Tag: ٹرمپ

امریکی صدر ڈونلڈ ٹرمپ نے کہا ہے کہ روسی صدر سے یوکرین امن معاہدے پر مثبت گفتگو ہوئی ہے۔

غیر ملکی میڈیا رپورٹ کے مطابق روس کے روسی صدر ولادیمیر پیوٹن اور امریکی صدر ڈونلڈ ٹرمپ کے درمیان ٹیلی فون پر بات چیت ہوئی، روس اور امریکی صدور کے درمیان ڈھائی گھنٹے طویل گفتگو ہوئی جس میں یوکرین جنگ سمیت دیگر امور پر بات کی گئی۔

امریکی صدر ڈونلڈ ٹرمپ نے روسی صدر سے گفتگو کے بعد امریکی ٹی وی کو انٹرویو میں کہا کہ روسی صدر کے ساتھ یوکرین امن معاہدے  پر گفتگو مثبت رہی، مکمل جنگ بندی کیلئے تیزی سے کام کریں گے۔

امریکی ٹی وی کو انٹرویو میں ٹرمپ نے مزید کہا روسی صدر سے یوکرینی امداد پر بات نہیں ہوئی، امریکی مندوب اسٹیو وٹکوف کا کہنا ہے روسی وفد سے اتوار کو جدہ میں بات ہوگی۔

روس یوکرین جنگ کے خاتمے کیلیے اہم پیشرفت

دوسری جانب امریکا اور روس کے درمیان یوکرین میں جنگ بندی سے متعلق بات چیت کے بعد یوکرینی صدر کا کہنا ہے کہ جنگ بندی کی امریکی تجویز پر امریکی صدر سے بات کریں گے۔

یوکرینی صدر ولادیمیر زیلنسکی کا کہنا ٹرمپ سے گفتگو کا مقصد یہ جاننا ہوگا کہ روس نے امریکا کو کیا پیشکش کی ہے، یہ جاننا بھی چاہتے ہیں کہ امریکا نے روس کو کیا پیشکش کی۔

صدر ولادیمیر زیلنسکی کا مزید کہنا تھا کہ پیوٹن کی شرائط ظاہر کرتی ہیں کہ روس جنگ بندی کے لیے تیار نہیں، روسی صدر کا مقصد یوکرین کو کمزور کرنا ہے۔

کیلیفورنیا : کیلیفورنیا میں ڈسٹرکٹ جج ولیم السپ نے ٹرمپ انتظامیہ کو برطرف ہزاروں وفاقی ملازمین کو فوری بحال کرنے کا حکم دے دیا۔

تفصیلات کے مطابق ڈونلڈ ٹرمپ انتظامیہ کو ایک اور بڑا جھٹکا لگا، کیلیفورنیا میں ڈسٹرکٹ جج ولیم السپ نے ٹرمپ انتظامیہ کو برطرف ہزاروں وفاقی ملازمین کو فوری بحال کرنے کا حکم دیدیا۔

عدالت نے ریمارکس دیئے کہ وفاقی ملازمین کو برطرف کرنے کا بوگس جواز پیش کیا گیا، عدالت نے فیصلے میں وفاقی اداروں کے پروبیشنری ملازمین کوبحال کرنےحکم دیا، جنہیں ٹرمپ انتظامیہ نے گزشتہ ماہ ملازمتوں سے فارغ کردیا تھا۔

جج نے چھ وفاقی اداروں ،محکمہ دفاع، سابق فوجیوں کے امور، زراعت، توانائی، داخلہ اور خزانہ کو حکم دیا کہ وہ غلط طریقے سے برطرف کیے گئے ملازمین کو بحال کرے۔

جج ولیم السوپ نے ان ملازمین کی برطرفی کو انتظامیہ کی شرمناک حرکت قرار دیا

واضح رہے وفاقی ملازمین کو برطرف کرنے کے اقدام کی قیادت ایلون مسک کر رہے ہیں جبکہ جان ہاپکنز یونی ورسٹی نے وفاقی امداد پر انحصار کرنے والے دوہزار سے زائد ورکرز کو نکالنے کا اعلان کر دیا ہے۔

واشنگٹن : امریکی صدر ڈونلڈ ٹرمپ نے ایلون مسک کی کمپنی ٹیسلا کی الیکٹرک گاڑی خرید لی اور کہا ٹیسلا ڈیلر شپ کے خلاف تشدد کو گھریلو دہشت گردی قرار دیں گے۔

تفصیلات کے مطابق امریکی صدر ڈونلڈ ٹرمپ نے ایلون مسک کی حمایت میں ٹیسلا کی الیکٹرک گاڑی خرید لی، سرخ رنگ کی چمچماتی گاڑی کی فرنٹ سیٹ پر بیٹھتے ہوئے ٹرمپ نے گاڑی کی تعریف کرتے ہوئے کہا بہت خوبصورت ہے، سب کچھ کمپیوٹرزئزڈ ہے۔

امریکی صدر کا کہنا تھا وہ ٹیسلا ڈیلر شپ کے خلاف تشدد کو گھریلو دہشت گردی قرار دیں گے۔

اس موقع پر ڈونلڈ ٹرمپ کے ہمراہ ٹیسلا کمپنی کے سی ای او ایلون مسک بھی تھے، ٹرمپ نے گاڑی کا ٹیسٹ نہیں کیا کیونکہ انہیں گاڑی چلانے کی اجازت نہیں ہے، لیکن کہا کہ وہ اسے وائٹ ہاؤس میں چھوڑ دیں گے تاکہ ان کا عملہ اسے چلا سکے۔

واضح رہے ٹرمپ نے الیکٹرک کار فرم ٹیسلا کے حصص میں پندرہ فیصد سے زیادہ کمی کے بعد ایلون مسک کی حمایت میں گاری خریدی ہے.

یاد رہے امریکی صدر ٹرمپ نے ٹیسلا کی گاڑی خریدنے کا اعلان کیا تھا اور کہا تھا کہ اپنے ڈونر اور قریبی ایڈوائزر ایلون مسک کی حمایت کے طور پر ٹیسلا گاڑی خریدوں گا، ایلون مسک امریکی قوم کے لیے بہترین خدمات انجام دے رہے ہیں۔

امریکی صحافی مائیکل وولف نے صدر ڈونلڈ ٹرمپ سے متعلق دلچسپ تجزیہ پیش کرتے ہوئے انہیں احمق کے ساتھ غیر معمولی ذہین قرار دیا ہے۔

مائیکل وولف جو ڈونلڈ ٹرمپ پر چار کتابیں لکھ چکے ہیں اور انہیں ذاتی طور پر انتہائی قریب سے جاننے کا دعویٰ کرتے ہیں۔ انہوں نے اپنے ایک حالیہ انٹرویو میں امریکی صدر سے متعلق دلچسپ تجزیہ پیش کیا۔

صدر ٹرمپ جو منصب صدارت سنبھالنے کے بعد اپنے متنازع اقدامات اور اعلانات کی وجہ سے موضوع بحث بنے ہوئے ہیں۔

حال ہی میں اوول آفس میں یوکرینی ہم منصب ولادیمیر زیلنسکی سے تلخ ملاقات کے بعد ان پر چار کتابیں تحریر کرنے والے مائیکل وولف نے اپنے ایک انٹرویو میں حیرت انگیز طور پر ان کی ذات کا تجزیہ پیش کرتے ہوئے ٹرمپ کو احمق ہونے کے ساتھ ساتھ غیر معمولی طور پر ذہین بھی قرار دے دیا۔

امریکی صحافی نے کہا کہ میں لوگوں کو کہتا ہوں کہ ٹرمپ کو سیاست دان کے طور پر مت دیکھیں، وہ ایک شو مین ہیں، اداکار ہیں اور اداکار زیادہ تر بیوقوف ہوتے ہیں۔

مائیکل وولف نے ساتھ ہی یہ بھی کہا کہ اداکار کو اپنے ناظرین اور سننے والوں کا پتہ ہوتا ہے۔ اس لیے وہ بہت زیادہ ذہین بھی ہیں۔

انہوں نے کہا کہ یاد رکھیں ٹرمپ 14 سال تک ایک مشہور ریئلٹی شو کا حصہ رہے ہیں اور یہ ایسی تربیت ہے جو کسی دوسرے سیاستدان کو نہیں ملی۔

واشنگٹن : امریکی صدر ڈونلڈ ٹرمپ نے بٹ کوائن اسٹریٹجک ریزرو کے قیام کے ایگزیکٹو آرڈر پر دستخط کردیئے ، اب امریکا کرپٹو کرنسی ریزرو کا عالمی دارالحکومت بنے گا۔

تفصیلات کے مطابق امریکی صدر ڈونلڈ ٹرمپ نے بٹ کوائن اسٹریٹجک ریزرو کے قیام کا ایگزیکٹو آرڈر جاری کردیا۔

ایگزیکٹو آرڈر کے تحت امریکا کرپٹو کرنسی ریزرو کا عالمی دارالحکومت بنے گا ، امریکی حکومت بٹ کوائن کا اسٹریٹجک ریزرو قائم کرے گی۔

امریکا کے پاس دو لاکھ بٹ کوائن ہیں، جن کی مالیت ساڑھے سترہ ارب ڈالر ہے۔

امریکی صدر کا کہنا تھا کہ امریکی محکمہ خزانہ، کامرس اضافی بٹ کوائن اثاثوں کیلئے کام کریں گے ، جس میں بٹ کوائن اور دیگر کرپٹو کرنسی کے اثاثے جمع کرنے کے لیے اقدامات کیے جائیں۔

کرپٹو کرنسی انڈسٹری کے قائدین نے صدر ٹرمپ سے ملاقات کی، بٹ کوائن اور دیگر کرپٹو کرنسی کے اثاثے جمع کرنے کے لیے اقدامات پر ٹرمپ نے کہا کہ کرپٹو ذخائر جمع کرنے کے لیے ٹیکس دہندگان پر بوجھ نہیں ڈالا جائے گا، امریکہ یہ اصول اپنائے گا کہ اپنا بِٹ کوائن کبھی نہ بیچو۔

یاد رہے ڈونلڈ ٹرمپ نے چند رو زپہلے پانچ کرپٹو کرنسی کے ناموں کا اعلان کیا ہے، جنھیں وہ ایک نئے اسٹریٹیجک ریزرو کا حصہ بنانا چاہتے ہیں۔

امریکی ڈیجیٹل ریزرو کا مقصد امریکا کو ’کرپٹو کرنسی کا عالمی دارالحکومت‘ بنانا ہے، امریکی صدر نے بٹ کوائن کے علاوہ ایتھیریم، ایکس آر پی ، سولانا اور کارڈانو کو بھی امریکی ڈیجیٹل ریزرو کا حصہ بنانے کا اعلان کیا تھا۔

امریکی صدر ڈونلڈ ٹرمپ کی ایک سوشل میڈیا پوسٹ نے دنیا میں ہلچل مچا دی ہے جس میں انہوں نے کہا ہے کہ کل کی رات اہم ہونے والی ہے۔

غیر ملکی میڈیا کے مطابق امریکی صدر ڈونلڈ ٹرمپ نے سوشل میڈیا پلیٹ فارم ’’ٹروتھ‘‘ پر ایک پوسٹ کی ہے جس میں انہوں نے لکھا کہ ہے کہ ’’کل کی رات بہت اہم ہونے والی ہے۔ میں اس بارے میں ٹھیک ویسے ہی بتاؤں گا جیسا کہ یہ ہے۔‘‘

دنیا کی سپر پاور ملک کے سربراہ کی جانب سے اس مبہم پوسٹ پر دنیا بھر میں ہلچل مچ گئی ہے اور قیاس آرائیاں شروع ہو گئی ہیں۔

اکثریت اس پوسٹ کو ٹرمپ اور زیلنسکی کی حالیہ تلخ ملاقات کے تناظر میں دیکھ رہے ہیں اور یہ قیاس آرائیاں کی جا رہی ہیں کہ کیا ٹرمپ یوکرین کے صدر زیلنسکی سے بدلہ لینے کی تیاری کررہے ہیں یا پھر روسی صدر پیوٹن کے ساتھ مل کر کوئی نیا سیاسی دھماکا کرنے والے ہیں۔

واضح رہے کہ ٹرمپ نے اسی سوشل میڈیا سائٹ پر زیلنسکی پر تنقید کرتے ہوئے کہا تھا کہ یہ شخص امن نہیں چاہتا۔ امریکی صدر نے یوکرینی صدر سے ملاقات کے بعد یوکرین کی فوجی امداد بھی بند کر دی ہے۔

https://urdu.arynews.tv/trump-is-once-again-angry-with-zelensky/