پیرس: ماحولیاتی تبدیلی سے متعلق فرانس میں منعقدہ عالمی کانفرنس کی ذیلی ملاقاتوں میں وزیراعظم نواز شریف نے افغان صدر اشرف غنی سے اہم ملاقات کی اوردہشت گردی کے خلاف ہرممکن تعاون کی یقین دہانی کرائی۔
دونوں سربراہوں کے درمیان پیرس میں ہونے والی اس ملاقات میں وزیراعظم نےافغان صدر کو یقین دہانی کرائی کہ پاکستان افغان حکومت کو ہی قانونی سمجھتاہے اور اس سے ہرممکن تعاون جاری رکھے گا۔
وزیراعظم نے ملاقات میں کہا کہ پاکستانی سرزمین کو دہشت گردی کیلئے استعمال نہیں ہونے دیں گے تاہم خطے میں مستقل قیام امن کے لئے افغان حکومت کاتعاون بھی درکارہے۔
انہوں نے یہ بھی کہا کہ افغانستان میں قیام امن کے لئے مذاکرات اورملٹری آپریشن دونوں آپشن موجود ہیں۔
وزیراعظم کا کہنا تھا کہ پاکستان افغانستان میں قیام امن کے لئے اہم کردار ادا کرتا رہا ہے اورکرتا رہے گا اور اس سلسلے میں آئندہ ہفتے اسلام آباد میں ہونے والی امن کانفرنس انتہائی اہم ہے۔
وزیراعظم نواز شریف نے اسلام آباد میں ہونے والی کانفرنس کی افتتاحی تقریب کے لئے افغانستان کے صدراشرف غنی کو پاکستان کا دورہ کرنے کی دعوت بھی دی۔
ملاقات میں برطانوی وزیراعظم ڈیوڈ کیمرون بھی موجود تھے۔
