Tag: ولادی میرپیوٹن

پیانگ یانگ: امریکی صدر ڈونلڈ ٹرمپ سے مذاکرات میں ناکامی کے بعد شمالی کوریائی سربراہ کم جونگ ان روسی صدر ولادی میرپیوٹن سے ملاقات کریں گے۔

تفصیلات کے مطابق صدر ٹرمپ اور کم جونگ ان دو بار اہم ملاقات کرچکے ہیں تاہم مذاکرات بے نتیجہ رہے، شمالی کوریائی سربراہ اب ولادی میرپیوٹن سے ملیں گے۔

غیر ملکی خبر رساں ادارے کا کہنا ہے کہ شمالی کوریا کے رہنما کم جونگ رواں ماہ کے اختتام پر روس کا دورہ کریں گے، اس دوران جوہری موضوع پر تبادلہ خیال متوقع ہے۔

دونوں سربراہوں کے درمیان امریکی صدر ڈونلڈ ٹرمپ سے مذاکرات میں پیش رفت سے متعلق بھی گفتگو ہوگی۔خیال رہے کہ کم جونگ امریکی صدر سے دوبارہ ملاقات کے لیے بھی راضی ہیں۔

شمالی کوریائی رہنما کو اس دورے کی دعوت روسی صدر ولادی میر پیوٹن نے دے رکھی ہے، روسی میڈیا کے مطابق پیوٹن اور کم جونگ ان کے درمیان ملاقات مشرقی شہر ولادی ووسٹک میں ہونے کا امکان ہے۔

ولادی ووسٹک شہر شمالی کوریائی سرحد کے قریب واقع ہے، کِم جونگ کا روسی دورہ صدر پیوٹن کے چینی دورے سے قبل بھی ہوسکتا ہے۔

شمالی کوریا نے امریکا کو رواں سال کے اختتام تک تعلقات کی بحالی کا موقع دیا ہے، کم جونگ نے واضح کیا ہے کہ بعد میں شمالی کوریا اپنے فیصلوں پر آزاد ہوگا۔

جوہری تنازعہ: کم جونگ ان کی ایک بار پھر امریکا کو دھمکی

واضح رہے کہ امریکا کا الزام ہے کہ ماسکو حکومت پیونگ یانگ پر عائد عالمی پابندیوں کی خلاف ورزی کرتے ہوئے اس کیمونسٹ ملک کو خوراک مہیا کر رہا ہے تاہم روس اس کی تردید کرتا ہے۔