اسلام آباد: وزیر خارجہ خواجہ آصف نے امریکی الزام کا جواب دیتے ہوئے کہا ہے کہ ہماری دہلیز پر اپنی ناکامی کا ملبہ نہ رکھو، آپ خوش نہیں، افسوس ہے، مگر اب ہمارے وقار پر کوئی سمجھوتا نہیں ہوگا۔
ان خیالات کا اظہار اُنھوں نے سماجی رابطے کی ویب سائٹ ٹویٹر پر کیا۔
خواجہ آصف نے کہا، ہم چار سال سے دہائیوں کا ملبہ صاف کر رہے ہیں، ہماری افواج بے مثال جنگ لڑ رہی ہے، قربانیوں کی لامتناہی داستان رقم ہوئی، ماضی سکھاتا ہے، امریکا پر اعتماد میں احتیاط کی جائے۔
وزیر خارجہ کا کہنا تھا کہ جسے آپ دشمن سمجھتے تھے، اسے ہم نے دشمن سمجھا، ہم نے گوانتانا موبے کو بھر دیا، ہم آپ کی خدمت میں اتنے مگن ہوئے کہ پورے ملک کو دس سال تک لوڈشیڈنگ اور گیس شارٹیج کے حوالے کردیا۔
خواجہ آصف کا کہنا تھا کہ اس جنگ میں ہماری معیشت برباد ہوگئی، لیکن خواہش تھی آپ راضی رہیں، ہم نے لاکھوں ویزے پیش کیے، بلیک واٹر، ریمنڈ ڈیوس نیٹ ورک جگہ جگہ پھیل گئے۔
انھوں نے امریکی دھمکی کے جواب میں سخت موقف اختیار کرتے ہوئے کہا آپ پوچھتے ہیں کہ ہم نے کیا کیا؟ ایک آمر نے فون کال پر سر نڈر کیا، وطن کو بارود و خون سے نہلایا۔
یہ بھی پڑھیں: پہلے ٹرمپ اپنے لوگوں سے 15 سالہ ناکامیوں کا حساب لیں: خواجہ آصف
خواجہ آصف نے امریکا سے کہا کہ افغانستان پر اپنے اڈوں سے تمھارے 57800 حملے، ہماری گزرگاہوں سے تمھارا اسلحہ اور بارود گیا، ہزاروں سویلین، فوجی، بریگیڈیر، جنرل، جواں سال لیفٹیننٹ آپ کی چھیڑی جنگ کی بھینٹ چڑھ گئے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
