ریاض : سعودی فرمانروا شاہ سلمان اور ولی عہد محمد بن سلمان نے سیلاب سے جانی نقصان پر افسوس کا اظہار کرتے ہوئے پاکستان کےعوام کیساتھ یکجہتی کا اظہار کیا۔
تفصیلات کے مطابق سعودی عرب کے فرمانروا شاہ سلمان بن عبدالعزیز اور ولی عہد شہزادہ محمد بن سلمان نے پاکستان کے شمالی علاقوں میں سیلاب سے ہونے والی تباہی اور جانی نقصان پر گہرے دکھ اور افسوس کا اظہار کیا ہے۔
سعودی پریس ایجنسی (ایس پی اے) نے بتایا کہ شاہ سلمان نے صدر آصف علی زرداری کے نام تعزیتی پیغام میں متاثرہ خاندانوں اور پاکستانی عوام سے ہمدردی کا اظہار کرتے ہوئے جاں بحق افراد کے لواحقین کے لیے تعزیت اور زخمیوں کی جلد صحتیابی کی دعا کی اور لاپتہ افراد کی بحفاظت واپسی کی امید بھی ظاہر کی۔
اسی طرح ولی عہد محمد بن سلمان نے بھی صدر آصف علی زرداری کو تعزیتی پیغام بھیجا اور پاکستانی عوام کے ساتھ اظہار یکجہتی کیا۔
یاد رہے پاکستان میں حالیہ تباہ کن بارشوں اور فلش فلڈز سے اب تک کم از کم 328 افراد جان کی بازی ہار چکے ہیں، جن میں زیادہ تر خیبر پختونخوا کے رہائشی شامل ہیں۔
مزید پڑھیں : خیبرپختونخوا: این ڈی ایم اے نے 328 اموات کی تصدیق کر دی
بونیر میں شدید بارشوں اور کلاؤڈ برسٹ کے باعث پہاڑوں سے پانی کا ریلہ گھروں پر آ گیا، جس نے بڑے پیمانے پر تباہی مچائی۔
حکام کا کہنا تھا کہ اگرچہ علاقے میں ابتدائی وارننگ سسٹم موجود تھا لیکن بارش کی شدت اتنی غیر معمولی تھی کہ پانی کے ریلے نے رہائشیوں کو سنبھلنے کا موقع ہی نہیں دیا۔
چیئرمین نیشنل ڈیزاسٹر مینجمنٹ اتھارٹی لیفٹیننٹ جنرل انعام حیدر نے اسلام آباد میں پریس کانفرنس کرتے ہوئے کہا تھا کہ پاکستان میں موسمیاتی تبدیلی کے باعث موسم کے انداز تیزی سے بدل رہے ہیں۔ ان کے مطابق رواں برس جون سے مون سون کے آغاز کے بعد اب تک ملک میں گزشتہ سال کی نسبت 50 فیصد زیادہ بارشیں ہو چکی ہیں۔
