ARYNews.tv | Urdu – Har Lamha Bakhabar

Tag: وقار یونس

  • وقار یونس فاسٹ بولر اعزاز چیمہ کے معترف ہوگئے

    وقار یونس فاسٹ بولر اعزاز چیمہ کے معترف ہوگئے

    لاہور: پاکستان کرکٹ ٹیم کے بولنگ کوچ وقار یونس نے فاسٹ بولر اعزاز چیمہ کو چیمپئن بولر قرار دے دیا۔

    تفصیلات کے مطابق اعزاز چیمہ نے دو روز قبل قائداعظم ٹرافی کے اختتام کے موقع پر فرسٹ کلاس کرکٹ سے ریٹائرمنٹ کا اعلان کیا تھا۔ پاکستان کرکٹ ٹیم کے بولنگ کوچ وقار یونس نے سماجی رابطے کی ویب سائٹ ٹوئٹر پر اعزاز چیمہ کے لیے اپنے پیغام میں کہا کہ اعزاز چیمہ ایک چیمپئن پروفیشنل ہیں۔

    انہوں نے کہا کہ شاندار کیریئر پر اعزاز چیمہ کو مبارکباد دیتا ہوں، اعزاز چیمہ پر مجھے فخر ہے۔ اعزاز چیمہ نے قائد اعظم ٹرافی میں سینٹرل پنجاب کی نمائندگی کی، جس نے دو روز قبل کراچی میں فائنل میں ناردرن کو شکست دے کر ٹائٹل اپنے نام کیا۔ قائداعظم ٹرافی کے اختتام کے موقع پر اعزاز چیمہ نے فرسٹ کلاس سے بھی ریٹائر منٹ کا اعلان کر دیا۔

    رائٹ آرم فاسٹ بولر اعزاز چیمہ نے قائد اعظم ٹرافی میں سینٹرل پنجاب کی نمائندگی کی، اعزاز چیمہ نے 140 فرسٹ کلاس میچز میں 572 وکٹیں حاصل کیں۔ 40 سالہ اعزاز چیمہ نے 7 ٹیسٹ اور 14 ون ڈے میچوں میں پاکستان کی نمائندگی کی۔

    15 ستمبر 2011 کو زمبابوے کے خلاف بولاوایو میں ٹیسٹ کیریئر کا آغاز کرنے والے اعزاز چیمہ نے ٹیسٹ میچوں میں 31 اعشاریہ 90 کی اوسط سے 20 وکٹیں حاصل کیں۔ اعزاز چیمہ نے 14 ایک روزہ بین الاقومی اور 5 ٹی ٹوئنٹی میچوں میں بھی پاکستان کی نمائندگی اور بالترتیب 23 اور 8 وکٹیں لیں۔

    واضح رہے اعزاز چیمہ 2012 میں مصباح الحق کی قیادت میں ایشیا کپ جیتنے والی قومی ٹیم کا حصہ تھے۔ ایشیا کپ کے فائنل میں جب بنگلہ دیش کو آخری اوور میں جیت کے لیے صرف 9 رنز درکار تھے تو اعزاز چیمہ نے شاندار گیند بازی کا مظاہرہ کرتے ہوئے ان رنز کا کامیابی سے دفاع کیا تھا اور ٹیم کو 2 رنز سے فتح دلوائی تھی۔

  • وقار یونس نوجوان باؤلرز کی صلاحیتوں سے متاثر

    وقار یونس نوجوان باؤلرز کی صلاحیتوں سے متاثر

    لاہور: قومی کرکٹ ٹیم کے باؤلنگ کوچ وقار یونس نوجوان کھلاڑیوں کی کارکردگی اور توانائی دیکھ کر متاثر ہوگئے۔

    تفصیلات کے مطابق لاہور کے قذافی اسٹیڈیم میں پاک آسٹریلیا سیریز کے حوالے سے لگایا جانے والا باؤلرز کا دو روزہ تربیتی کیمپ ختم ہوگیا، اس کیمپ میں ڈومیسٹک ٹورنامنٹس میں شاندار کارکردگی دکھانے والے 13 گیند بازوں نے شرکت کی۔

    باؤلنگ کیمپ میں شاہین آفریدی، محمد عباس، محمد حسنین، نسیم شاہ، موسیٰ خان سمیت دیگر نے شرکت کی۔ کوچ وقار یونس نے کھلاڑیوں کی صلاحیتوں کا جائزہ لیا۔

    قومی ٹیم کے باؤلنگ کوچ وقار یونس نے چار فاسٹ باؤلرز کو پاکستان کی نئی جنریشن قرار دیتے ہوئے کہا کہ نوجوان باولرز کی انرجی سے بہت متاثر ہوا، شاہین آفریدی، محمد حسنین، نسیم شاہ اور موسی خان میں زبردست ٹیلنٹ موجود ہے۔

    مزید پڑھیں: دورہ آسٹریلیا کے لیے قومی ٹی ٹوئنٹی اور ٹیسٹ ٹیم کا اعلان کل ہوگا

    کیمپ میں بابر اعظم اور امام الحق نے بھی حصہ لیا جبکہ ٹیسٹ ٹیم کے کپتان اظہر علی اور اسپینر شاداب خان نے بھی شرکت کی۔ اختتام پر ہیڈ کوچ مصباح الحق نے کھلاڑیوں کو لیکچر بھی دیا۔

  • عثمان شنواری نے ذاتی رائے دی، اظہر محمود زبردست بولنگ کوچ ہیں: وقار یونس

    عثمان شنواری نے ذاتی رائے دی، اظہر محمود زبردست بولنگ کوچ ہیں: وقار یونس

    لاہور: پاکستان کرکٹ ٹیم کے بولنگ کوچ وقار  یونس نے کہا ہے کہ اظہر محمود ایک باصلاحیت بولنگ کوچ ہیں۔

    ان خیالات کا اظہار انھوں نے خصوصی پریس کانفرنس کرتے ہوئے کیا. ان کا کہنا تھا کہ سری لنکن ٹیم کی آمد سے دنیا کے سامنے اچھا تاثر جائے گا، دو سے تین نوجوان کھلاڑی نظر میں ہیں، جن کا مستقبل روشن ہوگا.

    انھوں نے فاسٹ فالر عثمان شنواری کی جانب سے سابق بولنگ کوچ اظہر محمود پر تنقید سے متعلق کہا کہ اظہر محمود تین سال قومی ٹیم کے ساتھ رہے، انھوں نے بہت اچھا کام کیا ہے.

    عثمان شنواری نے جو کہا ہے، وہ اس کی ذاتی رائے ہے، میری نظر میں اظہرمحمود بہت زبردست بولنگ کوچ ہیں، اظہر محمود کا بہ طور  بولنگ کوچ چیمپئنز ٹرافی جتوانے میں اہم کردارتھا.

    انھوں نے کہا کہ قومی ٹیم کی کارکردگی میں بہتری لانا بنیادی مقصد ہے، جونیئر لیول پر بھی ہوم ورک کریں گے.

    مزید پڑھیں: مصباح سے بہت کچھ سیکھنے کو ملا، ورلڈ کپ سے باہر ہونے کا دکھ تھا: عثمان شنواری

    فاسٹ بولرز کی ٹیسٹ کرکٹ سے ریٹائرمینٹ سے متعلق انھوں نے کہا کہ یہ ان کا ذاتی فیصلہ ہے، البتہ ٹیم میں بلاصلاحیت کھلاڑی موجود ہیں.

    ایک سوال کے جواب میں ان کا کہنا تھا کہ میں نے یہ کبھی نہیں کہا کہ عمراکمل اور احمد شہزاد کو ٹیم سے دور رکھنے کے لئے کبھی کچھ نہیں کہا، ایک نظام ہے، سب کو اسی میں رہنا ہے.

  • یوم دفاع و شہدا پر قومی ٹیم کے کھلاڑیوں کا پاک فوج کے شہدا کو خراج عقیدت

    یوم دفاع و شہدا پر قومی ٹیم کے کھلاڑیوں کا پاک فوج کے شہدا کو خراج عقیدت

    کراچی: ملک بھر میں 6 ستمبر یوم شہداء جوش و خروش سے منایا جارہا ہے اس موقع پر قومی کرکٹ ٹیم کے کھلاڑیوں نے بھی شہداء کو خراج تحسین پیش کیا ہے۔

    تفصیلات کے مطابق ملک بھرمیں آج 6 ستمبر کویوم دفاع پاکستان کشمیریوں کے ساتھ یکجہتی کے طور پرمنایا جارہا ہے، اس موقع پر قومی کرکٹ ٹیم کے کھلاڑیوں نے سماجی رابطے کی ویب سائٹ ٹویٹر پر ملک کی افواج کے شہدا کو خراج عقیدت پیش کیا ہے۔

    وقار یونس

    قومی کرکٹ ٹیم کے بولنگ کوچ اور سابق کپتان وقار یونس نے ڈیفنس ڈے پر پاکستانی ایف 16 جیٹ کی تصویر شیئر کرتے ہوئے لکھا کہ ’ہم پاک فوج کو سلام پیش کرتے ہیں جو ہماری خوبصورت سرزمین کے لیے اپنی جانیں قربان کرتے ہیں۔‘

    شاہد آفریدی
    قومی کرکٹ ٹیم کے سابق کپتان شاہد خان آفریدی نے کہا کہ ’6 ستمبر کا دن ہمارے لیے بہت ہی اہمیت کا حامل ہے، میں آج کے دن پاک فضائیہ کی شہید پائلٹ مریم مختار کے گھر گیا اور اللہ ان کی روح کو سلامت رکھے۔

    شاہد آفریدی نے کہا کہ شہید خاتون پائلٹ کی بہادری کا سن کر حیرت ہوئی، مریم مختار ہمارے دلوں میں ہمیشہ زندہ رہیں گی۔

    فواد عالم

    ٹیسٹ کرکٹر فواد عالم نے 6 ستمبر کے ہیش ٹیگ کرتے ہوئے ایک خوبصورت شعر تحریر کیا جس میں لکھا ہے کہ ’خون دل دے کہ نکھاریں گے رخ برگ گلاب، ہم نے گلشن کے تحفظ کی قسم کھائی ہے۔‘

    احمد شہزاد

    قومی کرکٹ ٹیم کے اوپنر احمد شہزاد نے کہا یوم دفاع کا لوگو شیئر کرتے ہوئے کہا کہ ’ہم یوم دفاع اور شہدا کے موقع پر اس سرزمین کے کے بہادر بیٹوں کوخراج عقیدت پیش کرتے ہیں جنہوں نے اپنی جانوں کا نذرانہ پیش کیا۔‘

    انہوں نے کہا کہ ’ہم اپنی مسلح افواج کے ساتھ اظہار یکجہتی کرتے ہیں جو ہماری حفاظت کے لیے اپنی جانیں قربان کررہے ہیں، پاکستان زندہ باد۔‘

  • وقار یونس سے بہتر کوئی بولنگ کوچ نہیں ہوسکتا، جنید خان

    وقار یونس سے بہتر کوئی بولنگ کوچ نہیں ہوسکتا، جنید خان

    اسلام آباد: قومی کرکٹ ٹیم کے ٹیسٹ بولر جنید خان نے کہا ہے کہ وقار یونس سے بہتر کوئی بولنگ کوچ نہیں ہوسکتا، بحیثیت کھلاڑی کسی بھی کوچ کی کوچنگ میں کھیلنے سے کوئی اعتراض نہیں ہے۔

    جنید خان نے ایک انٹرویو میں کہا کہ میرا کام اچھا کھیل پیش کرنا ہے چاہے کوچ مصباح الحق ہوں یا کوئی اور ہو، وقار یونس کی ٹیم کے گیند بازوں میں مقبولیت کی وجہ ان کا پچھلا کوچنگ کا دور تھا جس میں انہوں نے تمام گیند بازوں کے ساتھ خوب محنت کی اور اس کے بہت مثبت نتائج بھی برآمد ہوئے۔

    جنید خان نے کہا کہ جہاں ایک طرف بولرز وقار یونس کی کوچنگ سے بہت خوش تھے وہیں قومی ٹیم کے بلے باز ان سے زیادہ مطمئن نہیں تھے۔

    ان کا کہنا تھا کہ پاکستان کرکٹ بورڈ(پی سی بی) کی انتظامیہ بہتر جانتی ہے کہ کسے قومی ٹیم کا کوچ ہونا چاہئے، پی سی بی نے کافی سوچ بچار کے بعد مکی آرتھر کو کوچ تعینات کیا تھا اور اب بھی وہ نئے کوچ کے انتخاب کےلئے ایسا ہی کریں گے۔

    قومی کرکٹر کا مزید کہنا تھا کہ بحیثیت کھلاڑی کسی بھی کوچ کی کوچنگ میں کھیلنے سے کوئی اعتراض نہیں ہے، میرا کام اچھا کھیل پیش کرنا ہے۔

    قومی ٹیم کے کوچ کے لیے انٹرویو مکمل، وقار یونس بولنگ کوچ کے لیے مضبوط امیدوار

    خیال رہے کہ قومی ٹیم کے ہیڈ کوچ کے لیے انٹرویو کا عمل مکمل کرلیا گیا، سابق کوچ وقار یونس بولنگ کوچ کے لیے مضبوط امیدوار بن گئے ہیں۔

    قومی ٹیم کے ہیڈ کوچ کے لیے انٹرویو مکمل کرلیے گئے ہیں، نیشنل کرکٹ اکیڈمی لاہور میں مصباح الحق اور محسن حسن خان کا ہیڈ کوچ کے لیے انٹرویو ہوا، آسٹریلیا کے ڈین جونز نے ویڈیو لنک کے ذریعے انٹرویو دیا۔

  • قومی ٹیم کے کوچ کے لیے انٹرویو مکمل، وقار یونس بولنگ کوچ کے لیے مضبوط امیدوار

    قومی ٹیم کے کوچ کے لیے انٹرویو مکمل، وقار یونس بولنگ کوچ کے لیے مضبوط امیدوار

    کراچی: قومی ٹیم کے ہیڈ کوچ کے لیے انٹرویو کا عمل مکمل کرلیا گیا، سابق کوچ وقار یونس بولنگ کوچ کے لیے مضبوط امیدوار بن گئے ہیں۔

    تفصیلات کے مطابق قومی ٹیم کے ہیڈ کوچ کے لیے انٹرویو مکمل کرلیے گئے، نیشنل کرکٹ اکیڈمی لاہور میں مصباح الحق اور محسن حسن خان کا ہیڈ کوچ کے لیے انٹرویو ہوا، آسٹریلیا کے ڈین جونز نے ویڈیو لنک کے ذریعے انٹرویو دیا۔

    ذرائع کا کہنا ہے کہ سابق ہیڈ کوچ وقار یونس بولنگ کوچ کے لے فیوریٹ ہیں کیونکہ سابق فاسٹ بولر محمد اکرم نے اپنی درخواست واپس لے لی ہے۔

    رپورٹ کے مطابق سابق کرکٹر جلال الدین کو پی سی بی نے انٹرویو کے لیے طلب ہی نہیں کیا، پی سی بی کی پانچ رکنی کمیٹی اپنی سفارشات چیئرمین پی سی بی احسان مانی کو دے گی۔

    مزید پڑھیں: قومی ٹیم کی مینجمنٹ کی تلاش کے لیے 5 رکنی پینل تشکیل

    ذرائع کا کہنا ہے کہ بیٹنگ کوچ اور اسٹرینتھ اینڈ کنڈیشنگ کوچ کا فیصلہ بعد میں ہوگا، مصباح الحق ابھی بھی ہیڈ کوچ کے لیے مضبوط ترین امیدوار ہیں۔

    وقار یونس کے ساتھ صرف معاوضے کے حوالے سے کوئی رکاوٹ پیدا ہوسکتی ہے ورنہ وہ مصباح کے ساتھ کام کرنے میں کوئی دشواری محسوس نہیں کررہے ہیں۔

    ذرائع کا یہ بھی کہنا ہے کہ مصباح الحق کے ہیڈ کوچ بننے کی صورت میں ہائی پروفائل بیٹنگ کوچ کی خدمات حاصل نہیں کی جائیں گی بلکہ بورڈ اپنے کوچز میں سے کسی کو ذمہ داری سونپ سکتا ہے۔

  • وقار یونس قومی کرکٹ ٹیم کی کوچنگ کی دوڑ میں شامل

    وقار یونس قومی کرکٹ ٹیم کی کوچنگ کی دوڑ میں شامل

    لاہور: سابق کپتان وقار یونس قومی کرکٹ ٹیم کی کوچنگ کی دوڑ میں شامل ہوگئے۔

    تفصیلات کے مطابق سابق کپتان وقار یونس نے اس بار ہیڈ کوچ کے لیے نہیں بلکہ بولنگ کوچ کے لیے درخواست دی ہے۔

    وقار یونس 2 مرتبہ پاکستان کرکٹ ٹیم کے ہیڈ کوچ رہ چکے ہیں، وہ مئی 2014 سے اپریل 2016 تک ٹیم کے ہیڈ کوچ رہے، وقار یونس 2 مرتبہ قومی ٹیم کے بولنگ کوچ بھی رہ چکے ہیں۔

    ذرائع کے مطابق قومی ٹیم کے بولنگ کوچ کے لیے درخواست دینے والے وقار یونس اب تک کے ہائی پروفائل کوچ ہیں۔

    واضح رہے کہ پی سی بی نے قومی ٹیم کے کوچنگ اسٹاف کے لیے درخواستیں طلب کی ہیں، کوچنگ اسٹاف کے لیے درخواستیں جمع کرانے کی آخری تاریخ 26 اگست ہے۔

    مزید پڑھیں: کوچ اور سلیکٹر میں سے کسی ایک عہدے کو منتخب کرنا پڑا، تو استخارہ کروں گا: مصباح الحق

    ورلڈ کپ 2019 کے بعد پاکستان کرکٹ بورڈ نے پورے کوچنگ اسٹاف اور سلیکشن کمیٹی کو فارغ کردیا ہے۔

    یاد رہے کہ گزشتہ روز سابق کپتان مصباح الحق کا کہنا تھا کہ کوچنگ اور سلیکشن کمیٹی سے کسی ایک کو منتخب کرنا پڑا تو استخارہ کروں گا۔

    مصباح الحق کا کہنا تھا کہ وہ ایک شخص کو ہیڈ کوچ اور چیف سلیکٹر کی ذمہ داریاں دینے کے حامی ہیں۔

    ان کا کہنا تھا کہ اگر ہیڈ کوچ ہی نے ٹیم منتخب کی ہوگی، تو وہ خراب کارکردگی کا جواب دہ ہوگا. البتہ میں نے ابھی پاکستانی ٹیم کی کوچنگ کے لئے اپلائی نہیں کیا، میرے کوچ بننے کی صرف افواہیں ہیں۔

  • پی سی بی کی وسیم اکرم، وقاریونس اور یاسر شاہ کو سول ایوارڈکی نامزدگی پرمبارک باد

    پی سی بی کی وسیم اکرم، وقاریونس اور یاسر شاہ کو سول ایوارڈکی نامزدگی پرمبارک باد

    لاہور: پاکستان کرکٹ بورڈ نے  اسٹار کرکٹرز کو سول ایوارڈ کی نامزدگی پر مبارک باد دی ہے.

    تفصیلات کے مطابق پی سی بی کی جانب سے تحریر کر دہ خط میں‌ سوئنگ کے سلطان وسیم اکرم، بورے والا ایکسپریس وقاریونس اور نام ور لیگ اسپینر یاسرشاہ کوسول ایوارڈکی نامزدگی پرمبارک باد اور نیک تمناؤں کا اظہار کیا گیا.

    حکومت پاکستان نے وسیم اکرم اور وقار یونس کوہلال امتیازدینے کا اعلان کیا ہے، جب کہ یاسرشاہ کو ستارہ امتیاز دیا جائے گا، خیال رہے کہ ہلال امتیاز دوسرا جب کہ ستارہ امتیازتیسرا سب سے بڑا سول ایوارڈ ہے.

    پی سی بی کے ترجمان نے کہا ہے کہ تینوں کھلاڑی سول ایوارڈکی نامزدگی کےمستحق تھے.

    مزید پڑھیں: ہماری نظروں میں وزیر اعظم نوبل امن انعام حاصل کر چکے ہیں: وسیم اکرم

    خیال رہے کہ وسیم اکرم اور وقار یونس ٹو ڈبلیوز کے نام سے معروف تھے، دونوں کی تیز رفتار بولنگ کے بدولت پاکستان نے کئی کامیابیاں اپنے نام کیں.

    وسیم اکرم اور وقار یونس دنوں ہی نے پاکستان کی کپتانی کا اعزاز حاصل کیا. وسیم اکرم پی ایس ایل کی مقبول ترین ٹیم کراچی کنگز کے صدر بھی ہیں.

  • سرفراز کی قیادت میں‌ کھلاڑیوں‌ کی بنی گالہ آمد، مبارکباد

    سرفراز کی قیادت میں‌ کھلاڑیوں‌ کی بنی گالہ آمد، مبارکباد

    اسلام آباد: قومی کرکٹ ٹیم کے کپتان سرفراز احمد، عمرگل، محمد حفیظ اور وقار یونس بنی گالا پہنچے اور عمران خان کو الیکشن میں کامیابی پر مبارکباد پیش کی۔

    تفصیلات کے مطابق پاکستان تحریک انصاف کے چیئرمین عمران خان کو الیکشن میں کامیابی پر مبارکباد دینے کے لیے سابق و موجودہ کھلاڑیوں کی جانب سے بنی گالہ آمد کا سلسلہ جاری ہے۔

    قومی کرکٹ ٹیم کے کپتان سرفراز احمد، عمرگل، محمد حفیظ اور سابق کپتان وقار یونس بھی عمران خان کو مبارکباد دینے کے لیے بنی گالہ پہنچے اور الیکشن میں کامیابی پر مبارکباد پیش کی۔

    سابق فاسٹ بولر وقار یونس بنی گالا پہنچے اور میڈیا سے گفتگو کرتے ہوئے انہوں نے یکہا کہ عمران خان کو الیکشن جیتنے پر مبارکباد دینے کے لیے آیا ہوں۔

    سابق کپتان وقار یونس نے کہا ہے کہ عمران خان کے ساتھ بڑا پرانا تعلق اور پیار ہے، عمران خان کی کامیابی کا سن کر مبارکباد دینے آسٹریلیا سے آیا ہوں، عمران خان کے آنے سے کرکٹ نہیں تمام کھیلوں کے حالات بہتر ہوں گے۔

    وقار یونس نے کہا کہ عمران خان پر جس طرح کا کیچڑ اچھالا گیا وہ سب کے سامنے ہے، انہوں نے مشکل حالات کا اچھے سے مقابلہ کیا ہے، عمران خان اپوزیشن میں بیٹھ چکے ہیں انہیں حالات کا اندازہ ہے، اوورسیز پاکستانی بھی ملک کے لیے کچھ کر گزرنے کو تیار ہیں، پاکستانیوں سے درخواست ہے عمران خان کو سپورٹ کریں۔

    عمر گل نے کہا کہ عمران خان کی جیت سے بہت خوش ہیں، عمران خان بچپن سے ہی ہمارے ہیرو ہیں، ان کو دیکھ کر ہی کرکٹ کھیلنی شروع کی، خوشی ہے ایک کھلاڑی ملک کا وزیر اعظم بنے گا۔

    واضح رہے کہ دو روز قبل چیف سلیکٹر انضمام الحق اور مشتاق احمد نے بنی گالا میں عمران خان سے ملاقات کی اور الیکشن میں کامیابی پر مبارکباد پیش کی تھی۔

    چیف سلیکٹر کا کہنا تھا کہ عمران خان نے جو وعدے کیے ہیں وہ اس کو پورا کریں گے، ہماری دعائیں ان کے ساتھ ہیں، انشاء اللہ وہ قوم کے لیے بہترین کام کریں گے۔

    سابق لیگ اسپنر مشتاق احمد نے کہا کہ عمران خان نے 22 سال جدوجہد کی، اللہ نے صلہ دیا، دعا ہے اللہ عمران خان کو ان کے مقصد میں کامیاب کرے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ابھرتے ہوئے نوجوان بولرحسن علی نے وقار یونس کا ریکارڈ توڑ دیا

    ابھرتے ہوئے نوجوان بولرحسن علی نے وقار یونس کا ریکارڈ توڑ دیا

    ابو ظہبی : سری لنکا کے خلاف تیسرے ون ڈے میچ میں فاسٹ بولر حسن علی نے پانچ وکٹیں لے کر جہاں اپنی پچاس وکٹیں مکمل کرلیں وہیں سابق فاسٹ بولر وقار یونس کے ریکارڈ کو توڑ دیا.

    تفصیلات کے مطابق ابوظہبی میں کھیلے جانے والے تیسرے ایک روزہ میچ میں پاکستان کی جانب سے حسن علی نے عمدہ باؤلنگ کا مظاہرہ کرتے ہوئے 34 رنز کے عوض پانچ وکٹیں لینے میں کامیاب رہے، حسن علی نے اپنے مختصر کیریئر میں تیسری بار ایک اننگ میں پانچ وکٹیں حاصل کیں.

    جہاں ابھرتے ہوئے فاسٹ بولر حسن علی اس میچ میں پانچ وکٹیں لینے میں کامیاب رہے وہیں یہ ہدف انہوں نے اپنے کیریئر کی محض 24 ویں اننگز میں حاصل کر کے سابق فاسٹ بولر اور سابق کپتان وقار یونس کے سب سے کم اننگز میں پچاس وکٹیں حاصل کرنے کے ریکارڈ کو توڑ دیا، وقار یونس نے 50 وکٹیں 27 ویں اننگز میں حاصل کی تھی.

    اس طرح محض 24 ویں اننگز میں پچاس وکٹیں لینے والے حسن علی سب سے کم میچز میں پچاس وکٹیں حاصل کرنے والے پاکستانی کھلاری بن گئے ہیں جو کہ اس سے قبل وقار یونس کے پاس تھا۔

     اسی سے متعلق : تیسرا ون ڈے، 209 رنزکے تعاقب میں پاکستان کی بیٹنگ جاری

    یاد رہے کہ بین الااقوامی سطح پر سب سے کم میچز میں پچاس وکٹیں لینے کا اعزاز سری لنکا کے اسپینر اجانتھا مینڈس کے پاس ہے جنہوں نے محض اپنے کیریئر کی 19 ویں اننگز میں 50 وکٹیں حاصل کرلی تھیں.

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔