ARYNews.tv | Urdu – Har Lamha Bakhabar

Tag: ویڈیو

  • ایف بی آر نے ٹیکس گوشوارے جمع کرانے کے طریقہ کار پر ویڈیو جاری کردی

    ایف بی آر نے ٹیکس گوشوارے جمع کرانے کے طریقہ کار پر ویڈیو جاری کردی

    اسلام آباد: فیڈرل بورڈ آف ریونیو ( ایف بی آر) نے ٹیکس گوشوارے جمع کرانے کے طریقہ کار پر ویڈیو جاری کردی، ویڈیو سے ٹیکس گزار سالانہ گوشوارے آسانی سے داخل کر سکتے ہیں۔

    تفصیلات کے مطابق فیڈرل بورڈ آف ریونیو ( ایف بی آر) نے سماجی رابطے کی ویب سائٹ ٹویٹر پر ٹیکس گوشوارے جمع کرانے کے طریقہ کار پر ویڈیو جاری کردی۔ سالانہ گوشوارے داخل کرنے کی ویڈیوز 6 حصوں پر مشتمل ہیں۔

    ایف بی آر کے مطابق ویڈیوزکا مقصد ہے ٹیکس گزاروں کو کوئی دقت نہ ہو، ویڈیو ویب سائٹ، سوشل میڈیا اکاؤنٹس پر بھی اپلوڈ کردی گئی۔ فیڈرل بورڈ آف ریونیو کا کہنا ہے کہ ویڈیو میں ٹیکس ریفنڈ کا طریقہ سہل انداز میں بتایا گیا ہے، ویڈیو سے ٹیکس گزار سالانہ گوشوارے آسانی سے داخل کرسکتے ہیں۔

    یاد رہے کہ رواں سال ستمبر میں ایف بی آر نے ملک میں تنخواہ دار طبقے کی رہنمائی کے لیے ایک ایپ تیار کی جس کت تحت ایک عام تنخواہ دار آدمی بھی اپنے ٹیکس کی معلومات، ٹیکس کی ادائیگی اور دیگر تفصیلات اسمارٹ فون پر وصول کرسکے گا۔

    چیئرمین ایف بی آر شبر زیدی کا کہنا تھا کہ اس ایپ کے ذیعے تنخواہ دار طبقہ نہ صرف ٹیکس فائل کرسکے گا بلکہ اس سے متعلق دیگر معلومات بھی حاصل کرسکے گا، یہ ٹیکس نظام میں عملی طور پر مکمل ڈیجیٹلائزیشن کی سمت ایک قدم ہے۔

  • ٹویلٹ پیپر کھانے والے کینگروز

    ٹویلٹ پیپر کھانے والے کینگروز

    سڈنی: آسٹریلیا میں کینگروز کی ویڈیو سوشل میڈیا پر وائرل ہو رہی ہے جس میں دیکھا جا سکتا ہے کہ دو کینگروز سیاحتی ریزورٹ کے بیت الخلا میں ٹویلٹ پیپر کھا رہے ہیں۔

    آسٹریلیا کا نام آئے اور کینگروز ذہن میں نہ آئے ایسا ممکن نہیں ہے اور یہی وجہ ہے کہ سیاح کینگروز کی دلچسپ وعجیب حرکتوں کا مظاہرہ دیکھنے کے لیے آسٹریلیا کا رخ کرتے ہیں لیکن برطانوی جوڑے نے کینگروز کو جو حرکتیں کرتے دیکھا شاید آپ نے پہلے نہ دیکھا ہو۔

    برطانوی سیاح اپنی گرل فرینڈ کے ساتھ گھومنے کے بعد جب ریزورٹ واپس آیا تو بیت الخلا میں کینگروز کو دیکھ کر حیران رہ گیا، کینگروز ٹویلٹ پیپر کھانے میں مصروف تھے۔


    برطانوی سیاح نے بتایا کہ یہ ایک غیر حقیقی تحربہ ہونے کے ساتھ مضحکہ خیز تجربہ بھی تھا۔ انہوں نے بتایا کہ کینگروز کو ریزورٹ کے آس پاس گھومتے ہوئے دیکھا گیا تھا اور وہ انسانوں کے آس پاس ہونے کی وجہ سے زیادہ پریشان نہیں تھے۔

    برطانوی سیاح کا کہنا تھا کہ مجھے لگتا ہے کینگروز کھانے کی تلاش میں آئے تھے اور انہیں ٹویلٹ پیپر نظر آئے جسے انہوں نے کھانا شروع کردیا۔

    کیا آپ نے کینگرو کو تیرتے دیکھا ہے؟ نہیں تو ویڈیو دیکھیں

    یاد رہے کہ گزشتہ دنوں آسٹریلیا میں ایک کینگرو کی ویڈیو سوشل میڈیا پر وائرل ہوئی تھی جس میں ریسکیو کیے جانے والا کینگرو دوبارہ جھیل میں چھلانگ لگا دیتا ہے۔

  • ایران میں افغانی پناہ گزین بچّے پر تشدد کی ویڈیو سوشل میڈیا پر وائرل

    ایران میں افغانی پناہ گزین بچّے پر تشدد کی ویڈیو سوشل میڈیا پر وائرل

    تہران :ایرانی شہر میں افغانی پناہ گزین بچے پر بلدیہ اہلکار کے تشدد کی ویڈیو منظر عام پر آگئی، وڈیو میں بچے مار پیٹ کا نشانہ بنتے ہوئے دیکھا جاسکتا ہے۔

    تفصیلات کے مطابق ایران میں بوشہر صوبے کی ایک وڈیو منظر عام پر آئی ہے جس میں آبدان شہر کی بلدیہ کا ایک ملازم ایک افغان پناہ گزین بچے کو وحشیانہ طریقے سے مار لگاتے ہوئے نظر آ رہا ہے۔

    ایرانی ویب سائٹ پر جاری وڈیو میں مذکورہ اہل کار نے افغانی بچے پر اس لیے حملہ کیا کیوں کہ وہ خوانچہ فروشوں میں سے تھا، شہر کی بلدیہ دکان داروں کی جانب سے شکایات کے سبب سڑکوں پر خوانچہ فروشوں کے پھیلاؤ کو روک رہی ہے۔

    سوشل میڈیا پر وائرل ہونے والی وڈیو میں افغانی بچہ کئی منٹ تک شدید مار پیٹ کا نشانہ بنتے ہوئے نظر آ رہا ہے۔

    غیر ملکی خبر رساں ادارے کا کہنا تھا کہ عموما بلدیہ خوانچہ فروشوں کو پیشگی طور پر متنبہ کرتی ہے یا ان کا سامان ضبط کر لیتی ہے جب کہ اس بچے کے معاملے میں ایسا نہیں کیا گیا۔

    غیر ملکی میڈیا کا کہنا تھا کہ ایران میں تقریبا بیس لاکھ افغان پناہ گزین رہتے ہیں، عرب میڈیا نے دعویٰ کیا ہے کہ مذکورہ پناہ گزینوں کو کام کرنے اور تعلیم حاصل کرنے کی اجازت نہیں اور وہ اپنے بنیادی حقوق سے بھی محروم ہیں۔

    عرب خبر رساں ادارے نے دعویٰ کیا ہے کہ ایران ان افغانیوں میں سے ہزاروں کو بھرتی کر کے شام اور دیگر علاقوں میں جاری جنگوں میں بھیجتا ہے اور اس کے مقابل انہیں مالی رقوم اور مستقل قیام کی پیش کش کی جاتی ہے، بصورت دیگر انہیں جیل یا بے دخلی کا سامنا کرنا پڑتا ہے تاہم خبر رساں ادارے نے اپنے دعوے سے متعلق کوئی شواہد پیش نہیں کیے ہیں۔

    غیر ملکی خبر رساں ادارے کا کہنا تھا کہ ان پناہ گزینوں کی اکثریت کا تعلق شیعہ ہزارہ کمیونٹی سے ہے جن کے بارے میں ایرانی حکومت دعوی کرتی ہے کہ وہ ان کا دفاع کر رہی ہے،یہ لوگ افغانستان میں جنگ کے سبب فرار ہو کر امن اور سکون کی تلاش میں ایران پہنچے تھے۔

    ایران یہ دھمکی دے چکا ہے کہ اگر یورپی ممالک نے امریکی پابندیوں کو پامال کرتے ہوئے تہران کے ساتھ اقتصادی اور مالی معاملات نہ کیے تو وہ ان افغان پناہ گزینوں کو بے دخل کر دے گا۔ یہ اقدام پناہ گزینوں کی ایک نئی لہر کا موجب بن سکتا ہے۔

  • جس ویڈیو کا فرانزک ہونا ہے، وہ تو ن لیگ نے الماری میں رکھی ہوئی ہے: اعتزاز احسن

    جس ویڈیو کا فرانزک ہونا ہے، وہ تو ن لیگ نے الماری میں رکھی ہوئی ہے: اعتزاز احسن

    لاہور: پیپلز پارٹی کے سینئر رہنمااعتزاز احسن نے کہا ہے کہ اگر ویڈیو عدالت میں پیش نہیں کی جاتی، تو پھر میاں صاحب ن لیگ کے قیدی ہوں گے۔

    ان خیالات کا اظہار انھوں نے اے آر وائی نیوز کے پروگرام آف دی ریکارڈ میں گفتگو کرتے ہوئے کیے۔ انھوں نے کہا کہ فرانزک جس چیز کا ہونا ہے، وہ تو ن لیگ نے الماری میں رکھی ہوئی ہے۔

     اگر نوازشریف کی بےگناہی کا ثبوت آئے ہیں، تو ن لیگ کو بےچین ہونا چاہیے، ن لیگ کو چاہیے کہ وہ ثبوت فوری عدالت میں پیش کر دے۔

    انھوں نے کہا کہ نوازشریف کے لئےمریم اکیلی کھڑی ہے، اس کے بھائی بھی ساتھ چھوڑ گئے، میں سمجھتاہوں مریم بی بی بھی مس گائیڈ ہورہی ہیں،

    انھوں نے کہا کہ فرانزک اصل ویڈیو کا ہونا ہے، ویڈیو کے صرف کچھ حصے میڈیا پر دکھا گئے، شاہد خاقان نے یہ کیسے کہہ دیا کہ فرانزک ہوگئی، ویڈیو عدالت میں پیش ہی نہیں کی گئی، تو فرانزک کیسے ہوگیا۔

    مزید پڑھیں: ویڈیو پر عدلیہ کو نوٹس لینا چاہیے: اٹارنی جنرل انور منصور خان

    اعتزاز احسن نے کہا کہ میاں صاحب جوڈیشل آرڈرپرقید ہیں، انتظامی بنیاد پر رہا نہیں کیا جا سکتا، ویڈیو کا فرانزک ایفی ڈیوڈ کے ساتھ عدالت میں پیش ہوگا، تو ہی کچھ ہوسکتا ہے۔ ویڈیو میں موجود شخص اور ناصر بٹ کو عدالت میں پیش ہونا ہوگا، ویڈیو ایڈٹ کرنے والے کو بھی عدالت میں پیش ہوکرحلف اٹھانا ہوگا۔

    ان کا کہنا تھا کہ اس معاملے پر ہائی کورٹ کے پاس سوموٹو لینا کا اختیار نہیں ہے، عدالت میں ویڈیو پر پٹیشنرسمیت تمام لوگوں کےحلف نامےجمع ہوں گے۔

  • لگتا ہے جج ارشد ملک کی ویڈیوجعلی ہے، چیف جسٹس لاہورہائی کورٹ

    لگتا ہے جج ارشد ملک کی ویڈیوجعلی ہے، چیف جسٹس لاہورہائی کورٹ

    مانچسٹر: چیف جسٹس لاہور ہائی کورٹ جسٹس سردار شمیم خان کا کہنا ہے کہ ویڈیوصحیح ہے یا غلط اس کی انکوائری ہونی چاہیے۔

    تفصیلات کے مطابق مانچسٹر میں چیف جسٹس لاہورہائی کورٹ جسٹس سردارشمیم خان نے میڈیا سے گفتگو کرتے ہوئے کہا کہ لگتا ہے جج ارشد ملک کی ویڈیو جعلی ہے۔

    انہوں نے کہا کہ ویڈیو صحیح ہے یا غلط اس کی انکوائری ہونی چاہیے، اگروہ تسلیم کرلیتے تو اور بات تھی ہم ایکشن لیتے۔

    چیف جسٹس لاہور ہائی کورٹ جسٹس سردار شمیم خان نے مزید کہا کہ وائس ایکسپرٹ دیکھے گا یہ آواز ان کی ہے یا نہیں۔

    جج ارشد ملک نے مریم نواز کے الزامات کو بے بنیاد اورجھوٹا قراردے دیا

    یاد رہے کہ گزشتہ روز احتساب عدالت کے جج ارشد ملک نے پریس ریلیز کے ذریعے اپنے خلاف سامنے آنے والی مبینہ ویڈیو پر ردعمل دیتے ہوئے کہا تھا کہ میری ذات اورخاندان کی ساکھ متاثرکرنے کی سازش کی گئی۔

    احتساب عدالت کے معزز جج ارشد ملک نے مریم نوازکی پریس کانفرنس میں دکھائی گئی ویڈیو کو حقائق کے برعکس قرار دیا تھا۔

    معزز جج کی جانب سے جاری پریس ریلیز میں کہا گیا تھا کہ نوازشریف اور ان کے خلاف کے خلاف مقدمات کی سماعت کے دوران ان کے نمائندوں سے بارہا نہ صرف رشوت کی پیش کش کی گئی بلکہ تعاون نہ کرنے کی صورت میں سنگین نتائج کی دھمکیاں بھی دی گئیں جنہیں سختی سے رد کرتے ہوئے حق پر قائم رہنے کا عزم کیا۔

  • پریس ریلیزکے بعد دو مشکوک کرداروں کی حقیقت کھل کرسامنے آگئی، فردوس عاشق اعوان

    پریس ریلیزکے بعد دو مشکوک کرداروں کی حقیقت کھل کرسامنے آگئی، فردوس عاشق اعوان

    اسلام آباد: معاون خصوصی برائے اطلاعات ونشریات فردوس عاشق اعوان کا کہنا ہے کہ حکومت نے ویڈیواورآڈیو کے فرانزک آڈٹ کا فیصلہ کرلیا ہے، قانونی کارروائی کا آغازکریں گے۔

    تفصیلات کے مطابق اے آروائی نیوز سے بات چیت کرتے ہوئے معاون خصوصی برائے اطلاعات ونشریات فردوس عاشق اعوان نے کہا کہ پریس ریلیزکے بعد دومشکوک کرداروں کی حقیقت کھل کرسامنے آگئی، پریس ریلیزنے دونوں کرداروں کوبے نقاب کردیا ہے۔

    فردوس عاشق اعوان نے کہا کہ حکومت نے ویڈیو اورآڈیو کے فرانزک آڈٹ کا فیصلہ کرلیا ہے، اس کااعتراف کیا گیا کہ ویڈیو اور آڈیو کو جوڑا گیا ہے، قانونی کارروائی کا آغازکریں گے۔

    معاون خصوصی برائے اطلاعات ونشریات نے کہا کہ تمام معلومات عوام اورمیڈیا کے سامنے رکھی جائیں گی، یہ گروہ اورکرمنل مافیا منہ چھپاتا پھرے گا، ہم عوام سے کچھ نہیں چھپائیں گے۔

    فردوس عاشق اعون نے کہا کہ ایک قاتل اور غنڈہ گینگ کا سربراہ جبکہ دوسری کیلبری فونٹ کی معروف جعلساز ہے، یہ وہ کردار ہیں جو بے نامی دار ہیں۔

  • احتساب عدالت کے جج ارشد ملک نے مریم نواز کے الزامات کو بے بنیاد اورجھوٹا قراردے دیا

    احتساب عدالت کے جج ارشد ملک نے مریم نواز کے الزامات کو بے بنیاد اورجھوٹا قراردے دیا

    اسلام آباد: احتساب عدالت کے معزز جج ارشد ملک نے مریم نوازکی پریس کانفرنس میں دکھائی گئی ویڈیو کوحقائق کے برعکس قرار دے دیا۔

    تفصیلات کے مطابق احتساب عدالت کے جج ارشد ملک نے پریس ریلیز کے ذریعے اپنے خلاف سامنے آنے والی مبینہ ویڈیو پر ردعمل دیتے ہوئے کہا کہ میری ذات اورخاندان کی ساکھ متاثرکرنے کی سازش کی گئی۔

    معزز جج کی جانب سے جاری پریس ریلیز میں کہا گیا کہ نوازشریف اور ان کے خلاف کے خلاف مقدمات کی سماعت کے دوران ان کے نمائندوں سے بارہا نہ صرف رشوت کی پیش کش کی گئی بلکہ تعاون نہ کرنے کی صورت میں سنگین نتائج کی دھمکیاں بھی دی گئیں جنہیں سختی سے رد کرتے ہوئے حق پر قائم رہنے کا عزم کیا۔

    فاضل جج نے کہا کہ اگر دباؤ یا رشوت کی لالچ میں فیصلہ سناتا تو ایک مقدمے میں سزا اور دوسرے میں بری نہ کرتا، انصاف کرتے ہوئے شواہد کی بنا پر نوازشریف کو العزیزیہ کیس میں سزا اور فلیگ شپ کیس میں بری کیا۔

    انہوں نے کہا کہ مجھ پر بالواسطہ یا بلا واسطہ کوئی دباؤ نہیں تھا، مریم نواز کی پریس کانفرنس میں دکھائی گئی ویڈیو جعلی، جھوٹی اورمفروضوں پرمبنی ہے، اس ویڈیو میں ملوث افراد کے خلاف قانونی کارروائی کی جانی چاہیے۔

    احتساب عدالت کے جج نے کہا کہ گزشتہ روز مریم نواز کی جانب سے پریس کانفرنس میں مجھ پر سنگین الزامات لگائے گئے اور میری ذات اور میرے خاندان کی ساکھ کو متاثر کرنے کی سازش کی گئی۔

    معزز جج نے کہا کہ ناصربٹ اوراس کے بھائی سے وکالت کے دورکی پرانی شناسائی ہے انہوں نے مزید کہا کہ خدا کو حاضر ناظرجان کر قانون وشواہد کی بنیاد پرفیصلے کیے۔

    مریم نواز احتساب عدالت کے جج کی مبینہ ویڈیو سامنے لے آئیں

    یاد رہے کہ گزشتہ روز مسلم لیگ ن کی نائب صدر مریم نواز نے اپنے والد اور پارٹی قائد نوازشریف کے خلاف احتساب عدالت کے کیس میں جج ارشد ملک کی خفیہ کیمرے سے بنی مبینہ ویڈیو سامنے لائی تھیں۔

  • مریم نواز سیاسی بیانیہ بنانے کے لئے ویڈیوکو استعمال کررہی ہیں: بیرسٹر شہزاد اکبر

    مریم نواز سیاسی بیانیہ بنانے کے لئے ویڈیوکو استعمال کررہی ہیں: بیرسٹر شہزاد اکبر

    اسلام آباد: وزیر اعظم کے معاون خصوصی برائے احتساب بیرسٹر شہزاد اکبر نے کہا ہے کہ ویڈیو کا صحیح فورم عدالت ہے، پریس کانفرنس نہیں، مریم نواز ویڈیو کو  استعمال کر رہی ہیں۔

    ان خیالات کا اظہار انھوں نے ن لیگ کی پریس کانفرنس پر  اے آر وائی نیوز سے خصوصی گفتگو کرتے ہوئے کیا. ان کا کہنا تھا کہ ن لیگ کاایک عہدے دار جج کے گھرپربیٹھ کرکیا کررہا ہے.

    بیرسٹر شہزاد اکبر نے کہا کہ اگر اس نوع کی چیزیں‌ ہیں، تو خواجہ حارث کے ذریعے ہائی کورٹ لے جاتے، دیکھنا ہوگا کہ یہ ویڈیو کس وقت کی ہے.

    بیرسٹرشہزاداکبر نے کہا کہ اگر جج کے کردار پر سوال اٹھایا گیا ہے، تو ویڈیو کے فرق کو دیکھنا ہوگا، مریم صاحبہ کی پریس کانفرنس کا ماضی بھی ہے، مریم نوازنے جب ضمانت لینے کی کوشش کی، تو وہ مسترد ہوگئی.

    ان کا کہنا تھا کہ مریم نوازخود ضمانت پر ہیں، پریس کانفرنس اورجلسے بھی کررہی ہیں، آخر کب تک یہ کھیل رہے گا، ہمیں اپنے اداروں پر اعتماد کرنا چاہیے.

    مزید پڑھیں: ویڈیو ٹیپ کا فرانزک آڈٹ کرایا جائے گا: فردوس عاشق اعوان

    ان کا کہنا تھا کہ نشے کی حالت میں کسی سے بات اگلوانےکےاینگل کوبھی دیکھنا چاہیے، سیاسی بیانیہ بنانے کے لئے مریم نواز ویڈیوکو  استعمال کر رہی ہیں، ان کا بیانیہ کس کے خلاف استعمال کیا جارہا ہے.

    انھوں نے کہا کہ معاملہ عدالت میں لے کرجاتے، نئی پٹیشن فائل کرتے، فیصلے کچن میں نہیں بنتے، یہ عدالتوں میں بنتے ہیں.

  • شعیب ملک کی وائرل ہونے والی ویڈیو پر وضاحت

    شعیب ملک کی وائرل ہونے والی ویڈیو پر وضاحت

    لندن: قومی کرکٹر شعیب ملک کا کہنا ہے کہ 20 سال سے پاکستان کے لیے کرکٹ کھیل رہا ہوں، افسوس ہے ذاتی زندگی کے بارے میں وضاحتیں دینا پڑ رہی ہیں۔

    تفصیلات کے مطابق کرکٹر شعیب ملک نے سماجی رابطے کی ویب سائٹ ٹویٹر پر تمام کھلاڑیوں کی جانب سےعوام اور میڈیا سے درخواست کی کہ ہمارے خاندان سے متعلق احترام کو ملحوظ رکھیں۔

    شعیب ملک نے کہا کہ ہماری مرضی کے بغیرغیراہم معاملے میں نہ گھسیٹا جائے، ایساردعمل کسی طورصحیح نہیں ہے۔

    قومی کرکٹر شعیب ملک نے کہا کہ 20 سال سے پاکستان کے لیے کرکٹ کھیل رہا ہوں، افسوس ہے ذاتی زندگی کے بارے میں وضاحتیں دینا پڑ رہی ہیں۔

    انہوں نے کہا کہ سوشل میڈیا پر وائرل ویڈیو 13 جون کی ہے، 15 جون کی نہیں، اس سے قبل پی سی پی نے بھی کہا تھا کہ میچ کی رات کسی کھلاڑی نے کرفیو ٹائم کی خلاف ورزی نہیں کی۔

    دوسری جانب فاسٹ باؤلر محمد عامر نے بھی ٹویٹر پر اپنے پیغام میں کہا کہ شائقین پرفارمنس پر تنقید کرنے کا حق رکھتے ہیں مگر کھلاڑی کے لیے نازیبا الفاظ استعمال نہ کریں، ٹیم کم بیک ضرور کرے گی عوام کی سپورٹ کی ضرورت ہے۔

    یاد رہے کہ گزشتہ روز پی سی بی نے شعیب ملک اور دیگر کھلاڑیوں کی پاک بھارت میچ سے ایک رات قبل کرفیو ٹائم کی خلاف ورزی کی تردید کردی تھی۔

  • امریکا نے لبنان میں القدس بریگیڈ کے ٹریننگ سینٹر کی ویڈیو جاری کردی

    امریکا نے لبنان میں القدس بریگیڈ کے ٹریننگ سینٹر کی ویڈیو جاری کردی

    بیروت : امریکا نے لبنان میں القدس بریگیڈ کی تربیت گاہ کی ویڈیو جاری کردی، جہاں پرلوگوں کو گوریلا جنگ اور معمول کی جنگ کے منظرنامے کی ضروریات کے مطابق تربیت دی جاتی ہے۔

    تفصیلات کے مطابق امریکا کے محکمہ خارجہ نے لبنان میں ایران کی سپاہِ پاسداران انقلاب کے تحت القدس فورس کی ایک عسکری تربیت گاہ کی ویڈیو جاری کی ہے جہاں حزب اللہ اور عراق سے تعلق رکھنے والی ملیشیاؤں کے جنگجووں کو جدید اسلحہ چلانے اور حربی امور کی تربیت دی جارہی ہے۔

    محکمہ خارجہ نے عربی زبان میں ایک ٹویٹ میں اس تربیت گاہ کی لبنان میں موجودگی کا انکشاف کیا ہے۔ اس کی جاری کردہ ایک ویڈیو میں مرکز برائے تزویراتی اور بین الاقوامی مطالعات ( سی ایس آئی ایس) کے سینیر فیلو جوزف ایس برمودیز جونئیر ایک تصویر کی وضاحت کررہے ہیں۔

    غیر ملکی میڈیا کا کہنا تھا کہ یہ لبنان کی مشرقی سرحد پر واقع ایک تربیت گاہ کی تصویر ہے، انھوں نے وہاں کرائے جانے والے بکتر بند گاڑیوں سے متعلق ایک تربیتی کورس کی بھی وضاحت کی ہے۔

    سی ایس آئی ایس کے ایک سینیر مشیر سیٹھ جی جونز کا کہنا ہے کہ لبنان ایسے ملک میں ایران کے اس طرح کے فوجی اڈوں کی موجودگی کا مقصد اپنے مقامی اتحادیوں کی صلاحیت کار میں اضافہ کرنا ہے۔

    ایران میں بھی ایسی تربیت گاہیں موجود ہیں جہاں ان تمام مقامات سے تعلق رکھنے والے افراد کو عسکری تربیت کے لیے لایا جاسکتا ہے۔

    جوزف ایس برمودیز ایک تصویر کی وضاحت کرتے ہوئے یہ دعویٰ کرتے ہیں کہ یہ تہران کے نواح میں واقع امام علی تربیتی مرکز کی تصویر ہے۔

    ان کے بہ قول 2008ء تک اس کو ایک چھوٹی تربیت گاہ کے طور پر استعمال کیا جاتا رہا ہے لیکن اس وقت یہ ایک بہت بڑا تربیتی مرکز بن چکا ہے ،یہ اب پہلے کی نسبت زیادہ جامع اور زیادہ صلاحیتوں اور سہولتوں کا حامل ہے۔

    وہ یہ بھی کہتے ہیں مجموعی طور پر یہاں لوگوں کو گوریلا جنگ اور معمول کی جنگ کے منظرنامے کی ضروریات کے مطابق تربیت دی جاتی ہے۔

    یہاں فائرنگ کے اہداف (رینجز) موجود ہیں ۔یہاں نئے بھرتی کنندگان یا زیر تربیت جنگجوؤں کو حربی فنون سکھائے جاتے ہیں اور وہ مختلف جگہوں پر مقرر کردہ اہداف کو نشانہ بنانے کے لیے فائرنگ کرتے ہیں۔

    ویڈیو میں سیٹھ جی جونز یہ دعویٰ کرتے ہیں کہ ایران نے 1980ء کے عشرے میں عراق کے ساتھ جنگ میں جو بات تسلیم کی تھی ، یہ کہ وہ کبھی بڑی روایتی فوجی طاقت نہیں بن سکتا۔

    ان کا کہنا تھا کہ 2011ءسے 2019ء تک ہم نے سپاہ پاسداران انقلاب کے تحت القدس فورس کے ساتھ یمن ، شام ، عراق ، لبنان ، افغانستان ، پاکستان اور بحرین میں کام کرنے والی مزید ملیشائیں اور دوسرے جنگجو دیکھے ہیں۔

    ایران کے پاس زیادہ عسکری تربیت گاہیں کیوں ہیں کیونکہ اس نے زیادہ جنگجو وں کو تربیت کے لیے میدان میں اتارنا ہوتاہے۔