Tag: ٹارگٹ کلرز گرفتار

کراچی : ایس آئی یو نے سعیدآباد میں کامیاب کارروائی کرکے چار ٹارگٹ کلرز گرفتار کرلیے، ملزمان کا تعلق گینگ وار بابا لاڈلہ گروپ سے ہے، ملزمان قتل کے علاوہ منشیات فروشی میں بھی ملوث ہیں۔

تفصیلات کے مطابق اسپیشل انویسٹی گیشن یونٹ (ایس آئی یو) نے سعید آباد سے چار خطرناک ملزمان کو حراست میں لے کر اسلحہ برآمد کرلیا، ایس ایس پی ایس آئی یو طارق دھاریجو نے صحافیوں کو بتایا کہ ملزمان مہلک نشہ کرسٹل اور ہیروئن کے کاروبار میں بھی ملوث ہیں۔

ملزمان میں فرحان عرف کلاشنکوف، سجاد عرف بھرم، عدیل اور شہروز شامل ہیں، گینگ وار ملزمان قتل، رہزنی اور جرائم کی متعدد وارداتوں میں ملوث ہیں۔

ایس ایس پی ایس آئی یو کے مطابق گرفتار ہونے والے گینگ وار بابا لاڈلا گروپ کے ٹارگٹ کلرز نے اہم انکشافات کیے ہیں، دوران تفتیش ملزمان نے دو افراد کے قتل کا اعتراف کیا ہے۔

ملزمان نے45 ہزار روپے کے تنازعہ پر اپنے ساتھی کو اور مخبری کے شبے میں قانون نافذ کرنے والے ادارے کےایک اہلکار کی جان لی۔

ملزم شہروز نے قانون نافذ کرنے والے ادارے کے مخبر کو گلشن مزدور میں قتل کیا، فقیر کالونی میں رقم کے تنازعے پر اپنے ساتھیوں کے ہمراہ اپنے ہی ساتھی کو قتل کیا، ملزمان نے مجرمانہ کارروائیوں کے لیے شہریوں سے دو125 موٹرسائیکلیں چھینی تھی۔

ایس ایس پی طارق دھاریجو نے مزید بتایا کہ ملزمان کے قبضے سے 4 ٹی ٹی پستول اور دونوں مسروقہ موٹرسائیکلیں برآمد کی گئی ہیں، ملزمان سے مزید تفتیش جاری ہے۔

اس موقع پر ملزم نے بتایا کہ مخبر روزانہ ہمارے گھروں پر چھاپے پڑوارہا تھا، اسی کی مخبری پر ہم گرفتار بھی ہوئے اس لیے اسے قتل کردیا۔

ملزم شہروز نے بتایا کہ حب سے کرسٹل ( منشیات) لاکرعنایت اللہ کو دیتا تھا جسے وہ کراچی میں فروخت کردیتا تھا، منشیات کے45ہزار روپے ا س پر بقایا تھے، نہ دینے پرعنایت اللہ کو قتل کیا۔