ممبئی: معروف بھارتی اداکار وکرانت میسی نے فلمی دنیا کو ہمیشہ ہمیشہ کیلیے خیرباد کہہ دینے کی خبروں پر اپنا وضاحتی بیان جاری کر دیا۔
انڈین میڈیا کی رپورٹس کے مطابق وکرانت میسی نے پیر کے روز پوسٹ کی گئی اپنی انسٹاگرام پوسٹ کے حوالے سے وضاحت دے دی جس میں انہوں نے ریٹائرمنٹ سے متعلق بات کی تھی۔
وکرانت میسی نے حالیہ انٹرویو میں بتایا کہ وہ اداکاری کی دنیا سے ریٹائر نہیں ہو رہے بلکہ ایک طویل وقفہ لے رہے ہیں۔ اداکار نے یہ وضاحت اس وقت جاری کی جب شائقین اس الجھن میں پڑ گئے کہ وہ انہیں اسکرین پر اب کبھی نہیں دیکھ پائیں گے۔
انٹرویو میں وکرانت میسی کا کہنا تھا کہ میں تھوڑا سا تھک گیا ہوں لہٰذا مجھے طویل وقفہ لینے کی ضرورت ہے، مجھے گھر کی یاد آ رہی ہے اور صحت بھی ٹھیک نہیں ہے، مداحوں نے میری انسٹاگرام پوسٹ کا غلط مطلب لے لیا۔
انہوں نے کہا کہ جب انہیں لگے گا کہ اب وقت ہے تو دوبارہ اسکرین پر جلوہ گر ہوں گے۔ ’مجھے صرف اداکاری آتی ہے اور اس نے مجھے وہ سب کچھ دیا جو میرے پاس پہلے کبھی نہیں تھا۔ میری جسمانی اور ذہنی صحت متاثر ہے، میں اپنے لیے کچھ وقت نکالنا چاہتا ہوں تاکہ اپنے ہنر کو بہتر بنا سکوں۔‘
پیر کو وکرانت میسی نے اپنے اداکاری کے کیریئر سے ایک قدم پیچھے ہٹنے کے فیصلے کا اعلان کیا تھا۔ انہوں نے کہا تھا کہ وہ شوہر، باپ اور بیٹے کے طور پر اپنے فرائض سرانجام دینے کیلیے وقت نکالنا چاہتے ہیں۔
اداکار نے بتایا تھا کہ ان کی دو فلمیں ریلیز ہوں گی جس کے بعد وہ وقفہ لیں گے۔
وکرانت میسی کے اعلان پر مداحوں کی جانب سے ملا جلا ردعمل سامنے آیا تھا، بہت سوں نے ان کے فیصلے کی حمایت کی تھی جبکہ کچھ پبلسٹی اسٹنٹ قرار دیا تھا۔
