سوشل میڈیا پر جہاں ایک طرف تقریباً پچیس سال بعد ایک شان دار ہالی ووڈ فلم کا پھر سے چرچا ہونے لگا ہے، وہیں ٹام کروز کی سپر ہٹ فلم ٹاپ گن کو بہتر قرار دینے پر ایک خاتون کو طلاق ملنے کے خدشے نے آ گھیرا ہے۔
دراصل اتوار کو ٹویٹر پر ایک خاتون صارف راشل ونڈمین نے ایک پوسٹ کی، جس میں انھوں نے لکھا کہ ’میں نے کہا کہ ٹاپ گن، سیونگ پرائیویٹ رائن سے بہتر فلم ہے، اور اس پر لگتا ہے اب مجھے طلاق ہونے والی ہے۔‘
اس ٹویٹ کے بعد فلموں میں دل چسپی رکھنے والوں کی طرف سے تبصروں کا تانتا بندھ گیا، جس کی وجہ سے فلم سیونگ پرائیویٹ رائن ٹویٹر پر ٹاپ ٹرینڈز میں شامل ہو گئی، یہ فلم دراصل 1998 میں ریلیز ہوئی تھی، چوبیس برس قبل پہلی بار سنیما گھروں کی زینت بننے والی اس فلم میں ٹام ہینکس اور میٹ ڈیمن نے مرکزی کردار ادا کیے تھے، لیکن ایک ٹویٹ نے اسے پھر سے ٹاپ ٹرینڈ بنا دیا۔
جب کہ پہلی ’ٹاپ گن‘ فلم 1986 میں ریلیز ہوئی تھی اور اس فلم میں ٹام کروز نے ایک فائٹر پائلٹ کا کردار ادا کیا تھا، جس نے اکیڈمی اور گولڈن گلوب سمیت متعدد ایوارڈز جیتے تھے، اس فلم کا سیکوئل ’ٹاپ گن: میورک‘ رواں سال ریلیز ہوئی ہے اور اس وقت دنیا پھر کے سینما گھروں میں دکھائی جا رہی ہے۔
صارفین کا زبردست ردِ عمل
ایک ٹوئٹر صارف نے راشل ونڈمین کی ٹویٹ پر لکھا ’سیونگ پرائیویٹ رائن کے شروع کے 30 منٹ پوری ٹاپ گن سے بہتر ہیں۔‘
’چیز برگر‘ نامی ٹوئٹر اکاؤنٹ نے واشل کو مخاطب کرتے ہوئے لکھا ’یہ دونوں ہی غیر معمولی فلمیں ہیں لیکن آپ غلط ہیں۔ صرف ایسی چار فلمیں ہیں جنھیں دیکھ کر آدمی روتا ہے: ’سیونگ پرائیویٹ رائن، گلیڈی ایٹر، ہیون کین ویٹ اور روڈی۔‘
جیک ہکس نامی صارف نے لکھا ’سیونگ پرائیویٹ رائن اب تک کی سب سے بہترین فلموں میں سے ایک ہے، جب کہ ٹاپ گن 1986 کی بہترین فلموں میں بھی نہیں تھی۔‘
آئی ایم بی ڈی ریٹنگ
انٹرنیٹ مووی ڈیٹا بیس (آئی ایم ڈی بی) پر ’سیونگ پرائیوٹ رائن‘ کو لاکھوں لوگوں نے 10 میں سے 8.6 ریٹنگ دی ہے، جب کہ دوسری جانب 1986 میں ریلیز ہونے والی ’ٹاپ گن کی ریٹنگ 10 میں سے 6.9 ہے۔
ٹاپ گن کی نئی مووی
’ٹاپ گن‘ سیریز کی دوسری فلم ’ٹاپ گن: میورک‘ اپنی ریلیز کے بعد سے دو دنوں میں اب تک 100 ملین ڈالرز سے زیادہ پیسے کما چکی ہے اور خیال ظاہر کیا جا رہا ہے کہ بزنس کے اعتبار سے ٹام کروز کی اب تک کی سب سے بڑی فلم ثابت ہوگی۔
فلم سیونگ پرائیویٹ رائن
یہ فلم دوسری جنگ عظیم کے ارد گرد گھومتی ہے جس میں امریکی رینجرز کے ایک کپتان جان ایچ ملر (ٹام ہینکس) فرانس کے علاقے نارمنڈی میں جرمن فوجی آپریشن کے دوران ایک فوجی اہل کار پرائیوٹ فرسٹ کلاس جیمز فرانسس رائن (میٹ ڈیمن) کو ڈھونڈ رہے ہیں تاکہ انھیں واپس امریکا بھیجا جا سکے۔
پرائیویٹ رائن کو گھر بھیجنے کے احکامات اس لیے جاری ہوئے ہیں کیوں کہ ان کے تین بھائی پہلے ہی جنگ میں ہلاک ہو چکے ہیں اور امریکی حکومت چاہتی ہے کہ چوتھا بھائی واپس اپنے وطن جا کر اپنے خاندان کے ساتھ رہے۔
’سیونگ پرائیویٹ رائن‘ کا شمار جنگوں پر بننے والی مشہور ترین فلموں میں ہوتا ہے اور اسے 71 ویں اکیڈمی ایوارڈز میں 11 ایوارڈز کے لیے نامزد کیا گیا تھا اور اس فلم کو اس سال پانچ اکیڈمی ایوارڈز ملے تھے۔ اس کے علاوہ نے گولڈن گلوب سمیت متعدد ایوارڈز اپنے نام کیے تھے۔
