کراچی: نجی ٹی وی چینل کے صحافی ولی بابر پر گولی چلانے والے قاتل کو گرفتار کرلیا گیا۔
اے آر وائی نیوز کی رپورٹ کے مطابق صوبائی وزیر اطلاعات ناصر حسین شاہ اور کراچی پولیس چیف غلام نبی میمن نے نیوز کانفرنس کرتے ہوئے بتایا کہ صحافی ولی بابر پر گولی چلانے والے قاتل کو گرفتار کرلیا گیا ہے، ولی خان بابر کو 13 جنوری 2011 کو لیاقت آباد میں قتل کیا گیا تھا۔
کراچی پولیس چیف کا کہنا ہے کہ ولی بابر قتل کیس میں 8 ملزمان نامزد تھے، ایک ملزم لیاقت علی واقعے کے ایک سال بعد مارا گیا تھا، فیصل موٹا اور ذیشان عرف شانی کو سزائے موت کی سزا سنائی گئی۔
غلام نبی میمن کے مطابق کیس کے 4 ملزمان 2015 میں پکڑے گئے تھے، وفاقی ادارے کی انٹیلی جنس نے ذیشان عرف شانی کو گرفتار کیا، تحقیقات میں ذیشان عرف شانی نے 4 قتل کا اعتراف کیا۔
کراچی پولیس چیف کا کہنا ہے کہ ولی بابر پر براہ راست گولی چلانے والا ذیشان عرف شانی تھا، صحافی کے قتل کا ماسٹر مائنڈ فیصل موٹا تھا، قاتل نے بتایا ولی بابر کو مارنے کی وجہ اے این پی کے لیے کام کرنا تھا۔
انہوں نے کہا کہ کامران عرف ذیشان شانی بیوی بچوں کے ساتھ گلشن معمار میں رہ تھا، 2012 میں کیس کے آخری گواہ کو بھی قتل کردیا گیا تھا۔
غلام نبی میمن کا کہنا تھا کہ قاتلوں نے بتایا کہ ولی بابر ایم کیو ایم مخالف اسٹوری پر کام کررہا تھا، ملزمان کو ایم کیو ایم جنوبی افریقا سے بھی ہدایت ملتی تھیں، کامران عرف ذیشان شانی نے 2008 میں ایم کیو ایم میں شمولیت اختیار کی تھی۔
