فیصل آباد : نگراں وزیر اعلیٰ پنجاب محسن نقوی نے آٹا، گھی، چکن، دالوں اور چینی کے نرخ سمیت ٹرانسپورٹ کرایوں میں کمی کا اعلان کردیا۔
فیصل آباد چیمبر آف کامرس اینڈ انڈسٹری میں میڈیا سے گفتگو کرتے ہوئے نگراں وزیراعلیٰ پنجاب نے بتایا کہ ڈیزل بس کا کرایہ 10فیصد اور پٹرول بس کا کرایہ15فیصد کم ہوچکا ہے۔
انہوں نے کہا کہ کارگو کے کرائے کم کرنے کیلئے مذاکرات کامیاب رہے اسے بھی 10فیصد کم کرینگے، 600کرایہ دینے والے مسافر کو کم ازکم 100روپےکی بچت ہوگی،پٹرول مزید سستا ہوا تو قیمتیں مزید کم کرائیں گے۔
محسن نقوی کا کہنا تھا کہ دالوں کی قیمتوں میں20سے30روپے کمی کی جائے گی، گھی کی قیمت میں 15روپے فی کلو،مرغی کے نرخ12سے15فیصد نیچے آئیں گے۔
اس کے علاوہ چکن کی قیمتوں میں110روپے فی کلو کمی آئے گی جبکہ چینی کی قیمت180سےکم ہوکر145روپے فی کلو ہوچکی ہے جو مزید کم ہوگی،
نگراں وزیراعلیٰ کا کہنا تھا کہ آٹے کی قیمت 15روپے فی تھیلاکم ہوگی، حکومت پنجاب جلد گندم ریلیز کرنا شروع کرے گی جس کے بعد نرخ مزید کم ہوگا، گندم کے نرخ3500سے4000فی من کرنے سے آٹے کے نرخ میں کمی ناگزیر ہے۔
محسن نقوی نے بتایا کہ اشیائےضروریہ کی قیمتوں میں کمی کیلئے پوری ٹیم کل سے محنت کررہی ہے، چیف سیکرٹری روزانہ ساڑھے9بجے قیمتوں میں کمی پر اجلاس منعقد کریں گے، ہمیں عوام کا فائدہ دیکھناہے جہاں جہاں ریلیف دے سکتےہیں ضرور دیں گے۔
نگراں وزیر اعلیٰ پنجاب کا کہنا تھا کہ قیمتیں کم کرنے کیلئے48گھنٹے کی ڈیڈ لائن دی تھی،8گھنٹے میں قیمتیں کم ہوگئیں، ملازمین کی تنخواہیں35فیصد بڑھائی ہیں،پولیس ملازمین کی14ہزار، دیگر کی26ہزار کی پروموشن کرچکے ہیں۔
