ARYNews.tv | Urdu – Har Lamha Bakhabar

Tag: وگ

  • بھارت: سونا حیرت انگیز طریقے سے اسمگل کرنے والے پکڑے گئے (ویڈیو دیکھیں)

    بھارت: سونا حیرت انگیز طریقے سے اسمگل کرنے والے پکڑے گئے (ویڈیو دیکھیں)

    چنائی: بھارتی ریاست تمل ناڈو کے ایئرپورٹ پر دو ایسے افراد پکڑے گئے جو حیرت انگیز طریقے سے سونا اسمگل کرنا چاہ رہے تھے لیکن ناکام رہے۔

    تفصیلات کے مطابق بھارتی شہر چنائی کے انٹرنیشنل ایئر پورٹ پر کسٹم انٹیلی جنس حکام نے ایک کارروائی میں وگ کے نیچے انوکھے طریقے سے سونا اسمگل کرنے کی کوشش کرنے والے دو افراد کو گرفتار کر لیا۔

    برطانوی آن لائن اخبار دی میل نے اپنی رپورٹ میں کہا ہے کہ گرفتار اسمگلرز اکبر علی اور زبیر حسین دبئی سے آنے والی ایک پرواز سے چنائی ایئر پورٹ پر اترے تھے، انھوں نے عجیب طرح سے سروں پر رکھے وگ کے نیچے سونا چھپایا ہوا تھا۔

    ایئر پورٹ کسٹم حکام نے اسمگلرز سے مجموعی طور پر تین لاکھ 82 ہزار سے زائد مالیت کا سونا اور غیر ملکی کرنسی برآمد کی، سونا 698 گرام تھا۔

    رپورٹ کے مطابق حکام کو دونوں مسافروں پر ایگزٹ کے دوران اس لیے شک ہوا کیوں کہ ان کے ہیئر اسٹائل عجیب تھے، تفتیش پر معلوم ہوا کہ ایک تو انھوں نے وگ پہنے ہوئے تھے، دوم انھوں نے سروں کے درمیان میں ٹنڈ کرائی ہوئی تھی۔

    معلوم ہوا کہ کھوپڑی کے درمیان میں کرائی گئی ٹنڈ میں انھوں نے ایک دھات میں سونا رکھ کر کھوپڑی سے چپکایا ہوا تھا، اور اس کے اوپر وگ جمائی ہوئی تھی۔

    حکام کا کہنا تھا کہ سونا قیمتی دھات میں لپیٹا گیا تھا تاکہ یہ بالوں کے نیچے فٹ ہو جائے، اور سونا پیسٹ کی صورت میں تھا، ایک اسمگلر نے ہوائی اڈے کے حکام کو راضی کرنے کی کوشش میں اپنے کچھ بال بھی منڈوائے تھے۔

    تلاشی کے دوران معلوم ہوا کہ بال جعلی تھے اور جب وگ ہٹا دیے گئے تو ان کے نیچے سونا موجود تھا۔

    چنائی ایئرپورٹ پر اسی پرواز سے آنے والے ایک اور مسافر بالو گنیسن سے بھی حکام نے 622 گرام سونا برآمد کیا جو اس نے پیٹ میں چھپایا ہوا تھا۔

  • وگ میں منشیات اسمگلنگ کی کوشش ناکام، ہزاروں پاؤنڈ کی کوکین برآمد

    وگ میں منشیات اسمگلنگ کی کوشش ناکام، ہزاروں پاؤنڈ کی کوکین برآمد

    میڈرڈ : وگ(مصنوعی بالوں) میں کوکین چھپانے والا اسمگلر کو بارسلونا کے ایئر پورٹ سے گرفتار کیا گیا جو بوگوٹا سے آ رہا تھا، جس کا تعلق جنوبی امریکی ملک کولمبیا سے ہے۔

    تفصیلات کے مطابق منشیات کے اسمگلر ایئر پورٹ سکیورٹی اہلکاروں کی آنکھوں میں دھول جھونکنے کے لیے نت نئے طریقے ایجاد کرتے ہیں لیکن سکیورٹی اہلکار بھی سمگلروں کے ان ہتھکنڈوں سے اچھی طرح واقف ہیں اور وہ ان کا بھانڈا پھوڑنے میں دیر نہیں لگاتے۔

    غیر ملکی خبر رساں ادارے کا کہنا تھا اسپین کے شہر بارسلونا میں ایئرپورٹ حکام نے ایک ایسے کولمبین شہری کو گرفتار کیا ہے جس نے قریباً ایک پاؤنڈ کوکین اپنی وگ میں چھپا رکھی تھی۔

    پولیس کا کہنا ہے کہ سکیورٹی اہلکاروں کوا سمگلر پر اس لیے شک ہوا کیونکہ وہ بہت پریشان دکھائی دے رہا تھا اور اس کے سر پر لگی وگ کا سائز بھی غیر معمولی تھا۔سکیورٹی اہلکاروں نے اسمگلر سے تفتیش شروع کی اور اس کے سر پر ٹیپ سے چپکے ہوا ایک کوکین کا پیکٹ برآمد کر لیا جس کا وزن آدھا کلو گرام یا 1.1 پاؤنڈ تھا جس کی مارکیٹ میں قیمت 34 ہزار ڈالرز یا 30 ہزار یوروز ہے۔

    پولیس نے اسے آپریشن ’ٹوپی ‘یعنی آپریشن وگ کا نام دیا ہے، اسمگلر کو بارسلونا کے ایئر پورٹ سے گرفتار کیا گیا جو بوگوٹا سے آ رہا تھا،گرفتار ہونے والے 65 سالہ اسمگلر کا تعلق کولمبیا سے ہے۔

    میڈیا ذرائع کا کہنا ہے کہ اسپین کے جنوبی امریکا اور خصوصاً کولمبیا کے ساتھ لسانی اور تاریخی روابط ہیں، اسپین کو یورپ میں کوکین کی اسمگلنگ کا گیٹ وے کہا جاتا ہے۔اسمگلر کوکین کی اسمگلنگ کے لیے آئے روز نئے طریقے ایجاد کرتے ہیں۔

    غیر ملکی میڈیا کےمطابق حالیہ برسوں میں پولیس نے کھوکھلے انناناس میں سے کوکین برآمد کی، پھر سکیورٹی اہلکاروں کو ایک وہیل چیئر کے کشن میں چھپائی گئی کوکین ملی، ٹوٹی ہوئی ٹانگ پر چڑھائے جانے والے پلاسٹر میں سے کوکین برآمد ہوئی اور تو اور پولیس نے برتنوں میں کوکین بھر کر لے جاتے ہوئے بھی اسمگلروں کو گرفتار کیا۔

    واضح رہے کہ یورپی یونین کی ایک رپورٹ کے مطابق اسپین یورپی یونین میں کوکین استعمال کرنے والے ممالک میں چھٹے نمبر پر آتا ہے۔ اس فہرست میں برطانیہ کا پہلا نمبر ہے اور اس کے بعد ہالینڈ، ڈنمارک، فرانس اور آئر لینڈ آتے ہیں۔