Tag: ٹائیگرز فورس ڈے

اسلام آباد: ملک بھر میں ٹائیگر فورس ڈے منانے کی تیاریاں شروع ہو گئی ہیں، وزیر اعظم نے اس سلسلے میں مشاورت کے لیے معاون خصوصی عثمان ڈار کو طلب کر لیا ہے۔

اے آر وائی نیوز کے مطابق ملک میں 1 کروڑ پودے لگانے کے لیے رضا کاروں کے تعاون پر مشاورت کے لیے وزیر اعظم نے عثمان ڈار کو ملاقات کے لیے بلا لیا ہے، وزیر اعظم عمران خان آج نوجوانوں کے لیے اہم پیغام بھی ریکارڈ کرائیں گے۔

دوسری طرف ٹائیگر فورس ایپلیکیشن میں گرین سیلفی کا فیچر متعارف کرا دیا گیا ہے، جس کے ذریعے پودا لگانے والا رضا کار شجر کاری مہم کی تصاویر اپلوڈ کر سکے گا، خصوصی دن پر رضا کار نوجوان 1 دن میں ریکارڈ 1 ملین (دس لاکھ) درخت لگائیں گے۔

وزیر اعظم سے ملاقات سے قبل پنجاب بیوروکریسی کا اہم مشاورتی اجلاس منعقد ہوا جس میں معاونین خصوصی عثمان ڈار، ملک امین اسلم اور چیف سیکریٹری پنجاب، صوبے کے کمشنرز، چیئرمین پنجاب انفارمیشن ٹیکنالوجی بورڈ اظفر منصور شریک ہوئے۔ اجلاس میں ٹائیگر فورس ڈے اور شجر کاری مہم کے حوالے سے بات چیت ہوئی۔

اجلاس میں ٹائیگر فورس ڈے کے سلسلےمیں انتظامات کا جائزہ بھی لیا گیا، یہ فیصلہ کیا گیا کہ ٹائیگر فورس ڈے پر بڑے پیمانے پر شجر کاری کے لیے تقریبات کا انعقاد ہوگا۔ عثمان ڈار کا کہنا تھا کہ شجرکاری مہم کے لیے رضا کاروں کی تعداد بڑھانے کے لیے موبائل فون ایپ سے رجسٹریشن چند روز میں کھول دی جائے گی۔