Tag: وینزویلا

  • ٹک ٹاک پر ایک کروڑ ڈالر کا جرمانہ عائد

    ٹک ٹاک پر ایک کروڑ ڈالر کا جرمانہ عائد

    وینزویلا کی سپریم کورٹ کی جانب سے سوشل میڈیا ایپ ٹک ٹاک پر ایک کروڑ ڈالر کا جرمانہ کردیا گیا ہے۔

    بین الاقوامی خبر رساں ادارے کی رپورٹ کے مطابق وینزویلا کی عدالت نے سوشل میڈیا ایپ ٹک ٹاک پر چینلج ویڈیوز کو پورا کرتے ہوئے ہلاکتوں کے معاملے پر ایک کروڑ ڈالر کا جرمانہ عائد کردیا ہے۔

    رپورٹس میں کہا گیا ہے کہ وینز ویلا میں ٹک ٹاک چینلج ویڈیوز کو پورا کرنے کی دوڑ میں مبینہ طور پر اب تک 3 کم عمر نوجوان زندگی کی بازی ہار چکے ہیں اور اس متعلق عدالت کا کہنا ہے کہ ٹک ٹاک اس حوالے سے مواد کو روکنے یا ہٹانے کیلیے کوئی اقدامات نہیں کررہا۔

    عدالتی فیصلے میں واضح نہیں کیا گیا ہے کہ ٹک ٹاک جرمانہ کس طرح ادا کرے گا جبکہ ٹک ٹاک حکام کی جانب سے بھی ابھی تک اس فیصلے پر کسی قسم کا رد عمل سامنے نہیں آیا ہے۔

    اب کسی دوسری ڈیوائس کے لیے صارف کو نیا چارجر نہیں لینا پڑے گا

    صدر نکولس مادورو نے گزشتہ ماہ نومبر میں ایک 12 سالہ بچی کی ہلاکت کا ذمہ دار ٹک ٹاک کو قرار دیا تھا جس نے مبینہ طور پر ایک ٹک ٹاک چیلنج میں حصہ لیا تھا جس میں سکون کی گولیاں لینی تھیں مگر سونا نہیں تھا۔ بچی چیلنج کے دوران موت کی وادی میں چلی گئی تھی۔

  • امریکا نے وینزویلا کے صدر کا طیارہ ضبط کر کے فلوریڈا پہنچا دیا

    امریکا نے وینزویلا کے صدر کا طیارہ ضبط کر کے فلوریڈا پہنچا دیا

    واشنگٹن: امریکا نے وینزویلا کے صدر نکولس مادورو کا طیارہ ضبط کر لیا ہے۔

    غیر ملکی میڈیا رپورٹس کے مطابق پیر کو امریکی محکمہ انصاف نے کہا ہے کہ پابندیوں کی خلاف ورزی پر وینزویلا کے صدر کا ہوائی جہاز قبضے میں لے لیا گیا ہے۔

    روئٹرز نے رپورٹ کیا ہے کہ امریکا نے اس بات کا تعین کرنے کے بعد کہ طیارے کی خریداری میں امریکی پابندیوں کی خلاف ورزی کی گئی ہے، وینزویلا کے صدر نکولس مادورو کے زیر استعمال طیارہ قبضے میں لے کر ڈومینیکن ریپبلک سے فلوریڈا پہنچا دیا ہے۔

    وینزویلا کے صدر نکولس مادورو کا 13 لاکھ ڈالر مالیت کا طیارہ کئی ماہ سے ڈومینیکن ری پبلک میں موجود تھا، ملک کے وزیر خارجہ نے ایک بیان میں کہا کہ طیارہ مرمت کے لیے ورکشاپ پر کھڑا تھا، طیارے کی ضبطی کے امریکی اقدام کو وینزویلا کی حکومت نے غیر قانونی قرار دے دیا ہے۔

    حکومت نے اپنے سخت رد عمل میں کہا کہ یہ قدم ڈاکہ زنی کے سوا کچھ نہیں، یہ ایک غیر قانونی قدم ہے اور امریکا کی جانب سے یہ مجرمانہ عمل بار بار کیا جا رہا ہے۔

    وینزویلا اوپیک کی رکن ریاست ہے، امریکا نے اس کے تیل کے اہم ترین شعبے، مادورو اور ان کے ساتھیوں پر بھاری پابندیاں عائد کر رکھی ہیں، اور جس طرح حالیہ انتخابات میں مادورو نے دھاندلی کی ہے، اس بات کا امکان بڑھ گیا ہے کہ ان پر مزید پابندیاں لگ سکتی ہیں۔

    28 جولائی کو ہونے والے انتخابات میں مادورو پر اندرون اور بیرون ملک مسلسل دباؤ بڑھ رہا ہے، جس میں انھوں نے دعویٰ کیا ہے کہ وہ جیت گئے ہیں، تاہم اپوزیشن کا کہنا ہے کہ اس کے ووٹوں کی کاپیاں اس کے امیدوار کو فاتح ثابت کرتی ہیں۔

    امریکی اٹارنی جنرل میرک گارلینڈ نے ایک بیان میں کہا کہ ڈاسالٹ فالکن 900EX طیارہ غیر قانونی طور پر ایک شیل کمپنی کے ذریعے 13 ملین ڈالر میں خریدا گیا تھا اور اسے نکولس مادورو اور اس کے ساتھیوں کے استعمال کے لیے امریکا سے باہر اسمگل کر دیا گیا تھا۔ وائٹ ہاؤس کی قومی سلامتی کونسل کے ترجمان نے کہا ’’اس اقدام سے مادورو وینزویلا پر اپنی غلط حکمرانی کے نتائج کو محسوس کرتے رہیں گے۔‘‘

  • وینزویلا کے عوام نے صدر نکولس مادورو کی جیت مسترد کر دی، عالمی سطح پر انتخابی نتائج پر شک کا اظہار

    وینزویلا کے عوام نے صدر نکولس مادورو کی جیت مسترد کر دی، عالمی سطح پر انتخابی نتائج پر شک کا اظہار

    کاراکاس: وینزویلا کے عوام نے صدر نکولس مادورو کی جیت مسترد کر دی، عالمی سطح پر بھی انتخابی نتائج پر شک و شبہہ کا اظہار کیا گیا ہے۔

    غیر ملکی میڈیا رپورٹس کے مطابق جنوبی امریکی ملک وینزویلا میں انتخابی نتائج کے اعلان کے بعد مظاہرے پھوٹ پڑے ہیں، عوام نے صدر نکولس مادورو کے تیسری مدت کے لیے انتخابات جیتنے کے نتائج کو ماننے سے انکار کر دیا ہے۔

    عوام سڑکوں پر نکل آئی ہے، اور صدر مادورو کی کامیابی کے خلاف احتجاج شروع ہو گیا ہے، دارالحکومت کے مختلف علاقوں میں عوام اور پولیس کے درمیان شدید جھڑپیں ہوئیں، کئی رہنماؤں کے مجسموں کو گرا دیا گیا، سیکیورٹی فورسز نے مظاہرین کو منتشر کرنے کے لیے آنسو گیس اور ربڑ کی گولیاں استعمال کیں۔

    مظاہرین نے صدر مادورو کے پوسٹر پھاڑ کر جلا دیے جب کہ ٹائروں، کاروں اور کچرے کو بھی نذر آتش کیا۔

    پیر کے روز دارالحکومت کاراکاس کی سڑکوں پر ہزاروں افراد نے ’’آزادی، آزادی‘‘ اور ’’یہ حکومت گرنے والی ہے‘‘ کے نعرے لگائے، جب کہ اپوزیشن نے انتخابی کمیشن کی طرف سے اعلان کردہ سرکاری نتائج پر سوال اٹھایا ہے، اور دنیا بھر کے کئی ممالک نے بھی اس پر شکوک و شبہات کا اظہار کیا۔

    ایتھوپیا میں مسافر کشتی حادثے کاشکار، 19 افراد ہلاک

    ادھر قومی انتخابی کونسل (CNE) نے 2031 تک تیسری چھ سالہ مدت کے لیے مادورو کے دوبارہ منتخب ہونے کی تصدیق کر دی ہے۔ عوام نے اس بات پر مشہور آنجہانی سوشلسٹ رہنما ہیوگو شاویز کے مجمسے گرائے کہ انھوں نے مادورو کو اپنا جانشین منتخب کیا تھا۔

    اپوزیشن لیڈر ماریا کورینا ماچاڈو نے صحافیوں کو بتایا کہ اب تک دستیاب ووٹنگ ریکارڈز کے جائزے سے واضح طور پر ظاہر ہوتا ہے کہ اگلی صدر ’’ایڈمنڈو گونزالیز اُروتیا‘‘ ہی ہے، جن کے راستے میں مادورو کی عدالتوں نے روڑے اٹکائے۔

    دوسری طرف وینزویلا نے ارجنٹائن، کوسٹاریکا، پیرو، پاناما اور یوروگوئے سے سفارتی تعلقات منقطع کر دیے ہیں، اور لاطینی امریکی ممالک سے اپنے سفارت کاروں کو بھی واپس بلانے کا فیصلہ کر لیا ہے۔ مادورو نے بین الاقوامی تنقید اور نتائج کے بارے میں شکوک و شبہات کو مسترد کرتے ہوئے دعویٰ کیا کہ وینزویلا ایک ’’فاشسٹ ‘‘ نوعیت کی ’’بغاوت‘‘ کی کوشش کا ہدف تھا۔

  • وینزویلا ہائی وے پر خوفناک تصادم، 16 افراد ہلاک

    وینزویلا ہائی وے پر خوفناک تصادم، 16 افراد ہلاک

    جنوبی امریکی ملک وینزویلا کے ہائی وے پر گاڑیوں کے درمیان خطرناک تصادم کے نتیجے میں 16 افراد لقمہ اجل بن گئے۔

    بین الاقوامی خبر رساں ادارے کی رپورٹ کے مطابق یہ واقعہ وینزویلا کے گران ماریسکل ڈی آیا کوچو ہائی وے پر پیش آیا۔

    انتظامیہ کا اس حوالے سے کہنا ہے کہ ہائی وے پر پہلے سے پیش آئے حادثے کی وجہ سے گاڑیاں سڑک پر ٹھہری ہوئی تھیں اور ہائی وے کے کلیئر ہونے کا انتظار کر رہی تھیں کہ اچانک تیز رفتار ٹرالر انتظار کرتی گاڑیوں پر چڑھ دوڑا۔

    انتظامیہ کا کہنا ہے کہ حادثے کے نتیجے میں 17 گاڑیوں کو نقصان پہنچا اور دیکھتے ہی دیکھتے گاڑیوں میں آگ کے شعلے بھڑک اُٹھے۔

    چیف فائر آفیسر جوآن گونزالیز کا کہنا ہے کہ اطلاع ملتے ہی فائر بریگیڈ کی گاڑیوں نے موقع پر پہنچ کر آگ بجھانے اور ریسکیو کے عمل میں حصہ لیا اور آگ پر قابو پایا۔

    دو دن سے لاپتہ دسویں جماعت کی طالبہ کی جلی ہوئی لاش بر آمد

    انتظامیہ کا کہنا ہے کہ حادثے کے نتیجے میں 16 افراد ہلاک اور 6 افراد زخمی ہوئے ہیں زخمیوں کی حالت تشویشناک بتائی جارہی ہے۔

  • سب سے سستا پٹرول کس ملک میں؟ قیمت جان کر آپ حیران رہ جائیں گے

    سب سے سستا پٹرول کس ملک میں؟ قیمت جان کر آپ حیران رہ جائیں گے

    پاکستان سمیت دنیا بھر میں ایندھن کی قیمتوں سے لوگ چیخ رہے ہیں، تاہم ایک ملک ایسا ہے جہاں اس وقت سب سے سستا پٹرول دستیاب ہے۔

    رپورٹس کے مطابق دنیا بھر میں سب سے سستا پٹرول اس وقت جنوبی امریکی ملک وینزویلا میں ملتا ہے، جہاں فی لیٹر پٹرول کی قیمت پاکستانی روپوں میں ساڑھے 4 روپے ہے۔

    دوسری طرف دنیا میں سب سے مہنگا پٹرول اس وقت ہانگ کانگ میں دستیاب ہے، جہاں فی لیٹر پٹرول 588 روپے 71 پیسے میں دستیاب ہے۔

    پاکستان کے پڑوسی ملک ایران میں بھی اس وقت ایندھن بہت سستا ہے، ایک لیٹر پٹرول 10 روپے 74 پیسے میں مل رہا ہے، شام میں پٹرول فی لیٹر 57 روپے میں دستیاب ہے، جب کہ ملائیشیا میں فی لیٹر پٹرول 94 روپے میں فروخت ہو رہا ہے۔

    تیل کے ذخائر سے مالا مال قطر میں بھی یہ قیمت 116 روپے فی لیٹر تک پہنچ چکی ہے، سعودی عرب میں ایک لیٹر پٹرول 125 روپے میں فروخت ہو رہا ہے، دبئی سمیت عرب امارات میں یہ قیمت 194 روپے تک پہنچ چکی ہے۔ افغانستان میں بھی پٹرول مہنگا ہے، فی لیٹر کی قیمت 173 روپے سے زائد ہے، امریکا میں یہ قیمت 252 روپے فی لیٹر سے اوپر جا چکی ہے، بنگلا دیش میں 202 روپے فی لیٹر ہے، چین میں 281 روپے مل رہا ہے۔

    بھارت میں ایک لیٹر پٹرول 270 روپے میں فروخت ہو رہا ہے، نیوزی لینڈ میں پٹرول 401 روپے فی لیٹر خریدا جا رہا ہے، برطانیہ میں 424 روپے فی لیٹر ہو چکا ہے۔

  • کیا موسیقی جرائم کا راستہ روک سکتی ہے؟

    کیا موسیقی جرائم کا راستہ روک سکتی ہے؟

    یہ وینزویلا کی اس ہمہ جہت شخصیت کا تذکرہ ہے جو فنونِ لطیفہ کو سماج میں تبدیلی لانے کا مؤثر ذریعہ مانتے تھے۔

    انھوں نے اپنے وطن میں موسیقی کے ذریعے تبدیلی کا آغاز کیا اور خاص طور پر نوجوانوں کو اس طرف راغب کیا۔

    ہم بات کررہے ہیں Jose Antonio Abreu کی جو وینزویلا میں تعلیم، اقتصادیات، سیاست سمیت آرٹ کے مختلف شعبوں کا اہم اور روشن حوالہ ہیں اور 2018 میں آج ہی کے دن اس دنیا سے رخصت ہوئے تھے۔

    انھیں اپنے فلسفے اور نظریات کے علاوہ سماجی خدمات کے حوالے سے دنیا بھر میں پہچانا جاتا ہے۔

    وہ 1939 میں پیدا ہوئے۔ انھوں نے وینزویلا میں لگ بھگ تیس برس قبل سماجی برائیوں اور سنگین نوعیت کے جرائم کی روک تھام کے لیے موسیقی کی مدد لینے کا ایک نظریہ پیش کیا۔ ان دنوں ملک میں ہر طرف قتل و غارت گری اور نوجوان منشیات کے عادی تھے۔ بدامنی، کرپشن کے علاوہ گینگ وار میں روزانہ ہلاکتوں کا سلسلہ جاری تھا۔

    حکومت کو قائل کرتے ہوئے انھوں نے ملک میں دو برس کی عمر سے بچوں کو مفت موسیقی سکھانے کا سلسلہ شروع کیا۔

    اس طریقہ تعلیم میں سماج کو مرکزی اہمیت حاصل تھی اور ایسی کلاسوں میں بچوں کو ایک دوسرے کا احترام اور باہمی تعاون کا درس بھی دیا جاتا۔ رفتہ رفتہ حالات بہتر ہوئے اور آج بھی وینزویلا میں موسیقی کو مثبت تبدیلیوں اور صحت مند معاشرے کی تشکیل میں اہم خیال کیا جاتا ہے۔

    (تلخیص و ترجمہ: عارف عزیز)

  • وینزویلا پر نئی امریکی پابندی، حکومت نے اپوزیشن سے مذاکرات منسوخ کردیے

    وینزویلا پر نئی امریکی پابندی، حکومت نے اپوزیشن سے مذاکرات منسوخ کردیے

    کراکس: امریکا کی جانب سے وینزویلا پر نئی پابندیاں عاید کرنے کے ردعمل میں حکومت نے اپوزیشن سے ہونے والے مذاکرات منسوخ کردیے۔

    تفصیلات کے مطابق وینزویلا کے صدر نکلولاس مادورو نے اپوزیشن لیڈر جون گائیڈو سے مذاکرات مسنوخ کردیے اور ذمے دار امریکا کو قرار دیا ہے۔

    غیر ملکی خبر رساں ادارے کے مطابق دو روز قبل امریکا نے وینزویلا حکومت کے امریکا میں موجود اثاثے منجمد کرنے کا حکم دیا تھا اور ساتھ ہی وینزویلا حکومت کو تمام ادائیگیوں کا سلسلہ بھی روک دیا تھا۔

    جس کے ردعمل میں وینزویلا کے صدر نے اپوزیشن رہنماؤں سے ملاقات اور مستقبل سے متعلق ممکنہ لائحہ عمل ختم کرنے کا اعلان کردیا، یہ مذاکرات ناروے کی کوششوں سے ہو رہے تھے۔

    مذکورہ پابندیوں کے علاوہ امریکا نے روس اور چین سمیت دیگر ممالک کوتنبیہ کی ہے کہ وہ وینزویلا کے صدر نکولس کی حکومت کے ساتھ تجارتی روابط رکھنے سے گریز کریں۔

    امریکا نے وینزویلا سے تجارت کرنے والے ممالک کو خبردار کردیا

    یاد رہے کہ امریکا صدر نکولس مدورو کی حکومت کو تسلیم نہیں کرتا جو گزشتہ سال ہونے والے انتخابات کے بعد صدر منتخب ہوئے تھے امریکانے ان انتخابات کو دھاندلی زدہ قرار دے دیا تھا۔

    خیال رہے کہ امریکا کے قومی سلامتی کے مشیر جان بولٹن ان دنوں جنوبی امریکا کے ملک پیرو کے دارالحکومت لیما میں موجود ہیں جہاں وہ وینزویلا کے مسئلے کے حل کے لئے بلائے گئے 60 ممالک کے اجلاس میں شرکت کر رہے ہیں۔

  • امریکا نے وینزویلا سے تجارت کرنے والے ممالک کو خبردار کردیا

    امریکا نے وینزویلا سے تجارت کرنے والے ممالک کو خبردار کردیا

    لیما:امریکا نے روس اور چین سمیت دیگر ممالک کوتنبیہ کی ہے کہ وہ وینزویلا کے صدر نکولس کی حکومت کے ساتھ تجارتی روابط رکھنے سے گریز کریں۔

    تفصیلات کے مطابق ایک روز قبل امریکاکے صدر ڈونلڈ ٹرمپ بھی امریکہ میں موجود وینزویلا کے اثاثے منجمد کر چکے ہیں،خیال رہے کہ امریکہ صدر نکولس مدورو کی حکومت کو تسلیم نہیں کرتا جو گزشتہ سال ہونے والے انتخابات کے بعد صدر منتخب ہوئے تھے امریکانے ان انتخابات کو دھاندلی زدہ قرار دے دیا تھا۔

    امریکا کے قومی سلامتی کے مشیر جان بولٹن ان دنوں جنوبی امریکہ کے ملک پیرو کے دارالحکومت لیما میں موجود ہیں جہاں وہ وینزویلا کے مسئلے کے حل کےلئے بلائے گئے 60 ممالک کے اجلاس میں شرکت کر رہے ہیں۔

    اپنے خطاب میں جان بولٹن نے کہا کہ ہم ایسے ممالک کو تنبیہ کرتے ہیں جو نکولس مدورو کی حکومت کے ساتھ تجارتی روابط رکھنے کے خواہشمند ہیں۔

    جان بولٹن نے کہاکہ ہم امید کرتے ہیں کہ کوئی بھی ملک وینزویلا کی بدعنوان اور کمزور حکومت کے ساتھ تجارت کے عوض امریکا کے ساتھ اپنے تجارتی مفادات کو خطرے میں نہیں ڈالے گا۔

    اقوام متحدہ کی ایک رپورٹ کے مطابق وینزویلا کے 3 کروڑ سے زائد شہریوں کو امداد کی ضرورت ہے جبکہ بحران کے باعث لگ بھگ 33 لاکھ شہری ملک چھوڑ چکے ہیں۔

  • وینزویلا ایک بار پھر تاریکی میں ڈوب گیا

    وینزویلا ایک بار پھر تاریکی میں ڈوب گیا

    کراکس: وینزویلا کا ایک بڑا حصہ ایک مرتبہ پھر تاریکی میں ڈوب گیا ہے، یہ رواں سال کا ملک بھر میں چوتھا بلیک آؤٹ ہے۔

    تفصیلات کے مطابق وینزویلا پھر تاریکی میں ڈوب گیا ہے، مقامی ذرایع ابلاغ نے بتایا ہے کہ گزشتہ روز بجلی چلے جانے سے دارالحکومت کراکس سمیت کئی صوبے متاثر ہوئے ہیں۔

    ملکی وزیر اطلاعات خورگے روڈریگز کے بقول ایک ’الیکٹرو میگنیٹک‘حملے کی وجہ سے بجلی اچانک چلی گئی۔

    خیال رہے کہ اس لاطینی امریکی ملک میں توانائی کے مسائل کوئی نہیں بات نہیں ہیں، رواں برس مارچ میں بھی ملک کے ایک بڑے حصے کو بجلی کی فراہمی منقطع ہو گئی تھی۔

    وینزویلا کے حکام کا کہنا ہے کہ یہ دشمن کی جانب سے کیا جانے والا الکٹرو میگنیٹک حملہ ہے۔ بلیک آؤٹ کے باعث ملک کے 94 فی صد علاقے میں ٹیلی کمیونی کیشنز انفرا اسٹرکچر بھی متاثر ہوا، انٹرنیٹ بھی صرف دس فی صد حصے میں چل رہا ہے۔

    یہ بھی پڑھیں:  وینزویلا کے صدر نے اقوام متحدہ کی رپورٹ مسترد کردی

    ملک بھر میں تمام سرکاری کام بھی ٹھپ ہو کر رہ گئے ہیں، تعلیمی سرگرمیاں رک چکی ہیں جب کہ کراکس میں میٹرو بھی رک چکی ہے۔

    رواں سال پہلی بار وینزویلا میں 7 مارچ کو بجلی کی ترسیل منقطع ہوئی تھی جو ایک ہفتے تک جاری رہی، دوسری بار یہ لوڈ شیڈنگ 25 مارچ کو ہوئی اور 2 دن تک جاری رہی۔

    صدر نکولس مادورو کا دوسری مرتبہ لوڈ شیڈنگ سے متعلق کہنا تھا کہ یہ ملک کے ایک بڑے حصے کو بجلی فراہم کرنے والے ہائیڈرو الیکٹرک پاور پلانٹ ’گوری‘ کے ترسیلی یونٹ آتش زدگی کی وجہ سے ہوئی ہے۔

    انھوں نے کہا کہ یہ کارروائی ایک ماہر نشانے باز کی تھی، جس نے یونٹ پر فائرنگ کی اور اس سے آگ لگ گئی۔

    وینزویلا میں تیسری بار لوڈ شیڈنگ 29 سے 30 مارچ کو ہوئی، جس کے بعد ملک میں 30 روزہ پلان کا اعلان کیا گیا، حکومت کی جانب سے الیکٹرک انفراسٹرکچر کی ذمہ دار کمپنی کی تشکیل نو کا بھی فیصلہ کیا گیا۔

  • وینز ویلا کے جنگی طیارے کا عالمی فضائی حدود میں امریکی جہاز کا جارحانہ تعاقب

    وینز ویلا کے جنگی طیارے کا عالمی فضائی حدود میں امریکی جہاز کا جارحانہ تعاقب

    واشنگٹن : امریکی فوج نے مؤقف اختیار کیا ہے کہ امریکی طیاروں کا پچھا کرنا وینز ویلا کے صدر نیکولس مادورو کے باغیانہ طرز عمل کا کھلا ثبوت ہے۔

    واشنگٹن(این این آئی)امریکی حکام نے بتایا ہے کہ وینز ویلا کے ایک جنگی طیارے نے امریکی انٹیلی جنس طیارے کا کیریبین سمندر کے علاقے میں عالمی فضائی حدود میں پرواز کے دوران جارحانہ انداز میں تعاقب کیا، یہ واقعہ دونوں ملکوں کے درمیان جاری کشیدگی میں اضافے کا واضح ثبوت بتایا جا رہا ہے۔

    امریکی فوج کی سدرن کمانڈ کی طرف سے جاری ایک بیان میں بتایا گیا کہ عالمی فضائی حدود میں وینز ویلا کے جنگی طیارے کاہمارے جہاز کا پچھا کرنا وینز ویلا کے صدر نیکولس مادورو کے باغیانہ طرز عمل کا کھلا ثبوت ہے۔

    غیر ملکی خبر رساں ادارے کا کہناتھا کہ وینز ویلا امریکا پر بین الاقوامی قوانین کو پامال کرنے کا الزام عائد کرتا ہے مگر اس کے طیارے عالمی فضائی حدود میں بھی امریکی طیاروں کا پیچھا کرتے ہیں۔

    امریکی حکام کا کہنا تھا کہ امریکا کا ایک طیارہ اے بی3 جو متعدد نوعیت کے مشن پر تھا کا عالمی فضائی حدود سے گذرتے ہوئے وینز ویلا کے سو۔30 طیارے نے تعاقب کیا، امریکا اس اقدام کو وینز ویلاکی طرف سے جہاز اور اس کے عملے کو خطرے میں ڈالنے کی کوشش قرار دیتا ہے۔

    دوسری طرف وینز ویلا کے وزیر دفاع ولادی میر باڈرینو لوبیز نے دعویٰ کیا گیا ہے کہ امریکا ایک جنگی جہاز کسی پیشگی اطلاع کے بغیر وینز ویلا کی فضائی حدود میں گھس آیا تھا۔

    ان کا کہنا تھا کہ امریکی جہاز نے وینز ویلا کے مرکزی ہوائی اڈے کی کمرشل پروازوں کوخطرے میں ڈال دیا تھا۔