Tag: ویت نام

ہماری زمین شور مچاتے رواں دواں دریاؤں، حسین و جمیل وادیوں‌ میں خوب صورت جھیلوں، دل آویز چشموں اور دل پذیر جھرنوں سے سجی ہوئی ہے جن میں‌ سانس لیتی رنگ برنگی اور نوع بہ نوع آبی حیات، بیش قیمت نباتات قدرت کی فیّاضی اور بے شمار عنایات کا مظہر ہیں۔

دریائے میکانگ بھی قدرت کی صنّاعی کا ایک عظیم نشان ہے جو مشرقی ایشیا اور جنوب مشرقی ایشیا میں‌ طوالت اور حجم کے اعتبار سے دنیا بارھواں بڑا دریا ہے۔

اس دریا کے کنارے کئی بستیاں آباد ہیں اور ان کے باسی اسی دریا سے معاش کرتے اور کنبے کا پیٹ بھرتے ہیں۔

مختلف ممالک میں‌ اس دریا سے مچھیروں اور ملّاحوں کا روزگار وابستہ ہے جب کہ دریا کے قریب بسنے والے کسانوں کی فصلیں‌ اسی دریا کے پانی سے لہلہاتی ہیں اور یہی ان کے باغات کو ثمر بار کرتا ہے۔ میکانگ کے ساتھ آباد اکثر علاقے چاول کی سب سے زیادہ پیداوار کے لیے پہچانے جاتے ہیں۔

دریائے میکانگ پر کشتیوں‌ کے ذریعے تجارت اور عام اشیائے ضرورت کی خرید و فروخت اور لین دین کا سلسلہ بھی جاری رہتا ہے۔

دریائے میکانگ کی لمبائی تقریباً 4350 کلومیٹر ہے۔ یہ سطحِ مرتفع تبت سے نکلنے کے بعد جنوبی چین کے صوبے یونان اور میانمار سے ہوتا ہوا لاؤس اور تھائی لینڈ کے درمیان بٹ جاتا ہے اور گویا آبی سرحد تشکیل دیتا ہے۔ آگے اس دریا سے کمبوڈیا اور ویت نام فیض یاب ہوتے ہیں اور یہ بحیرۂ جنوبی چین میں‌ اترجاتا ہے۔

موسمی تغیرات کے علاوہ انسانوں‌ کی غفلت اور کوتاہیوں کے سبب آبی آلودگی سنگین مسئلہ بن چکی ہے جس کے باعث سمندر، دریاؤں اور جھیلوں کا حُسن اور ان کی خوب صورتی ماند پڑ گئی ہے اور ان سے پیوست حیات کو شدید خطرہ ہے۔

دریائے میکانگ بھی آلودہ ہوچکا ہے اور ترحّم آمیز نظروں سے مہذّب انسانوں کی طرف دیکھ رہا ہے۔

ویت نام کی جنگ اور اس کی تباہ کاریوں‌ کے بارے میں آپ نے بہت کچھ سنا اور پڑھا ہو گا۔ تاریخ کے اوراق میں‌ اس ملک پر امریکا اور اس کے اتحادیوں کی فوجی یلغار اور ظلم و ستم کے گواہ ہیں، لیکن یہ ملک اپنے حسین ساحل، دریاؤں، خوب صورت تفریح گاہوں، بدھ مت کے صدیوں پرانے معبد اور دیگر تاریخی عمارتوں‌ کی وجہ سے بھی پہچانا جاتا ہے۔

’’گولڈن برج‘‘اسی ویت نام کے شہر دانانگ کے پہاڑوں کے درمیان تعمیر کیا گیا ہے اور اپنے منفرد طرزِ تعمیر کی وجہ سے مشہور ہے۔

اس پُل کا ڈیزائن دنیا بھر کے ماہرِ‌ تعمیرات اور سیاحوں کی توجہ حاصل کرچکا ہے۔ درختوں اور سبزے سے گھرے ہوئے پہاڑوں کے درمیان یہ پُل گویا دیو ہیکل ہاتھوں نے تھاما ہوا ہے اور یہ ڈیزائن ماہر انجینئروں کے ذہن کی اختراع ہے۔

سنہرے رنگ کے اس برج کو مخصوص مقام پر دو بڑے بڑے ہاتھ تھامے ہوئے ہیں جو دراصل پہاڑ کو تراش کر بنائے گئے ہیں۔ یہ پہاڑی سلسلہ بانا کے نام سے پہچانا جاتا ہے۔ پُل کی راہ داری کا رنگ سنہرا ہے اور اسی مناسبت سے اسے گولڈن برج کا نام دیا گیا ہے۔

اس پُل سے پیدل گزرتے ہوئے اردگرد کے حسین مناظر دیکھے اور دور تک نظارہ کیا جاسکتا ہے۔ سمندر کی سطح سے کئی فٹ کی بلندی پر واقع اس پُل کی لمبائی ایک سو پچاس میٹر ہے۔ اس پر چلتے ہوئے سیاح خود کو بادلوں کے درمیان محسوس کرتے ہیں اور بلندی سے اطراف اور نیچے کی طرف دیکھیں تو سبزہ اور باغات دل کش منظر پیش کرتے ہیں۔

گولڈن برج دو بلین امریکی ڈالرز کی لاگت سے تیار کیا گیا ہے اور یہ ایک مقامی کمپنی کے ماہرین کا ڈیزائن کردہ ہے۔ اس پُل کا وزن اٹھانے کے لیے کئی ستون موجود ہیں‌ جو جدید تعمیراتی سامان سے تیار کردہ ہیں اور تیکنیکی مہارت سے یہاں نصب کیے گئے ہیں۔