کراچی: شہر قائد کے علاقے مبینہ ٹاؤن میں اسکاؤٹ کالونی میں مسجد کے باہر ٹارگٹ کلنگ کا شکار بننے والے شہری شیر خان سے متعلق معلوم ہوا ہے کہ وہ ایک ماہ قبل ہی سعودیہ سے لوٹے تھے، شیر خان کے قتل کا مقدمہ بھی درج کر لیا گیا ہے۔
تفصیلات کے مطابق پولیس نے مبینہ ٹاؤن اسکاؤٹ کالونی میں جامعہ مسجد و مدرسے کے باہر فائرنگ سے شہری شیر خان کے جاں بحق ہونے اور چوکیدار کے زخمی ہونے کا مقدمہ درج کر لیا ہے۔
رشتہ داروں کا کہنا ہے کہ مقتول شہری شیر خان ایک بیٹے کا باپ تھا اور ایک ماہ قبل ہی سعودیہ سے وطن واپس آیا تھا، اس کی کسی سے کوئی دشمنی نہیں تھی، نماز کی ادائیگی کے بعد مسجد کے باہر بیٹھا ہوا تھا کہ نامعلوم مسلح ملزمان نے آ کر اندھا دھند فائرنگ کر دی، جس سے شیر خان جاں بحق اور مسجد کا چوکیدار زخمی ہو گیا۔
پولیس حکام کا کہنا ہے کہ مقتول کو جسم کے مختلف حصوں پر 4 سے 5 گولیاں لگیں، پولیس نے جائے وقوع سے نائن ایم ایم پستول کے 8 خول قبضے میں لیے ہیں۔
