Tag: ٹائیگر فورس

اسلام آباد: معاون خصوصی عثمان ڈار نے وزیراعظم عمران خان کو ٹائیگر فورس کی تازہ ترین رپورٹ پیش کر دی۔

تفصیلات کے مطابق وفاقی دارالحکومت اسلام آباد میں وزیراعظم عمران خان سے معاون خصوصی عثمان ڈار نے ملاقات کی۔ملاقات میں کرونا ریلیف ٹائیگر فورس کے آپریشنل معاملات پر مشاورت کی گئی۔

معاون خصوصی عثمان ڈار نے وزیراعظم عمران خان کو ٹائیگر فورس کی تازہ ترین رپورٹ پیش کی۔وزیراعظم نے رپورٹ پر اطمینان کا اظہار کرتے ہوئے فورس کو صوبائی سطح پر فوری متحرک کرنے کی ہدایت کی۔

وزیراعظم اور عثمان بزدار کے درمیان ہونے والی ملاقات میں ٹائیگرفورس کی لائیواپ ڈیٹ کو پبلک کرنے کا فیصلہ کیا گیا۔

کرونا وائرس کے خلاف جنگ طویل ہے ہم نے مل کر لڑنا ہے، وزیراعظم

یاد رہے کہ گزشتہ روز لاہور میں وزیراعظم عمران خان نے کرونا ریلیف ٹائیگر فورس کے رضاکاروں سے خطاب کرتے ہوئے کہا تھا کہ مشکل وقت میں کئی لوگ اوپر آجاتے ہیں اور کئی نیچے چلے جاتے ہیں،مشکل وقت میں عوام کے ساتھ کھڑے ہوئے تو وہ بھی آپ کے ساتھ کھڑے ہوں گے۔

عمران خان کا کہنا تھا کہ آپ کچھ بھی کرلیں مخالفین یہ ہی کہیں گے کچھ نہیں کیا،مخالفین کبھی سوشل ورک نہیں کریں گے کیونکہ کبھی کیا ہی نہیں، مخالفین نے کبھی سیاست سوشل ورک کے لیے کی ہی نہیں ہے۔

اسلام آباد: وزیراعظم عمران خان نے وزرائے اعلیٰ کو ٹائیگر فورس صوبائی سطح پر مانیٹر کرنے کی ہدایت کر دی۔

تفصیلات کے مطابق وفاقی دارالحکومت اسلام آباد میں وزیراعظم عمران خان کی زیر صدارت پی ٹی آئی کور کمیٹی کا اجلاس ہوا جس میں وزیراعظم نے کرونا کی صورت حال اور ملکی مجموعی حالات پر مشاورت کی۔

اجلاس میں وزیراعظم کے معاون خصوصی عثمان ڈار نے کرونا ریلیف ٹائیگر فورس کی تشکیل پر بریفنگ دی۔

اس موقع پر وزیراعظم کا کہنا تھا کہ موجودہ صورت حال کے پیش نظر تمام تر توجہ وائرس کی روک تھام پر مرکوز ہے، ملکی معیشت کو مدنظر رکھتے ہوئے بروقت اور درست فیصلے کرنے ہوں گے۔

وزیراعظم عمران خان کا کہنا تھا کہ عوامی نمائندے حلقوں میں عوامی ضروریات کا خاص خیال رکھیں۔انہوں نے وزرائے اعلیٰ کو ٹائیگر فورس صوبائی سطح پر مانیٹر کرنے کی ہدایت کر دی، ٹائیگر فورس کے آپریشنل معاملات صوبے خود دیکھیں گے۔

کرونا سے متعلق اعداد و شمار کسی صورت نہ چھپائے جائیں، وزیراعظم

اس سے قبل وزیراعظم عمران خان کی زیرصدارت قومی رابطہ کمیٹی کا اجلاس ہوا، اجلاس میں صوبوں کے وزرائے اعلیٰ، عسکری حکام سمیت وفاقی وزرا،چیئرمین این ڈی ایم اے بھی موجود تھے۔

وزیراعظم عمران خان کا کہنا تھا کہ کرونا سے متعلق اعدادوشمار کسی صورت نہ چھپائے جائیں، معلومات چھپانا قومی سلامتی خطرے میں ڈالنے کے مترادف ہوگا۔

اسلام آباد: وفاقی وزیر تعلیم شفقت محمود کا کہنا ہے کہ ٹائیگر فورس پی ٹی آئی کی نہیں پاکستان کی فورس ہوگی۔

تفصیلات کے مطابق اے آروائی نیوز کے پروگرام پاور پلے میں گفتگو کرتے ہوئے وفاقی وزیر تعلیم شفقت محمود نے کہا کہ ٹائیگر فورس کے لیے پورٹل بنایا جائےگا، پورٹل میں جا کر کوئی بھی ٹائیگر فورس کے لیے رجسٹرڈ ہوسکتا ہے۔

شفقت محمود کا کہنا تھا کہ ٹائیگر فورس پی ٹی آئی کی نہیں پاکستان کی فورس ہوگی۔ وفاقی وزیر نے کہا کہ رقم کی تقسیم ارکان اسمبلی نہیں کریں گے، انتظامیہ پیسوں کی تقسیم کرےگی ایم این ایز،ایم پی ایز نہیں کریں گے۔

وفاقی وزیر تعلیم کا مزید کہنا تھا کہ 50 فیصد آبادی کے پاس کھانے کو نہ ہو تو لاک ڈاؤن کیسے ہوسکتا ہے۔

کرونا سے جنگ: وزیراعظم کا ریلیف فنڈ کے قیام اور ٹائیگرفورس بنانے کا اعلان

اس سے قبل وزیراعظم عمران خان نے قوم سے خطاب کے دوران کرونا سے لڑ نے کے لیے ریلیف فنڈ کے قیام اور ٹائیگر فورس بنانے کا اعلان کیا تھا۔ وزیراعظم کا کہنا تھا کہ یہ فورس فوج اور انتظامیہ کے ساتھ مل کر کام کرےگی، جن علاقوں کو لاک ڈاؤن کریں گے ٹائیگر فورس کے رضا کار وہاں راشن پہنچائیں گے۔

عمران خان کا کہنا تھا کہ کرونا وائرس کے خلاف جنگ وسائل سے نہیں جیتی جاسکتی،کرونا وائرس کے خلاف جنگ متحد ہو کر حکمت سے جیتی جاسکتی ہے، وسائل نہ ہونےکی وجہ سے ٹائیگر فورس کو استعمال کریں گے۔