اسلام آباد: وزیراعظم عمران خان سے معاون خصوصی عثمان ڈار نے ملاقات کی اس موقع پر وزیراعظم کو ٹائیگرز فورس متحرک کیے جانے کے بعد پہلی رپورٹ پیش کی گئی۔
تفصیلات کے مطابق وزیراعظم نے ٹائیگر فورس سے متعلق رپورٹ پر اطمینان کا اظہار کیا۔ عثمان ڈار نے صوبائی حکومتوں کے تعاون اور اعدادو شمار پر بھی بریفنگ دی۔
عثمان بزدار کا کہنا تھا کہ رجسٹرڈنوجوان محنت اور لگن کے ساتھ ذمہ داریوں کو نبھا رہے ہیں، یوسی سطح پر ٹائیگرز فورس سے بیروزگار افراد کی رجسٹریشن میں بھی مدد ملی، صوبوں سے موصول رپورٹس تسلی بخش اور حوصلہ افزاء ہیں۔
وزیراعظم کورونا ریلیف ٹائیگرفورس کا کمال، مسلم لیگ ن کے ارکان بھی فورس میں شامل
اس موقع پر سندھ حکومت کی جانب سے عدم تعاون کی رپورٹ بھی وزیراعظم کو پیش کی گئی۔ بریفنگ میں کہا گیا کہ سندھ میں 1لاکھ 54 ہزار نوجوان رجسٹرڈ ہیں حکومت تعاون نہیں کر رہی۔
وزیراعظم نے معاون خصوصی کو صوبائی سطح پر کوآرڈینیشن جاری رکھنے کی ہدایت کردی۔ عمران خان کا کہنا تھا کہ نوجوانوں کو مرحلہ وار متحرک کرنے کا عمل بھی جاری رکھا جائے۔
خیال رہے کہ سندھ میں رجسٹرڈ نوجوانوں سے متعلق اہم فیصلہ ایک دو روز میں متوقع ہے۔
