ARYNews.tv | Urdu – Har Lamha Bakhabar

Tag: ٹرمپ

  • صدارتی انتخابات میں ٹرمپ کی جیت کا امکان روشن، اہم وجہ سامنے آگئی؟

    صدارتی انتخابات میں ٹرمپ کی جیت کا امکان روشن، اہم وجہ سامنے آگئی؟

    امریکی صدر جو بائیڈن کی جانب سے اسرائیل کی غیر مشروط حمایت پرصدارتی انتخابات میں ان کی جیت کو شدید خطرات لاحق ہوگئے ہیں۔

    غیر ملکی ذرائع ابلاغ کے مطابق 100 سے زائد ڈیموکریٹک عطیہ دہندگان و کارکنوں نے امریکی صدر جوبائیڈن کی انتخابی مہم کی انتظامیہ کو خط لکھ دیا ہے۔

    عرب میڈیا کا کہنا ہے کہ 100 سے زائد ڈیموکریٹک عطیہ دہندگان اور کارکنوں نے جوبائیڈن کی انتخابی مہم کی انتظامیہ کو خط لکھ کر اسرائیلی آپریشن کی غیر مشروط حمایت پر صدر بائیڈن کو شدید تنقید کا نشانہ بنایا ہے۔

    انہوں نے انتباہ کیا ہے کہ موجودہ امریکی صدر بائیڈن کی اسرائیل کی حمایت پر بڑھتا عوامی غصہ سابق صدر ٹرمپ کی جیت کے امکانات کو بڑھا رہا ہے۔

    دوسری جانب امریکی صدر بائیڈن کے دیرینہ ساتھی ٹام کارپر کی زیرقیادت 19 ڈیموکریٹک سینیٹرز نے ایک خط میں کہا ہے کہ مشرق وسطیٰ کا بحران ایک ایسے موڑ پر پہنچ گیا ہے جس کے لیے امریکی قیادت کو ماضی کی ”سہولت”سے آگے کی ضرورت ہے۔

    سینیٹرز نے لکھا کہ ہم بائیڈن انتظامیہ سے فوری طور پر ایک جرات مندانہ، عوامی فریم ورک قائم کرنے کی درخواست کرتے ہیں جو ضروری اقدامات کا خاکہ پیش کرے۔

    سینیٹرز نے کہا کہ وہ نیتن یاہو کے فلسطینی ریاست کے راستے پر جانے سے انکار سے خاص طور پر مایوس ہوئے ہیں آپ اور آپ کی انتظامیہ نے جو سفارتی اقدامات کیے ہیں وہ انتہائی اہمیت کے حامل ہیں اور ہم آپ سے اور بھی زیادہ کرنے کی اپیل کرتے ہیں۔

    کلینک کے عملے نے کیٹ مڈلٹن کی میڈیکل رپورٹ کے ساتھ کیا کیا؟

    بائیڈن کو یہ خط سینیٹ کے اکثریتی رہنما چک شومر کے بعد آیا ہے جو ملک کے اعلیٰ ترین یہودی منتخب رہنما اور اسرائیل کے دیرینہ وکیل ہیں جنہوں نے غزہ جنگ پر نیتن یاہو کے طرز عمل پر تنقید کرتے ہوئے نئے اسرائیلی انتخابات پر زور دیا۔

  • صدر منتخب نہ ہوا تو خونریزی ہوگی، ٹرمپ نے خبر دار کردیا

    صدر منتخب نہ ہوا تو خونریزی ہوگی، ٹرمپ نے خبر دار کردیا

    امریکا کے سابق صدر ڈونلڈ ٹرمپ نے خبردار کرتے ہوئے کہا ہے کہ اگر وہ صدر منتخب نہ ہوئے تو خونریزی ہوگی۔

    بین الاقوامی خبر رساں ادارے کی رپورٹ کے مطابق ٹرمپ نے ریاست اوہائیو میں ریلی سے خطاب کرتے ہوئے صدارتی انتخابات کی تاریخ 5 نومبر کو تاریخی اور اپنی انتخابی مہم کو امریکا کے لیے اہم موڑ قرار دیا۔

    خونریزی سے متعلق بیان انہوں نے امریکی آٹو انڈسٹری کو لاحق خطرات سے متعلق تبصرہ کرتے ہوئے دیا۔

    ٹرمپ نے میکسیکو میں گاڑیاں بنا کر امریکیوں کو فروخت کرنے کے چینی منصوبے پر شدید تنقید کی۔

    انہوں نے کہا کہ اگر میں منتخب ہوگیا تو ایک، ایک گاڑی پر سو فیصد ٹیکس لگاؤں گا اور پھر چین ان گاڑیوں کو امریکا میں فروخت کرنے کے قابل نہیں رہے گا اور اگر میں منتخب نہیں ہوا تو یہ سب کے لیے خونریز ثابت ہوگا۔

    دوسری جانب امریکی صدر جو بائیڈن کے مواخذے کے لیے تحقیقات کے سلسلے میں ان کے بیٹے ہنٹر بائیڈن نے کمیٹی کے سامنے پیش ہونے سے انکار کر دیا ہے۔

    امریکی میڈیا کے مطابق صدر جو بائیڈن کے خلاف مواخذے کے سلسلے میں تحقیقات کے لیے ایوان نمائندگان کی کمیٹی نے صدر کے بیٹے ہنٹر بائیڈن 20 مارچ کو طلب کیا تھا تاہم انہوں نے ایوان نمائندگان کی کمیٹی کے سامنے پیش ہونے سے انکار کر دیا ہے۔

    رپورٹ کے مطابق پیشی سے مسلسل انکار پر ہنٹر بائیڈن کے خلاف توہین کی کارروائی کا امکان ہے۔

    دوسری جانب وائٹ ہاؤس کی جانب سے اس حوالے سے جاری ردعمل میں کہا گیا ہے کہ صدر بائیڈن اپنے بیٹے کی کاروباری سرگرمیوں میں ملوث نہیں جب کہ ری پبلکن اراکین کانگریس کا کہنا ہے کہ صدر بائیڈن کے خاندان نے نائب صدارت کے دوران مالی فائدہ اٹھایا۔

  • شہزادہ ہیری نے ملکہ برطانیہ الزبتھ دوم کو دھوکا دیا، ٹرمپ

    شہزادہ ہیری نے ملکہ برطانیہ الزبتھ دوم کو دھوکا دیا، ٹرمپ

    امریکا کے سابق صدر ڈونلڈ ٹرمپ کا کہنا ہے کہ صدر بنا تو برطانوی شہزادہ ہیری کے ساتھ خصوصی برتاؤ نہیں رکھا جائے گا۔

    بین الاقوامی خبر رساں ادارے کی رپورٹ کے مطابق سابق امریکی صدر کا کہنا تھا کہ بائیڈن انتظامیہ نے برطانوی جوڑے پر بہت زیادہ مہربانی کی۔

    ڈونلڈ ٹرمپ نے کہا کہ برطانوی شہزادہ ہیری نے ملکہ برطانیہ الزبتھ دوم کو دھوکا دیا، اس بات کی شہزادہ ہیری کو معافی نہیں مل سکتی۔

    سابق امریکی صدر کا کہنا تھا کہ امریکا کا صدر منتخب ہوا تو شہزادہ ہیری کی کوئی مدد نہیں کروں گا، فیصلہ کرنا میرے اختیار میں ہوا تو ہیری اپنے ذمہ دار خود ہوں گے۔

    واضح رہے کہ برطانوی شہزادہ ہیری اور ان کی اہلیہ میگھن مارکل 2020 میں امریکا منتقل ہوگئے تھے۔

    دوسری جانب سابق امریکی صدر ٹرمپ نے جنوبی کیرولائنا میں بھی ریپبلکن پرائمری الیکشن میں کامیابی حاصل کر لی ہے، ٹرمپ نے وکٹری پارٹی سے خطاب میں کہا ”میں بائیڈن کو الیکشن میں شکست دینے کے لیے تیار ہوں۔“

    عارضی جنگ بندی کے بنیادی نکات طے کر لیے، امریکا

    سابق امریکی صدر نے اب تک 2024 کے تمام پارٹی نامزدگی کے مقابلے جیت لیے ہیں، اپنی فتح کا جشن مناتے ہوئے ٹرمپ نے کہا کہ انھوں نے کبھی بھی ریپبلکن پارٹی کو اتنا متحد نہیں دیکھا جتنا کہ یہ ابھی ہے۔

  • ٹرمپ کیلئے نئی مشکل، 83 ملین ڈالر ہرجانہ ادا کرنے کا حکم

    ٹرمپ کیلئے نئی مشکل، 83 ملین ڈالر ہرجانہ ادا کرنے کا حکم

    سابق صدر ڈونلڈ ٹرمپ کو امریکی عدالت کی جانب سے 83 ملین ڈالر ہرجانہ ادا کرنے کا حکم سنا دیا۔

    بین الاقوامی خبر رساں ادارے کی رپورٹ کے مطابق نیویارک کی جیوری نے یہ فیصلہ ہتک عزت کے مقدمے میں سنایا ہے۔

    سابق امریکی صدر کو لکھاری Jean Carroll کو 83 ملین ڈالر دینا ہوں گے جنہیں ٹرمپ نے سرعام جھوٹا کہا تھا اور ان کی توہین کی تھی۔

    لکھاری Jean Carrollکی جانب سے الزام عائد کیا گیا تھا کہ سابق امریکی صدر ٹرمپ نے 1990 کی دہائی میں ان پر جنسی حملہ کیا تھا۔

    سابق امریکی صدر ٹرمپ نے ہتک عزت سے متعلق جیوری کے فیصلے کو مضحکہ خیز قرار دیدیا، ٹرمپ نے ہتک عزت کیس میں جرمانے کے خلاف اپیل داخل کرنے کا فیصلہ کیا ہے۔

    سان فرانسسکو: سکھوں کا بھارتی قونصلیٹ کے باہرمظاہرہ، ترنگا نذر آتش

    ٹرمپ آئیوا اور نیوہیم شائر میں پارٹی نامزدگی جیت چکے ہیں اور اب انہوں نے جنوبی کیرولائنا پر نگاہیں مرکوز کر رکھی ہیں جہاں ری پبلکن پارٹی کی رہنما نکی ہیلی سے ان کا مقابلہ ہے، ٹرمپ امریکا کی ری پبلکن پارٹی کے سرفہرست صدارتی امیدوار ہیں۔

  • ٹرمپ کیخلاف رئیل اسٹیٹ فراڈ کی تحقیقات کا دائرہ وسیع

    ٹرمپ کیخلاف رئیل اسٹیٹ فراڈ کی تحقیقات کا دائرہ وسیع

    سابق امریکی صدرٹرمپ کیخلاف رئیل اسٹیٹ فراڈ کی تحقیقات کا دائرہ وسیع کردیا گیا ہے، جبکہ ٹرمپ کے دونوں بیٹوں کی نیویارک کی عدالت میں پیشی ہوئی، اس موقع پر دونوں کے بیانات قلمبند کئے گئے۔

    رپورٹ کے مطابق ایرک اور ٹرمپ جونیئر نے دھوکے سے کاروبار کی قدر بڑھانے کا الزام مسترد کردیا، دونوں کا موقف تھا کہ سیاسی انتقام کا نشانہ بنایا جا رہا ہے۔

    سابق امریکی صدر ٹرمپ کے وکیل کا عدالت میں کہنا تھا کہ بائیڈن انتظامیہ عوام کاپیسہ بے بنیاد مقدمے پرضائع کررہی ہے، ٹرمپ آئندہ صدارتی الیکشن کیلئے ریپبلکن نامزدگی کی دوڑ میں بدستور سرفہرست ہیں۔

    دوسری جانب ڈونلڈ ٹرمپ نے آئندہ انتخابات میں صدر منتخب ہونے پر مسلمانوں پر سفری پابندی عائد کرنے کا اعلان کر دیا ہے۔

    ریپبلکن جیوش کولیشن کے سالانہ سربراہی اجلاس سے خطاب میں ڈونلڈ ٹرمپ نے کہا کہ کیا آپ کو سفری پابندی یاد ہے؟ ایک دن میں یہ پابندی دوبارہ عائد کروں گا۔

    ڈونلڈ ٹرمپ نے کہا کہ جس دن میں اقتدار میں آیا کسی کو اپنے شہریوں کا خون بہانے کی اجازت نہیں دوں گا۔

    انہوں نے کہا کہ میں نے اپنے دورِ حکومت میں وعدہ پورا کیا اور یروشیلم کو اسرائیل کا دارالحکومت تسلیم کرتے ہوئے وہاں امریکی سفارت خانہ کھولا۔

  • عدالت نے ٹرمپ کی ایک اور درخواست مسترد کردی

    عدالت نے ٹرمپ کی ایک اور درخواست مسترد کردی

    واشنگٹن: سابق امریکی صدر ڈونلڈ ٹرمپ کی آئندہ صدارتی انتخابات کے بعد مقدمے کی سماعت کی درخواست کو عدالت نے مسترد کردیا۔

    بین الاقوامی میڈیا کے مطابق سابق امریکی صدر ٹرمپ نے وفاقی عدالت میں سماعت میں تاخیر کیلئے درخواست دی تھی۔ محکمہ انصاف نے 2 جنوری 2024 کو مقدمے کی سماعت مقرر کرنے کا کہا تھا۔

    سابق امریکی صدر ڈونلڈ ٹرمپ کے وکلا نے مؤقف دیتے ہوئے کہا کہ عوامی مفاد اور منصفانہ ٹرائل کیلئے جلد بازی نہ کی جائے، واضح رہے کہ سابق امریکی صدر ٹرمپ اب تک آئندہ صدارتی الیکشن کیلئے ری پبلکنز نامزدگی کی دوڑ میں سرفہرست ہیں۔

    قبل ازیں سابق امریکی صدر ڈونلڈ ٹرمپ کو ان کے دور صدارت میں دھمکی آمیز اور زہر آلود خط بھیجنے والی خاتون کو 22 سال قید کی سزا سنا دی گئی ہے۔

    غیر ملکی میڈیا کے مطابق مجرمہ کینیڈا اور فرانس کی دوہری شہریت رکھنے والی 55 سالہ پاسکل سیسیل ویرونیک فیریئر کو خط ارسال جانے کے دو دن بعد بفیلو اور فورٹ ایری، اونٹاریو کے درمیان کینیڈا اور امریکہ کی سرحد پر گرفتار کیا گیا۔ جس نے رواں سال کے شروع میں اپنے جرم کا اعتراف کر لیا تھا۔

    استغاثہ نے بتایا کہ خاتون نے تسلیم کیا ہے کہ اس نے ستمبر 2020 میں کینیڈا کے صوبے کیوبیک میں اپنی رہائش گاہ پر رائسن بنائی تھی۔

    گزشتہ روز امریکی محکمہ انصاف کی جانب سے جاری بیان میں کہا گیا تھا کہ مذکورہ خاتون نے وائٹ ہاؤس میں ڈونلڈ ٹرمپ اور ٹیکساس سٹیٹ کے قانون نافذ کرنے والے آٹھ اہلکاروں کو زہر آلود ’رائسن‘ سے بھرے خطوط بھیجے تھے، تاہم امریکی حکام نے خط وائٹ ہاؤس پہنچنے سے قبل ہی ضبط کر لیا تھا۔

    خط کے لفافے میں زہر آلود مواد ’رائسن‘ موجود تھا جو ارنڈی کی پھلیوں سے تیار کیا جاتا ہے۔ اس زہریلے مواد کی معمولی مقدار بھی سونگھنے، نگھلنے یا ٹیکہ لگانے سے جسمانی اعضا ناکارہ ہو جاتے ہیں۔

    خط میں موجود مواد کو ایک گودام میں ٹیسٹ کیا گیا تھا جس کے بعد اس میں رائسن زہر ہونے کی تصدیق کی گئی تھی۔

  • الیکشن ایک بار پھر جیتنے والا ہوں: ٹرمپ

    الیکشن ایک بار پھر جیتنے والا ہوں: ٹرمپ

    جارجیا: سابق امریکی صدر ڈونلڈ ٹرمپ نے کہا ہے کہ وہ آئندہ الیکشن جیتنے والے ہیں اس لیے انھیں انتقام کا نشانہ بنایا جا رہا ہے، انھوں نے امریکی جوہری راز باتھ روم میں چھپانے کے الزام کو مضحکہ خیز قرار دے دیا۔

    تفصیلات کے مطابق ڈونلڈ ٹرمپ نے اپنے اوپر فرد جرم میں لگائے گئے الزامات کو مضحکہ خیز اور بے بنیاد قرار دے دیا ہے، انھوں نے جارجیا کے ریپبلکنز کنونشن میں بائیڈن انتظامیہ کو آڑے ہاتھوں لیا۔

    ڈونلڈ ٹرمپ نے کہا میں الیکشن ایک بار پھر جیتنے والا ہوں اس لیے انتقام کا نشانہ بنایا جا رہا ہے، امریکی عوام دھاندلی کرنے والوں کو آئندہ الیکشن میں مزہ چکھائے گی۔

    ڈونلڈ ٹرمپ نے جارجیا میں کنونشن سے خطاب کرتے ہوئے کہا کہ فرد جرم ایف بی آئی اور محکمہ انصاف کی انتخاب میں مداخلت کے مترادف ہے، کبھی ہار نہیں مانوں گا اور اپنے مشن سے باز نہیں آؤں گا۔ ڈونلڈ ٹرمپ نے کہا کہ حساس دستاویزات کو جاسوسی ایکٹ کی بجائے صدارتی ریکارڈ ایکٹ کے تحت آنا چاہیے تھا۔

    واضح رہے کہ ٹرمپ کے خلاف جاسوسی سمیت متعدد الزامات کی عدالتی تحقیقات جاری ہیں، دوسری طرف الیکشن کے حوالے عوامی رائے عامہ کے جائزے میں ٹرمپ بدستور سرفہرست ہیں۔

    ٹرمپ کو 100 سال قید کی سزا ہو سکتی ہے

    امریکا کے سابق صدر ڈونلڈ ٹرمپ کو مجموعی طور پر 37 الزامات کا سامنا ہے، اگر ان پر یہ الزامات ثابت ہوتے ہیں تو انھیں 100 سال قید کی سزا ہو سکتی ہے۔ امریکی میڈیا رپورٹس کے مطابق ٹرمپ پر لگائے گئے الزامات میں جوہری پروگرام کی معلومات غیر قانونی طریقے سے حاصل کرنے، جاسوسی، خفیہ دستاویزات کی مِس ہینڈلنگ اور دیگر سنگین الزامات شامل ہیں۔

  • ٹرمپ پر کسی بھی دن فرد جرم عائد کی جا سکتی ہے، پھر کیا ہوگا؟

    ٹرمپ پر کسی بھی دن فرد جرم عائد کی جا سکتی ہے، پھر کیا ہوگا؟

    نیویارک: وائٹ ہاؤس میں واپسی کے خواہش مند ڈونلڈ ٹرمپ کسی بھی دن فرد جرم عائد ہونے کے بعد ایک نئی مصیبت میں پھنس سکتے ہیں، سابق صدر پر 2016 میں ایک معروف شخصیت کو خفیہ طور پر بھاری رقم کی ادائیگی کا الزام ہے۔

    روئٹرز  کے مطابق ٹرمپ ایک اور بڑی مشکل میں پھنس چکے ہیں، ان کے خلاف مین ہٹن کے ڈسٹرکٹ اٹارنی ایلون بریگ نے نیویارک کی ایک گرینڈ جیوری کے سامنے ثبوت پیش کیے ہیں کہ ٹرمپ نے 2016 کی صدارتی مہم کے آخری ایام میں اداکارہ اسٹورمی ڈینیئلز کو 1 لاکھ 30 ہزار ڈالر کی خفیہ ادائیگی کی تھی۔

    سابق امریکی صدر ٹرمپ نے اس الزام کی سختی سے تردید کر دی ہے، ٹرمپ کے وکیل نے اداکارہ اسٹورمی ڈینیئلز (اصل نام اسٹیفنی کلفورڈ) پر بھتہ خوری کا الزام عائد کر دیا ہے۔ تاہم رپورٹس کے مطابق اگر ٹرمپ پر فرد جرم عائد ہوتا ہے تو وہ مجرمانہ قانونی چارہ جوئی کا سامنا کرنے والے پہلے سابق امریکی صدر بن جائیں گے۔

    ٹرمپ کو بھی معاملے کی سنگینی کا احساس ہے، اس لیے انھوں نے گزشتہ دنوں سوشل میڈیا پر ایک پوسٹ میں کہا کہ ہو سکتا ہے کہ وہ آئندہ منگل کو گرفتار ہو جائیں، انھوں نے اپنے حامیوں سے بھرپور احتجاج کرنے کی اپیل بھی کی۔

    قانونی ماہرین کا کہنا ہے کہ عام طور پر فوجداری کیس کو فرد جرم سے مقدمے کی طرف جانے میں ایک سال سے زیادہ کا وقت لگتا ہے، جس کی وجہ سے ٹرمپ کی 2024 کی صدارتی مہم متاثر ہو سکتی ہے۔ انھیں صدارتی مہم کے وسط میں یا الیکشن کے بعد بھی مقدمے کا سامنا کرنا پڑ سکتا ہے۔

    میڈیا رپورٹس کے مطابق بحیثیت امریکی صدر ٹرمپ نے اپنے سابق وکیل مائیکل کوہن کے ذریعے اداکارہ کو رقم کی ادائیگی کی تھی، قانونی خدمات کے لیے ادائیگیوں کے ریکارڈ میں بھی گڑ بڑ کی گئی تھی۔ نیویارک ٹائمز کے مطابق ٹرمپ کے خلاف ممکنہ طور پر سب سے زیادہ الزامات ریکارڈ میں گڑ بڑ کرنے کے ہوں۔

    عدالت میں قانونی کارروائی کے لیے ملزم کی تصویر اور فنگر پرنٹس لیے جاتے ہیں جس کے لیے ٹرمپ کو گرفتار کر کے عدالت میں پیش کیا جا سکتا ہے، تاہم ماہرین کا کہنا ہے کہ ممکنہ طور پر انھیں اپنی پہچان کرانے پر رہا کر دیا جائے گا اور گھر جانے کی اجازت دے دی جائے گی۔

  • روس یوکرین جنگ کو ایک دن میں ختم کر سکتا ہوں، ٹرمپ کا بڑا دعویٰ

    روس یوکرین جنگ کو ایک دن میں ختم کر سکتا ہوں، ٹرمپ کا بڑا دعویٰ

    واشنگٹن : سابق امریکی صدر ڈونلڈ ٹرمپ نے دعویٰ کیا ہے کہ روس یوکرین جنگ کو ایک دن میں ختم کر سکتا ہوں۔

    تفصیلات کے مطابق  سابق امریکی صدر ڈونلڈ ٹرمپ نے واشنگٹن میں تقریب سے خطاب میں کہا کہ  صدر پیوٹن کیساتھ بہت اچھے تعلقات ہیں، وہ میری بات سنیں گے۔

    ٹرمپ نے دعویٰ کیا کہ اگر میں منتخب ہوگیا تو مجھے ایک دن بھی نہیں لگے گا یہ تنازع ختم کرنے کیلئے اول آفس میں قدم رکھنے سے پہلے ہی معاملہ حل ہوجائے گا۔

    تقریر میں سابق امریکی صدر نے کہا صرف میں ہی ایسا ا میدوار ہوں جو تیسری عالمی جنگ ہونے سے روک سکتا ہوں۔

    واضح رہے کہ برطانوی خبر رساں ایجنسی کے مطابق گزشتہ سال سے اب تک روس یوکرین جنگ میں 42 ہزار سے زائد افراد ہلاک جبکہ 56 ہزار سے زائد زخمی ہوچکے ہیں، اس کے علاوہ 15 ہزار افراد لاپتہ ہیں۔

  • ٹرمپ کے ادارے پر ٹیکس فراڈ کا جرم ثابت

    ٹرمپ کے ادارے پر ٹیکس فراڈ کا جرم ثابت

    واشنگٹن: سابق امریکی صدر ڈونلڈ ٹرمپ کے ادارے پر ٹیکس فراڈ ثابت ہوگیا، ادارے کو لالچ اور دھوکہ دہی کا مرتکب ٹھہرایا گیا ہے۔

    امریکی میڈیا رپورٹ کے مطابق نیویارک کی ایک جیوری نے سابق امریکی صدر ڈونلڈ ٹرمپ کے خاندانی کاروبار کو ٹیکس فراڈ کا قصور وار قرار دیا ہے، ٹرمپ آرگنائزیشن اور ٹرمپ پے رول کارپوریشن کو تمام معاملات میں ذمہ دار ٹھہرایا گیا ہے۔

    ایسا پہلی مرتبہ ہے کہ ان کمپنیوں پر کوئی جرم ثابت ہوا ہے۔

    مقدمے کے پراسیکیوٹر مین ہٹن کے ڈسٹرکٹ اٹارنی ایلون بریگ کا کہنا ہے کہ یہ لالچ اور دھوکہ دہی کا معاملہ تھا۔

    اگرچہ ڈونلڈ ٹرمپ پر کوئی الزام نہیں لگا لیکن ریئل اسٹیٹ، ہوٹل اور گالف کا کاروبار جس میں ان کا نام ہے، پر جرم ثابت ہو گیا ہے جس سے ان کی ساکھ کو نقصان پہنچے گا کیونکہ وہ سنہ 2024 میں صدارت کے لیے ری پبلکن نامزدگی کے خواہاں ہیں۔

    دونوں اداروں کو دھوکہ دہی اور کاروباری ریکارڈ میں غلط رد و بدل کر کے ٹیکس سے بچنے کے لیے 13 سالہ اسکیم چلانے کا مجرم قرار دیا گیا ہے۔

    دوران سماعت ججوں نے استغاثہ سے اتفاق کیا کہ ٹرمپ آرگنائزیشن جو فی الحال ان کے دو بیٹے ڈونلڈ جونیئر اور ایرک ٹرمپ چلا رہے ہیں، نے 2005 اور 2021 کے وسط میں اعلیٰ عہدیداروں کو ادا کیے گئے معاوضے کو چھپایا۔

    ٹرمپ آرگنائزیشن کے چیف فنانشل افسر کے طور پر خدمات انجام دینے والے 75 سالہ ویسلبرگ نے ٹیکس فراڈ کے 15 الزامات میں جرم قبول کیا تھا۔

    انہوں نے عدالت میں اعتراف کیا تھا کہ انہوں نے ٹرمپ آرگنائزیشن میں اپنے عہدے کا استعمال ٹیکس چوری اور خود کو مالا مال کرنے کے لیے کیا۔

    ویسلبرگ نے ٹرمپ آرگنائزیشن کو کرائے کے بغیر عالیشان اپارٹمنٹ، مہنگی کاریں، ٹرمپ کے پوتے پوتیوں کے لیے نجی اسکول کی ٹیوشن فیس اور نیا فرنیچر فراہم کیا تھا، یہ سب کچھ ٹیکس ادا کیے بغیر کیا گیا۔