Tag: ویسٹ انڈیز پمقابلہ آئر لینڈ

سڈنی: آئی سی سی نے ویسٹ انڈیز کے ڈیرن سیمی اور آئرلینڈ کے جون مونے کو ضابطہ اخلاق کی خلاف ورزی کرنے پر میچ فیس کا تیس فیصد جرمانہ عائد کردیا۔

آئی سی سی کے قوانین کے مطابق انٹرنیشنل میچ کے دوران کسی کے ساتھ بدکلامی یا بدتمیزی کرنا جرم ہے۔

ویسٹ انڈیز کے ڈیرن سیمی اور آئرلینڈ کے جون مونے دونوں کھلاڑی میچ کے دوران غلط جملہ بازی کی وجہ سے سزا کے مرتکب پائے گئے۔

 آئی سی سی نے فوری ایکشن لیتے ہوئے دونوں کھلاڑیوں پر میچ فیس کا تیس فیصد جرمانہ عائد کردیا ہے۔

ڈیرن سیمی کو چونتیسویں اوور میں شاٹ کھیلنے کے بعد غلط الفاظ استعمال کرنے پر اور جون مونے نے کیچ چھوڑنے پر فیلڈر کو متعدد مرتبہ غلط الفاظ دہرائے۔

دونوں کھلاڑیوں نے جرم کا اعتراف کرتے ہوئے آئی سی سی میچ ریفری کرس براڈ کی جانب سے دی گئی سزا قبول کر لی ہے۔

نیلسن: آئرلینڈ نے ورلڈ کپ دوہزار پندرہ کا پہلا گروپ میچ کھیلتے ہوئے ویسٹ انڈیز کو چار وکٹوں سے اپ سیٹ شکست دے دی ہے، رواں ایونٹ میں ہدف حاصل کرنے کا اعزاز بھی آئرلینڈ کو حاصل ہوا ہے۔

 نیوزی لینڈ کے شہر نیلسن میں کھیلے گئے گروپ بی کے میچ میں شائقین کو سابق عالمی چیمپیئن ویسٹ انڈیز کی اپ سیٹ شکست کا نظارہ دیکھنے کو ملا، آئرلینڈ کرکٹ ٹیم عمدہ کارکردگی کی بدولت چار وکٹوں سے کامیاب رہی۔ ویسٹ انڈیز نے آئر لینڈ کو جیت کیلئے 305 رنز کا ہدف دیا تھا۔

مطلوبہ ہدف کے تعاقب میں آئرلینڈ کے بلے بازوں نے شاندار کارکردگی دکھائی اور گراؤنڈ کے چاروں جانب رنز کے انبار لگا دیئے، آئرلینڈ نے مطلوبہ ہدف سات اوورز پہلے ہی چھ وکٹوں کے نقصان پر پورا کرلیا۔

پاؤل اسٹرلنگ بانوے،ایڈ جوائز چوراسی اور نیل او برائن نے اناسی رنز کی ذمہ دارانہ اننگز کھیلی۔ آئرش بیٹسمین پاؤل اسٹرلنگ مین آف دی میچ بھی قرار پائے۔

  آئرش ٹیم نے ٹاس جیت کر ویسٹ انڈیز کو بیٹنگ کی دعوت دی، کالی آندھی کے پانچ بلے باز تیز ہوا کے جھونکے کی طرح ستاسی رنز پر پویلین واپس پہنچ گئے۔

لینڈل سیمنز اور ڈیرن سیمی نے چھٹی وکٹ کی شراکت میں اسکور بورڈ پر ایک سو چون رنز کا اضافہ کیا، سیمنز نے ایک سو چار اور سیمی نے نواسی رنز بنائے، ویسٹ انڈیز سات وکٹوں پر تین سو چار رنز بناسکی۔