Tag: ویسٹ انڈیز

ابوظہبی : پاکستان کرکٹ ٹیم نے ویسٹ انڈیز کے خلاف دوسرے ٹیسٹ میچ میں ٹاس جیت کر بیٹنگ کا فیصلہ کیا ہے۔

تفصیلات کےمطابق ابوظہبی میں پاکستان نے ویسٹ انڈیز کے خلاف دوسرےٹیسٹ میچ میں ٹاس جیت کر بیٹنگ کا فیصلہ کیا ہے اور ٹیم میں تین تبدیلیاں کی گئیں ہیں۔

قومی کرکٹ ٹیم کےکپتان مصباح الحق کا کہنا ہے کہ ٹیم میں تین تبدیلیاں کی ہیں محمد عامر،وہاب ریاض اور بابر اعظم کی جگہ راحت علی،یونس خان اور ذولفقار بابر کو ٹیم میں شامل کیا گیا ہے۔

ٹیسٹ کرکٹ ٹیم کے کپتان مصباح الحق کا کہنا ہے کہ فاسٹ بالر محمد عامر اور وہاب ریاض کو دوسرے ٹیسٹ میچ میں آرام دیا گیا ہے۔

مزید پڑھیں:پاکستان نے ویسٹ انڈیز کو ہرا کر 400 واں ٹیسٹ جیت لیا

یاد رہے کہ پہلے ٹیسٹ میچ میں پاکستان نے ویسٹ انڈیز کو تاریخی شکست دی تھی اور ون ڈے ٹیم کے کپتان اظہرعلی میچ کے بہترین کھلاڑی قرار پائے تھے۔

واضح رہے کہ ٹیسٹ کرکٹ ٹیم کا کپتان مصباح الحق نے دوسرے ٹیسٹ میچ میں بھی بہترین کارگردگی جاری رکھنے کے عزم کا اظہار کیا ہے۔

شارجہ : پاکستان اور ویسٹ انڈیز کے درمیان تین میچوں کی سیریز کا پہلا میچ پاکستانی وقت کے مطابق سہ پہر4 بجے شروع ہوگا۔

تفصیلات کے مطابق اظہر علی کی کپتانی میں پاکستان کو50اوورز کرکٹ میں چیلنج کا سامنا ہے کیوں کہ اظہر علی کی کپتانی کے بارے میں بہت سارے سوالات اٹھائے جارہے ہیں۔

توقع ہے کہ پاکستان شارجہ کی اسپین وکٹ پر تین اسپنرز یاسر شاہ، عماد وسیم اور محمد نواز کے ساتھ ویسٹ انڈین بیٹسمینوں کی خامیوں کا فائدہ اٹھائے گا۔شعیب ملک بھی اسپن بولنگ کی مدد کے لیے موجود ہوں گے۔

ویسٹ انڈیز کے کپتان جیسن ہولڈر کا کہنا ہے کہ ہمارے پاس کوچ نہیں ہے۔اس کے باوجود پاکستان کوٹف ٹائم دیں گے۔ان کا کہنا تھا کہ ہم ٹی ٹوئنٹی کے بعد بہتر کارکردگی دکھانا چاہتے ہیں۔

اس وقت پاکستان کی عالمی رینکنگ نویں ہے،اگر پاکستان ویسٹ انڈیز کو3 صفر سے شکست دے دے تو اس کی رینکنگ آٹھویں ہوسکتی ہے۔

ویسٹ انڈین ٹیم کو اپنی آٹھویں پوزیشن برقرار رکھنے کے لئے پاکستان کے خلاف 3صفر سے کامیابی ضروری ہے۔

خیال رہے کہ دنیا کی8ٹاپ ٹیمیں آئندہ سال30 ستمبر تک اپنی پوزیشن کو برقرار رکھ کر ورلڈ کپ میں براہ راست جگہ بنائیں گی۔

یاد رہے کہ دونوں ٹیمیں شارجہ میں 18ون ڈے کھیل چکی ہیں۔جن میں سے 9 میں پاکستان کامیاب رہا، بکہ 9 میں ہی فتح ویسٹ انڈیز کا مقدر بنی۔

پاکستان اور ویسٹ انڈیز اب تک 127ون ڈے کھیل چکے ہیں، جن میں سے 55 میں میدان قومی ٹیم نے مارا جبکہ 69 میچوں میں کالی آندھی نے پچھاڑا اور3 مقابلے ٹائی ہوئے۔

واضح رہے کہ پاکستان ٹی ٹوئنٹی ٹیم نے کپتان سرفرازاحمد کی قیادت میں ویسٹ انڈیز کو0-3 سے شکست دی تھی۔

دبئی: پاکستان نے ٹی ٹوئنٹی ورلڈ چیمپیئن کو پہلے میچ میں نو وکٹوں سے شکست دے دی، تین میچوں کی سیریز میں پاکستان کو ایک صفر کی برتری حاصل ہوگئی۔

دبئی میں شاہینوں کی اونچی اڑان نے کالی آندھی کا رخ موڑ دیا، ٹی ٹوئنٹی کپتان سرفراز احمد دوسرے امتحان میں بھی سرخرو ہوئے،دبئی میں کھیلے جانے والے پہلے ٹی ٹوئنٹی میچ میں پاکستانی کپتان سرفراز احمد نے ٹاس جیت کر مخالف ٹیم کو پہلے بیٹنگ کی دعوت دی، ابتداء میں ویسٹ انڈین بلے باز پاکستانی باؤلنگ کے سامنے بے بس نظر آئے اور صرف 40 رنز کے اسکور پر 8 کھلاڑی پویلین لوٹ گئے۔

عماد وسیم کی گھومتی گیندوں نے بلےبازوں کو گھوما دیا،انہوں نے پہلے ٹی ٹوئنٹی میں کیرئیر کی بہترین بولنگ کردی، عماد وسیم نے اپنے پہلے ہی اوور میں ایون لوئس کی وکٹ لے ڈالی۔ پھر اپنے دوسرے اوور میں فلیچر اور سیمویلز کو پویلین بھیج دیا، دوسرے اسپیل میں چھکوں کےماہر کیرون پولارڈ اور کارلوس براتھ ویٹ کا شکار کیا۔

سہیل تنویر،حسن علی اورمحمد نواز نے بھی بہتی گنگا میں ہاتھ صاف کیے، فاسٹ بالر سہیل تنویر نے 2 وکٹیں جبکہ محمد نواز اور حسن علی نے ایک ایک وکٹ حاصل کی، پچاس رنزسے پہلے ویسٹ انڈیز کے آٹھ بلے باز پویلین جابیٹھے۔

ڈوئن براوؤ اور جیروم ٹیلر نے نویں وکٹ کیلئے عالمی ریکارڈ بنایا، ویسٹ انڈیز کی پوری ٹیم ایک سوپندرہ رنزپر ڈھیر ہوگئی۔

جواب میں شرجیل خان کی مختصرلیکن تیز اننگز نےپاکستان کی جیت کی بنیاد رکھی، بابر اعظم اورخالد لطیف کی شراکت نے میچ پاکستان کی جھولی میں ڈال دیا، پاکستان نے ہدف ایک وکٹ پر ہی حاصل کرلیا، تاہم تین میچوں کی سیریز میں پاکستان کو ایک صفر کی برتری حاصل ہوگئی۔

یاد رہے ویسٹ انڈیز کی ٹیم نے 2013 کے ٹی ٹوئنٹی میچ میں پاکستان کے خلاف سب سے کم ترین اسکور 124 رنز بنائے تھے تاہم آج کے میچ میں شاہینوں کی عمدہ بالنگ کے باعث ماضی کا ریکارڈ ٹوٹ گیا۔

دبئی : ٹیسٹ کرکٹ میں عالمی نمبر ون رینکنگ حاصل کرنے والی پاکستانی کرکٹ ٹیم پاکستان اور ویسٹ انڈیز کے درمیان آج پہلے ٹی ٹوئنٹی میچ سے سیریز کا آغاز ہوگا۔

تفصیلات کےمطابق دورہ انگلینڈ مکمل کرنے کے بعد قومی ٹیم کا اگلا ٹاکرا ویسٹ انڈیز سے متحدہ عرب امارات کی سرزمین پر ہوم سیریز کی صورت میں ہوگا۔

3 ٹیسٹ، 3 ون ڈے اور 3 ٹی ٹوئنٹی میچز پر مشتمل سیریز کا آغاز دبئی انٹرنیشنل اسٹیڈیم میں آج ہونے والے پہلے ٹی ٹوئنٹی میچ سے ہوگا جبکہ میچ پاکستانی وقت کے مطابق رات 9 بجے شروع ہوگا۔

قومی ٹی ٹوئنٹی ٹیم کے کپتان سرفراز احمد کپتانی کے حصول کے بعد پہلی مرتبہ مکمل سیریز میں قائدانہ صلاحیتیں دکھائیں گے جبکہ اس سے قبل انہوں نے انگلینڈ کے خلاف واحد ٹی ٹوئنٹی میچ میں اپنا سکہ منوایا تھا۔

ایسی ہی صورت حال ویسٹ انڈیز کے کپتان کارلوس بریتھ ویٹ کے ساتھ ہے جنہیں حال ہی میں قیادت سونپی گئی ہے۔

گرین شرٹس کا اسکواڈ کپتان سرفراز احمد، شرجیل خان، خالد لطیف، عمر اکمل، شعیب ملک، بابراعظم، محمد رضوان، عماد وسیم، حسن علی، محمد عامر، وہاب ریاض، سہیل تنویر، محمد نواز، سعد نسیم اور رومان رئیس پر مشتمل ہے۔

دوسری جانب ویسٹ انڈیز کی قیادت کارلوس بریتھ ویٹ کریں گے جنہیں ایون لیوس، جانسن چارلس، مارلن سیمولز، آندرے فلیچر، کیرون پولارڈ، ڈیوائن براوو، جیروم ٹیلر، سیموئل بدری، سنیل نارائن، رومین پاویل، نیکولس پورن ، جیسن ہولڈر، کیسرک ولیم اور چیڈوک والٹن کی خدمات حاصل ہیں۔

لاہور: ٹی ٹونٹی کرکٹ ٹیم کے کھلاڑی ویسٹ انڈیز سیریز کے لیے لاہور ائیرپورٹ سے دبئی روانہ ہوگئے۔

تفصیلات کے مطابق قومی کرکٹ ٹیم اپنے دورے کے دوران ویسٹ انڈیز سے 3 ٹیسٹ ،3 ون ڈےاور 3 ٹی ٹوئنٹی میچز کھیلے گی۔ٹیم میں بابر اعظم،حسن علی،عماد وسیم،سعد نسیم،خالد لطیف،محمد نواز،محمد رضوان،ر ومان رئیس،شرجیل خان،شعیب ملک،سہیل تنویر ،عمر اکمل اور وہاب ریاض کے نام شامل ہیں۔

پہلا ٹی ٹوئنٹی میچ 23 ستمبر،دوسرا 24اور تیسرا 27 ستمبر کو کھیلا جائے گا۔پہلے 2 ٹی ٹونٹی میچز دبئی اور تیسرا میچ ابوظہبی میں کھیلا جائے گا۔

پی سی بی ذرائع کا کہنا ہے کہ انگلینڈ کے خلاف ون ڈے اور ٹی ٹوئینٹی سیریز کے بعد بولنگ کوچ اظہر محمودکا معاہدہ ختم ہوگیا ہے۔مکی آرتھر کسی غیر ملکی کو بولنگ کوچ بنانا چاہتے ہیں۔

یاد رہے کہ ویسٹ انڈین ٹیم نے دبئی میں ٹریننگ شروع کر دی ہے۔شدید گرم موسم کے باوجود ٹی ٹوئنٹی کی عالمی چیمپئن ٹیم نے 3گھنٹے لگ کر ٹریننگ کی۔ویسٹ انڈین ٹیم جو شیڈول سے دو روز پہلے ہی دبئی پہنچ گئی تھی۔

واضح رہے کہ سرفراز نے پاکستان ٹیم کو ٹی ٹوئنٹی میں بھی سرفہرست لانے کے عزم کا اظہار کرتے ہوئے کہا کہ ‘ہم سب پاکستان کو مختصر ترین طرز میں اپنی پوزیشن دلانے کے لیے بے تاب ہیں،ٹی ٹوئنٹی کے کپتان کی حیثیت سے درجہ بندی میں ٹیم کی پوزیشن بہتر بنانا میرا مقصد ہے’۔