اسلام آباد : وزیراعظم عمران خان کا کہنا ہے کہ دنیا کی طرح کورونا وائرس پاکستان کیلئے بھی بڑا چیلنج ہے، ٹائیگرز فورس مشکل وقت میں ملک کیلئے جہاد لڑے گی اور عوام میں آگاہی کیلئے اہم کردار ادا کرے گی۔
تفصیلات کے مطابق وزیراعظم عمران خان نے ٹائیگرز فورس کے رضاکاروں سے خطاب کرتے ہوئے کہا کہ ٹائیگرزفورس کے نوجوانوں کا شکریہ اداکرنا چاہتاہوں، دنیا کی طرح کورونا وائرس پاکستان کیلئےبھی بڑا چیلنج ہے ، لاک ڈاؤن جیساقدم پچھلے 100سال میں کسی ملک نہیں اٹھایا۔
وزیراعظم نے کہا کہ ملک میں سب سے بڑے مسئلے اس لاک ڈاؤن کی وجہ سے ہیں، لاک ڈاؤن کی وجہ سے نچلی سطح پر طبقہ بہت زیادہ متاثر ہے، برطانیہ جیسے ملک کے وزیراعظم نے والنٹیئر فورس کی اپیل کی، اسی طرح ٹائیگرز فورس رضاکارانہ طورپر ایڈمنسٹریشن کی مدد کرے گی۔
عمران خان کا کہنا تھا کہ دیہاڑی دار اور غریب طبقہ لاک ڈاؤن سے سب سےزیادہ متاثر ہوا ، ایڈمنسٹریشن اکیلے کچھ نہیں کرسکتی ، ٹائیگرزفورس مشکل وقت میں ملک کیلئے جہاد لڑےگی، ٹائیگرز فورس میں شمولیت اختیار کرنیوالوں کا مشکور ہوں۔
انھوں نے کہا کہ شوکت خانم اسپتال کینسر کے 75فیصد مریضوں کا مفت علاج کررہاہے ، مشکل وقت میں ملک کی مدد کیلئے ہم نےٹائیگرز فورس کو اکٹھا کیا، ہم نے اب ملک سے آہستہ آہستہ لاک ڈاؤن کو کھولنا ہے ، لاک ڈاؤن کھولیں گے تو لوگوں کو دوبارہ نوکریاں ملیں گی ، لاک ڈاؤن کھولنے کیلئے ایس اوپیز رکھ رہےہیں۔
وزیراعظم کا کہنا تھا کہ لوگوں نے ایس اوپیز پرعمل نہ کیا تو کوروناپھیلنے کا خدشہ بڑھ جائے گا اور ایس اوپیز پر عملدرآمد نہ ہونے پر دوبارہ لاک ڈاؤن کی طرف جانا پڑے گا۔
عمران خان نے کہا کہ ٹائیگرزفورس کو عوام کو ایس اوپیز سےمتعلق آگاہ کرنا ہوگا اور دکانیں،فیکٹریز،مساجد جانیوالوں کو ایس اوپیز بتانا ہونگے، عوام میں آگاہی کیلئے ٹائیگرزفورس اہم کردار ادا کرے گی ، میڈیکل فیلڈ سے تعلق رکھنےوالوں نے بھی ٹائیگرز فورس جوائن کی ہے۔
ان کا مزید کہنا تھا کہ سیالکوٹ میں ایک پائلٹ پراجیکٹ کیا جا چکا ہے ، پائلٹ پراجیکٹ کو بنیاد بنا کر ٹائیگر فورس کا بھرپور استعمال کیا جا سکتا ہے، ٹائیگرز فورس کا کام پیسے اکٹھاکرنا نہیں یہ رضاکارانہ فورس ہے۔
وزیراعظم نے کہا کہ ٹائیگرزفورس لاک ڈاؤن سے بیروزگارہونیوالوں کی رجسٹریشن کرائے گی ، یونین کونسل کےدفاتر میں بیروزگار لوگوں کی رجسٹریشن کرائی جائے گی، بیروزگاروں کو بھی احساس کیش پروگرام کی طرز پر رقم منتقل کی جائے گی۔
ذخیرہ اندوزوں کے حوالے سے عمران خان کا کہنا تھا کہ ذخیرہ اندوزی،منافع خوری قانون کے خلاف ہے ، ذخیرہ اندوزی کیخلاف ایکشن لینےکی ذمہ داری ایڈمنسٹریشن کی ہے، ٹائیگرز فورس ایڈمنسٹریشن کو ذخیرہ اندوزی کی نشاندہی کرسکتی ہے۔
