی دوستی پر اچانک اس طرح کا فل سٹاپ لگ گیا، ’’آپ کے بغیر زندگی کبھی ویسی نہیں رہے گی ستیش!‘‘

    واضح رہے کہ ستیش کوشک نے اپنے کیریئر کا آغاز تھیٹر سے کیا تھا اور پھر ہندی سنیما میں اداکاری کے جوہر دکھانے لگے، انھوں نے متعدد فلموں کی ہدایت کاری بھی کی۔

    جاوید اختر نے اداکار اور فلم ساز ستیش کی اچانک موت پر تعزیت کرتے ہوئے ان کے ساتھ اپنی ہولی پارٹی کی تصاویر شیئر کیں۔ انھوں نے لکھا کہ ’’ستیش ایک گرم جوش، محبت اور مزاح سے بھرا آدمی تھا اور تقریباً چالیس سال سے میرے لیے بھائی جیسا تھا، وہ مجھ سے بارہ سال چھوٹا تھا۔ ستیش جی، یہ آپ کی باری نہیں تھی۔‘‘

  • معروف بلوچ لوک گلوکار واسو گاجانی انتقال کر گئے

    معروف بلوچ لوک گلوکار واسو گاجانی انتقال کر گئے

    جعفرآباد: بلوچستان کے معروف بلوچ لوک گلوکار واسو گاجانی انتقال کر گئے۔

    تفصیلات کے مطابق لوگ گلوکار واسو خان گاجانی طویل علالت کے بعد انتقال کر گئے، خاندانی ذرائع کا کہنا ہے کہ واسو گاجانی عرصہ دراز سے علیل تھے۔

    گلوکار واسو گاجانی نے پہلی بار معروف سنگر شہزاد رائے کے ساتھ گائیکی سے شہرت پائی تھی، انھوں نے شہزاد رائے کے ساتھ پروگرام واسو اور میں، میں پرفارم کیا تھا۔

    لوک گلوکار واسو گاجانی کا اصل نام محمد وارث تھا، ان کا تعلق بلوچستان کے پس ماندہ علاقے صحبت پور کے گاؤں گوراناڑی سے تھا۔

  • سعودی عرب کے پستہ قد سوشل میڈیا اسٹار انتقال کر گئے

    ریاض: مشہور پستہ قد سعودی یوٹیوبر عزیز الاحمد جمعرات کو 27 سال کی عمر میں انتقال کر گئے۔

    گلف نیوز کے مطابق پیدائش سے جینیاتی بیماری میں مبتلا سعودی شہری عزیز الاحمد 19 جنوری کو اسپتال میں دوران علاج انتقال کر گئے۔

    عزیز الاحمد 1995 میں ریاض میں پیدا ہوئے تھے، اور معروف یوٹیوبر تھے، وہ عربی میں القضم یعنی ’بونا‘ کی عرفیت سے مشہور تھے، ان کی موت پر مداح نے قلبی دکھ کا اظہار کیا ہے۔

    عزیز الاحمد کو پیدائشی طور پر جینیاتی بیماری اور ہارمونز کی خرابی کا مسئلہ درپیش تھا، جس کی وجہ سے ان کی نشونما متاثر ہوئی تھی۔

    گزشتہ دنوں اسپتال سے ان کی ایک ویڈیو وائرل ہوئی تھی جس میں وہ بستر پر لیٹے ہوئے تھے، ایک خاتون ان سے پوچھ رہی تھیں کہ آپ اپنے فینز سے کیا کہنا چاہتے ہیں، عزیز نے جواب دیا ’میں ان سے کہنا چاہتا ہوں کہ میں ان سے بہت محبت کرتا ہوں۔‘

    عزیز سے جب پوچھا گیا کہ اب آپ کیسا محسوس کر رہے ہیں تو انھوں نے کہا کہ میں بہتر محسوس کر رہا ہوں، تاہم وہ جاں بر نہ ہو سکے اور اپنے لاکھوں مداحوں کو سوگوار چھوڑ کر چلے گئے، عزیز شادی شدہ تھے اور ان کا ایک بیٹا بھی ہے۔

    عزیز یوٹیوب پر مزاحیہ ویڈیوز اپ لوڈ کرتے تھے اور ان کے فالوورز کی تعداد لاکھوں میں تھی، ٹک ٹاک پر ان کے فالوورز کی تعداد 94 لاکھ جب کہ یوٹیوب پر 8 لاکھ 87 ہزار سبسکرائبرز تھے۔

    مرحوم اسنیپ چیٹ پر بھی بہت مقبول تھے جہاں ان کے پیج کے 2.7 ملین سے زیادہ سبسکرائبرز ہو چکے ہیں۔

  • بھارتی وزیر اعظم مودی کی والدہ چل بسیں

    نئی دہلی: بھارتی وزیر اعظم مودی کی والدہ انتقال کر گئیں۔

    تفصیلات کے مطابق بھارتی وزیر اعظم نریندر مودی کی والدہ ہیرابین مودی 99 برس کی عمر میں چل بسیں۔ ہیرابین مودی کو بدھ کے روز طبیعت خراب ہونے پر گجرات کے ایک کارڈیالوجی اسپتال میں داخل کرایا گیا تھا، جہاں گزشتہ شپ ان کی طبیعت زیادہ بگڑ گئی تھی۔

    بھارتی وزیر اعظم نے جمعہ کی صبح ٹوئٹر پر والدہ کے انتقال کی تصدیق کرتے ہوئے انھیں خراج عقیدت پیش کیا، اور لکھا کہ ماں کے قدموں تلے پوری ایک شان دار صدی بچھی ہوئی ہے۔

    بھارتی وزیر اعظم اکثر اہم مواقع اور تہواروں پر اپنی والدہ سے آشیرواد لینے کے لیے جاتے تھے۔

    پی ایم مودی نے ٹوئٹ میں لکھا کہ آخری ملاقات میں والدہ نے مجھ سے ایک بات کہی، جو ہمیشہ یاد رکھی جانے والی ہے کہ ذہانت سے کام کرو، پاکیزگی کے ساتھ زندگی جیو۔

  • بیلاروس کے وزیر خارجہ ولادیمیر اچانک انتقال کر گئے

    بیلاروس کے وزیر خارجہ ولادیمیر اچانک انتقال کر گئے

    مِنسک: بیلاروس کے وزیر خارجہ ولادیمیر اچانک انتقال کر گئے۔

    غیر ملکی میڈیا کے مطابق بیلاروس کے وزیر خارجہ ولادیمیر ماکی 64 برس کی عمر میں اچانک انتقال کر گئے۔

    ولادیمیر ماکی کے انتقال کی خبر کی بیلاروس کی وزارت خارجہ نے تصدیق کر دی ہے تاہم موت کی وجہ نہیں بتائی گئی، صدر الیگزینڈر لوکاشینکو نے وزیر خارجہ کی موت پر دکھ کا اظہار کرتے ہوئے ان کے لواحقین سے اظہار افسوس کیا۔

    غیر ملکی میڈیا کے مطابق ولادیمیر 2012 سے وزارت خارجہ کے امور سنبھال رہے تھے۔

    روئٹرز کے مطابق بیلاروس کی سرکاری خبر رساں ایجنسی بیلٹا نے ہفتے کے روز اطلاع دی کہ طویل عرصے سے وزیر خارجہ رہنے والے ولادیمیر ماکی اپنے روسی ہم منصب سے دو روز بعد ملاقات کرنے والے تھے، لیکن اس سے پہلے ہی اچانک ان کا انتقال ہو گیا۔

    ماکی نے اس ہفتے کے شروع میں یریوان میں کلیکٹیو سیکیورٹی ٹریٹی آرگنائزیشن (اجتماعی سلامتی معاہدہ تنظیم) کی ایک کانفرنس میں شرکت کی تھی، یہ تنظیم سوویت یونین کے بعد کی کئی ریاستوں کا ایک فوجی اتحاد ہے، ماکی نے پیر کو روسی ہم منصب سرگئی لاوروف سے ملاقات کرنی تھی۔

    بیلاروس میں 2020 میں صدارتی انتخابات اور بڑے پیمانے پر حکومت مخالف مظاہروں سے قبل، ولادیمیر ماکی مغرب کے ساتھ بیلاروس کے تعلقات کو بہتر بنانے کی کوششوں کا آغاز کرنے والوں میں سے ایک تھے، اور انھوں نے روس پر تنقید بھی کی۔ تاہم، ماکی نے مظاہروں کے آغاز کے بعد اچانک اپنا مؤقف بدل لیا، اور کہا کہ وہ مغرب کے ایجنٹوں سے متاثر ہو گئے تھے۔

    فروری میں یوکرین پر روس کے حملے کے شروع ہونے کے بعد، ماسکو اور مِنسک کے درمیان قریبی تعلقات کے حامی ماکی نے کہا کہ مغرب نے جنگ کو ہوا دی ہے اور یوکرین کے حکام کو روس کی امن کی شرائط سے اتفاق کرنا چاہیے۔

    روسی وزارت خارجہ کی ترجمان ماریا زاخارووا نے اپنے ٹیلی گرام چینل پر پوسٹ کرتے ہوئے لکھا ’’ہم جمہوریہ بیلاروس کی وزارت خارجہ کے سربراہ ولادیمیر ماکی کی موت کی خبروں سے صدمے میں ہیں۔‘‘

    دوسری طرف جلاوطن اپوزیشن لیڈر سویٹلانا تسخانوسکایا نے وزیر کی موت پر تبصرہ کرتے ہوئے ماکی کو بیلاروسی عوام کا غدار قرار دیا۔ انھوں نے کہا ’’2020 میں ماکی نے بیلاروسی عوام کے ساتھ غداری کی اور ظلم کا ساتھ دیا۔‘‘

  • معروف کامیڈین طارق ٹیڈی انتقال کر گئے

    معروف کامیڈین طارق ٹیڈی انتقال کر گئے

    لاہور: ملک کے معروف کامیڈین طارق ٹیڈی انتقال کر گئے۔

    تفصیلات کے مطابق کامیڈین طارق ٹیڈی کا رضائے الہیٰ سے انتقال ہو گیا، اہل خانہ کا کہنا ہے کہ وہ 20 روز سے لاہور کے اسپتال میں زیر علاج تھے۔

    طارق ٹیڈی کے صاحب زادے جنید نے بتایا کہ ان کے والد کو سانس اور جگر کا عارضہ لاحق تھا، پہلے نجی اسپتال میں پھر پی کے ایل آئی میں ان کا علاج جاری تھا۔

    بیٹے نے بتایا کہ 4 روز قبل طارق ٹیڈی کی طبیعت کچھ سنبھل گئی تھی، تاہم گزشتہ رات کو ان کی حالت بہت زیادہ خراب ہو گئی، اور وہ صبح 8 بجے انتقال کر گئے۔

    لاہور : اسٹیج اداکار طارق ٹیڈی کے وارنٹ گرفتاری جاری

    طارق ٹیڈی 12 اگست 1976 کو فیصل آباد میں پیدا ہوئے تھے۔ طارق ٹیڈی پر ان کی سابقہ بیوی عاصمہ بی بی نے فیملی عدالت میں بچیوں صفا اور مروا کا خرچ دینے کا کیس بھی دائر کر رکھا تھا۔

  • ’ہیری پوٹر‘ فلموں کے مشہور کردار کا انتقال

    ’ہیری پوٹر‘ فلموں کے مشہور کردار کا انتقال

    بچوں کے لیے لکھی جانے والی مشہور زمانہ جادوئی کہانی ’ہیری پوٹر‘ پر بننے والی فلموں میں ہیگرڈ کا کردار ادا کرنے والے ہالی ووڈ اداکار کا انتقال ہو گیا۔

    تفصیلات کے مطابق ’ہیری پوٹر‘ فلم سیریز میں ہیگرڈ کا کردار نبھانے والے اداکار روبی کولٹرین 72 برس کی عمر میں انتقال کر گئے، یہ ہیری پوٹر فلموں کا ایک ایسا کردار تھا جس نے پوری دنیا کے بچوں اور بڑوں کو دیوانہ بنائے رکھا۔

    دی ہیگرڈ کا کردار ادا کرنے والے مشہور اداکار روبی کولٹرن کا اصل نام انتھونی رابرٹ میک ملن تھا۔

    روبی کولٹرن نے 1990 کی دہائی میں فلم کریکر سے شہرت حاصل کی تھی، جس میں انھوں نے جاسوس کا کردار ادا کیا تھا، ہیری پوٹر سیریز میں ہیگرڈ کا کردار کرنے پر ان کے چاہنے والوں کی تعداد بہت بڑھ گئی تھی۔