Tag: ٹانک

ڈی آئی خان: ڈیرہ اسماعیل خان میں پولیس وین پر دستی بم حملے میں زخمی ہونے والے ایس ایچ او عنایت اللہ دم توڑ گئے۔

تفصیلات کے مطابق ڈی آئی خان میں پولیس وین پر حملے کے زخمی ایس ایچ او جاں بر نہ ہو سکے، مقامی اسپتال میں زیر علاج عنایت اللہ آج جاں بحق ہو گئے۔

چند روز قبل دہشت گردوں نے تھانہ گومل کی پولیس وین کو نشانہ بنایا تھا، معمول کی گشت کے دوران حملہ آوروں نے وین پر دستی بم پھینکا، جس میں ایس ایچ اوعنایت اللہ سمیت 5 اہل کار اور ایک راہ گیر زخمی ہو گئے تھے۔

ایس ایچ او کو شدید زخمی حالت میں طبی امداد کے لیے اسپتال پہنچایا گیا تھا، پولیس وین پر حملہ کرنے والا دہشت گرد جوابی فائرنگ میں مارا گیا تھا، پولیس کے مطابق ہلاک حملہ آور کے پاس دھماکا خیز مواد بھی موجود تھا جسے ناکارہ بنانے کے لیے بی ڈی ایس کو طلب کیا گیا تھا۔

ٹانک کے علاقے میں اس واقعے کے بعد پورے علاقے کو محاصرہ کر کے سرچ آپریشن بھی کیا گیا۔

خیال رہے کہ رواں ماہ کے شروع میں تھانہ گومل یونی ورسٹی کی حدود سے پولیس نے دستی بم میں استعمال ہونے والا سامان برآمد کیا تھا، سمیع آباد میں واقع پلاٹ سے 3 دستی بم، پرائما کارڈ، اور خالی ڈرم برآمد ہوئے تھے، پولیس کا کہنا تھا کہ مذکورہ مقام سے سرکاری وردیاں بھی برآمد ہوئیں، یہ پلاٹ تھانہ گومل یونی ورسٹی کی حدود میں واقع ہے۔

ٹانک: خیبر پختونخواہ کےانتہائی جنوبی و پسماندہ ضلع ٹانک میں قرض اور بے روزگاری سے تنگ آکر سید رسول نامی شخص نے اپنے ہی گھر کے اندر فائرنگ کرکے پانچ افراد کو قتل اور دو کو شدید زخمی کردیا۔

تفصیلات کے مطابق یہ واقعہ ٹانک کے محلے قاضیانوالہ میں پیش آیا جہاں معاشی حالات سے پریشان ایک شخص نے اپنے بیوی اور بچوں سمیت 5 افراد کو فائرنگ کرکے قتل کردیا، واقعے میں قاتل کی ایک بیٹی اور بیٹا شدید زخمی ہوئے ہیں، ملزم نے خود کو بھی گولی مار کر خودکشی کرلی۔

پولیس کے مطابق ٹانک کے محلہ قاضیانوالہ کا رہائشی سید رسول پیشے کے لحاظ سے جیولر تھا لیکن روزگار نہ ہونے اور لاکھوں روپے قرض پڑنے کی وجہ سے ذہنی طور پر شدید پریشان تھا ۔

بتایا جارہا ہے کہ ملزم سید رسول نے ذہنی پریشانی کے عالم میں آج علی الصبح 6 بجے اپنے گھر میں سوتے ہوئے اہل خانہ پر فائرنگ کردی ۔ سانحے میں ملزم کی بیوی مسماتہ حلیمہ بی بی، 15 سالہ بیٹی کرن اور 13 سالہ عمیرہ بی بی، 18 سالہ بیٹا سلیمان ، 20 سالہ ثوبیہ 13 سالہ عمیرہ اور 11 سالہ عثمان پر فائرنگ کرکے بعد میں خود کو گولی مار کر اپنی بھی زندگی کا چراغ گل کردیا۔

فائرنگ کے نتیجے میں عمیرہ اور عثمان شدید زخمی ہوگئے جبکہ خاندان کے دیگر تمام 5 افراد جاں بحق ہوگئے ہیں۔ پولیس نے مقدمہ درج کرکے تفتیش شروع کردی ہے، میتوں کو پوسٹ مارٹم کے لیے اسپتال منتقل کردیا گیا ہے جہاں سے انہیں بدنصیب خاندان کے دیگر لواحقین کے حوالے کردیا جائے گا۔

پورا خاندان ختم ہوجانے پر جہاں ایک جانب لواحقین صدمے کی حالت میں ہیں وہی اس واقعےکو لے کر اہل محلہ میں بھی خوف اور صدمے کی ملی جلی فضا پائی جاتی ہے۔