جنوبی افریقہ نے فلسطینی شہریوں کو بڑا ریلیف فراہم کرتے ہوئے اپنے ملک میں ان کے داخلے کے لیے ویزے کی شرط ختم کردی ہے۔
غیرملکی میڈیا رپورٹس کے مطابق فلسطینی پاسپورٹ کے حامل افراد اب بغیر ویزا جنوبی افریقہ آسکتے ہیں۔ فلسطینی شہریوں کو جنوبی افریقہ کے تمام ایئرپورٹس، بندرگاہوں اور سرحدی گزرگاہوں پر 90 دنوں کے لیے ویزا فری سفری سہولت فراہم کی جائے گی۔
حماس نے اس کا خیرمقدم کرتے ہوئے کہا ہے کہ یہ ایک مثبت ا قدام ہے جو کہ فلسطینی عوام کے منصفانہ نصب العین کے ساتھ یکجہتی کے جذبے کو ظاہر کرتا ہے۔
ترجمان کا کہنا تھا کہ اس فیصلے سے ہمارے شہریوں کی زندگی اور نقل و حمل آسان بنانے میں مدد ملے گی۔ حماس نے عالمی برادری سے مطالبہ کیا ہے کہ اسرائیلی قابض ریاست کی نسل پرستی اور فاشزم کا سامنا کرنے والے فلسطینی عوام کو مدد اور سہولیات فراہم کی جائے۔
جمہوریہ جنوبی افریقہ کی حکومت کی جانب سے خیرسگالی کے طور پر فلسطینی شہریوں کو یہ سہولت فراہم کی گئی ہے کہ وہ بغیر ویزا ملک میں داخل ہوسکتے ہیں۔
فلسطین سے آنے والوں کو ملک کے تمام ہوائی اڈوں، بندرگاہوں اور سرحدی گزرگاہوں پر 90 دنوں کے لیے ویزا فری سفری سہولت فراہم کی گئی ہے۔
