لاہور: الیکشن ٹریبونل نے تحریکِ انصاف کے چیئرمین عمران خان کی ووٹوں کی جانچ سے متعلق درخواست مسترد کردی۔
تحریکِ انصاف کے چیئرمین عمران خان نے این اے ایک سو بائیس میں مبینہ دھاندلی کے معاملے پر لوکل کمیشن کے خلاف الیکشن ٹریبونل سے استدعا کی تھی۔
الیکشن ٹریبونل نے عمران خان کی درخواست مسترد کرتے ہوئے ریمارکس دیئے کہ لوکل کمیشن کی رپورٹ کا باریک بینی سے جائزہ لینے کے بعد اس پر حکم جاری کیا جائے گا۔
عمران خان نے درخواست میں مؤقف اختیار کیا تھا کہ ووٹوں کی جانچ پڑتال کرنے والے کمیشن نے دھاندلی کے ثبوت کو رپورٹ کا حصہ نہیں بنایا، ٹریبونل لوکل کمیشن کے اس معاملےکا نوٹس لے۔
اس سے قبل الیکشن ٹربیونل نے این اے 122کے ووٹوں کے ریکارڈ کی جانچ پڑتال دوبارہ کروانے کےلیے عمران خان کی درخواست پر فیصلہ محفوظ کرتے ہوئے آئندہ سماعت پر سردار ایازصادق کو شہادت ریکارڈ کروانے کے لیے طلب کرلیا۔
لاہور میں الیکشن ٹربیونل کے جج کاظم ملک نے سماعت شروع کی تو عمران خان کی جانب سے دائر درخواست میں مؤقف اختیار کیا گیا کہ لوکل کمیشن نے این اے 122کا آڈٹ درست طریقے سے نہیں کیا اور نہ ہی دھاندلی سے متعلق حقائق واضح کیے لہذا دوبارہ انکوائری کاحکم دیاجائے۔
عمران خان کے وکیل کی جانب سے ٹریبونل کو بتایا گیا کہ حلقے کے فارم 14ایک ہی ہاتھ سے لکھے گئے ہیں جبکہ ریٹرننگ افسر نے پی پی 147 کے فارم 15این اے 122 میں شامل کرکے گنتی پوری کی ہے جسکی انکوائری کروائی جائے۔
دوران سماعت سردارایازصادق کے وکیل نے بتایا کہ الزامات بے بنیاد ہیں، اب شکست کے خوف سےعمران خان لوکل کمیشن غلام حسین اعوان پر اعتراضات اٹھا رہے ہیں، ایک مرتبہ انکوائری ہونے کے بعد دوبارہ نہیں کروائی جاسکتی۔
عدالت نے عمران خان کی لوکل کمیشن کے خلاف درخواست پر فیصلہ محفوظ کرتے ہوئےسماعت آئندہ ہفتے تک ملتوی کردی جبکہ سردارایاز صادق کو شہادت ریکارڈ کروانے کے لیے طلب کرلیا۔
