نئی دہلی: بھارتی محققین نے ایک ریسرچ کے بعد کہا ہے کہ کرونا ویکسین کی دونوں ڈوز موت سے 98 فی صد تحفظ فراہم کرتی ہیں۔
تفصیلات کے مطابق بھارتی ماہرین نے کہا ہے کہ کرونا وائرس ویکسین کی ایک ڈوز موت سے 92 فی صد تحفظ فراہم کرتی ہے، جب کہ دونوں ڈوز 98 فی صد تحفظ دیتی ہیں۔
اس سلسلے میں بھارتی حکومت کے اشتراک سے بھارت کے ایک میڈیکل انسٹیٹیوٹ نے ریاست پنجاب کے پولیس اہل کاروں پر ایک ریسرچ اسٹڈی کی، اس طبی مطالعے کے نتائج میں دیکھا گیا کہ جن پولیس اہل کاروں نے کرونا وائرس سے بچاؤ کے لیے ویکسین نہیں لگوائی تھی، ان میں اموات کی شرح زیادہ تھی۔
تحقیق کے نتائج کے مطابق کرونا وائرس ویکسین کی صرف ایک ڈوز لگوانے والے پولیس اہل کاروں میں اموات کی شرح کم دیکھنے کو ملی، جب کہ دونوں ڈوز لگوانے والے پولیس اہل کاروں کی اموات کی شرح انتہائی کم تھی۔
خیال رہے کہ دنیا بھر کے طبی ماہرین نے ریسرچ اسٹڈیز کے بعد یہ کہا ہے کہ ویکسینیشن سے کرونا انفیکشن کے باعث شدید بیماری، اسپتال داخلوں اور اموات کی شرح میں واضح طور پر کمی واقع ہوتی ہے۔
طبی ماہرین مختلف تحقیقی مطالعوں کی بنیاد پر عوام سے اپیل کرتے ہیں کہ وہ پر اعتماد ہو کر کرونا ویکسینیشن کروائیں، تاکہ اقوام پر بیماری اور لاگت کا بوجھ کم ہو جائے۔
