اسلام آباد: وزیر خارجہ شاہ محمود قریشی نے کہا ہے کہ امریکی صدر ٹرمپ نے وعدے کے مطابق کشمیر پر بھارتی وزیر اعظم سے بات کی، ان کی جانب سے ثالثی کی پیش کش بھارتی بیانیے کی نفی ہے۔
وزیر خارجہ شاہ محمود قریشی نے پڑوسی ملک بھارت میں موجودہ صورت حال اور امریکی صدر کے دورے سے متعلق اہم بیان جاری کرتے ہوئے کہا ہے کہ بھارتی میڈیا نے ٹرمپ پریس کانفرنس کو اپنے مقاصد کے لیےاستعمال کیا، جب کہ صدر ٹرمپ نے دہشت گردی کے خلاف پاکستان کی کاوشوں کو سراہا۔
وزیر خارجہ کا کہنا تھا کہ پاکستان عرصے سے کہہ رہا ہے بھارت میں مسلمان عدم تحفظ کا شکار ہیں، گزشتہ 2 روز سے دہلی میں 10 سے زائد اموات ہو چکی ہیں، دہلی میں عمارتوں، پیٹرول پمپس، کاروباری مراکز کو جلایا جا رہا ہے، دنیا کو اس صورت حال کا فوری نوٹس لینا چاہیے۔
نئی دہلی میں ہندوانتہاپسندوں کے حملے، 20 مسلمان شہید، اموات میں اضافے کاخدشہ
شاہ محمود نے کہا کہ صدر ٹرمپ نے ہزاروں لوگوں کی موجودگی میں واشگاف الفاظ میں کہا پاکستان نے بہترین حکمت عملی سے دہشت گردی کو شکست دی۔ صدر ٹرمپ نے یہ بھی کہا کہ عمران خان میرے دوست ہیں۔
خیال رہے کہ امریکی صدر کے دورے کے دوران دہلی میں مسلمانوں پر آر ایس ایس اور بی جے پی کے غنڈوں نے حملے شروع کر دیے تھے جو تاحال جاری ہیں، دو روز میں حملوں میں اب تک 20 مسلمان شہید ہو چکے ہیں اور 190 سے زائد زخمی ہیں، بھارتی دارالحکومت نئی دہلی میں صورت حال بدستور کشیدہ ہے۔
