Tag: ٹریفک حادثہ

کراچی: شہر قائد میں ٹریلر نے مزید 2 نوجوانوں کو کچل کر مار ڈالا۔

تفصیلات کے مطابق کراچی میں شہریوں کے ہیوی گاڑیوں کا نشانہ بن کر جان سے ہاتھ دھو بیٹھنے کے واقعات تسلسل سے جاری ہیں، اگرچہ گزشتہ شب نارتھ کراچی کے واقعے کے بعد 11 ہیوی گاڑیاں اور واٹر ٹینکر جلا دیے گئے ہیں، تاہم دو مزید واقعات بھی رپورٹ ہوئے ہیں۔

کورنگی ویٹا چورنگی پر ٹریلر کی ٹکر سے عدنان نامی شہری جاں بحق ہو گیا ہے، پولیس نے ڈرائیور کو گرفتار کر لیا ہے، حادثے کے بعد شہریوں نے ٹریلر کے شیشے توڑ ڈالے، معلوم ہوا ہے کہ مرحوم عدنان نجی کمپنی میں سیکیورٹی سپروائزر تھا۔

دوسرے واقعہ مانسہرہ کالونی لانڈھی میں پیش آیا، جس میں ایک ٹریلر کی موٹر سائیکل کو ٹکر کے نتیجے میں 25 سال کا مسعود خان جاں بحق ہو گیا، پولیس نے اس واقعے میں بھی ٹریلر ڈرائیور کو گرفتار کر لیا ہے۔

نارتھ کراچی حادثہ : مشتعل افراد نے 10 ٹرک اور ڈمپروں کو جلا دیا

واضح رہے کہ کراچی میں رات گئے مشتعل افراد نے 5 ڈمپرز سمیت 11 گاڑیوں کو آگ لگا دی ہے، نارتھ کراچی پاور ہاؤس چورنگی پر ڈمپر کی ٹکر سے موٹر سائیکل سوار زخمی ہو گیا تھا، پولیس کے مطابق ڈمپر ڈرائیور ناگن چورنگی سے مختلف گاڑیوں کو ٹکریں مارتا ہوا آ رہا تھا، حادثے کے بعد مشتعل افراد نے پاور ہاؤس کے قریب پانچ ڈمپروں کو آگ لگائی۔

مدیحہ اسٹاپ پر پانی کے 3 ٹینکروں اور ٹرک کو بھی آگ لگائی گئی، سرجانی ٹاؤن بابا موڑ پر بھی ٹینکر نذر آتش کیا گیا، مشتعل افراد نے ڈمپر مافیا کے خلاف احتجاج بھی کیا، جسے پولیس نے منتشر کر دیا، دوسری طرف گاڑیاں جلائے جانے پر ڈمپر مالکان نے بھی احتجاج کیا، جسے پولیس سے مذاکرات کے بعد ختم کر دیا گیا۔

کراچی: شہر قائد کے علاقے مائی کلاچی میں مال گاڑی اور آئل ٹینکر سے ٹکرانے والے تیز رفتار ٹرالر کا ڈرائیور گرفتار نہ ہو سکا۔

تفصیلات کے مطابق کراچی میں مائی کلاچی پھاٹک پر مال گاڑی اور ٹریلر میں ٹکر کا مقدمہ سرکار کی مدعیت میں ڈاکس تھانے میں درج کر لیا گیا ہے، ایف آئی آر میں ٹرالر کے ڈرائیور کو قصور وار ٹھہرایا گیا ہے۔

جمعہ کو نیٹی جیٹی پل سے آنے والا تیز رفتار ٹرالر مال گاڑی سے ٹکرایا تھا، ٹرالر مخالف سمت سے آنے والے آئل ٹینکر سے بھی ٹکرایا، ایف آئی آر کے متن کے مطابق ٹرالر کی ٹکر سے پاکستان ریلوے کے انجن کو نقصان پہنچا ہے۔

حادثے میں آئل ٹینکر کا ڈرائیور عبد الستار شدید زخمی ہوا، جب کہ ٹرالر ڈرائیور موقع سے فرار ہوا، پولیس حکام کا کہنا ہے کہ ڈرائیور کی گرفتاری کے لیے کوششیں جاری ہیں۔

دن میں ہیوی ٹریفک برقرار، قذافی برج کے اوپر لوڈ ٹرالر الٹ گیا

کراچی میں دن کے اوقات میں بھی ہیوی ٹریفک کا سڑکوں پر راج برقرار ہے، آج صبح 8 بجے یونس چورنگی سے منزل پمپ قذافی برج کے اوپر ایک کنٹینر لوڈ ٹرالر الٹ گیا ہے، جس سے ٹریفک کی روانی متاثر ہو گئی ہے۔

یکم جنوری سے اب تک سال رواں میں کراچی میں قاتلوں کی طرح دندناتے ڈمپروں، ٹینکروں، ٹرکوں اور بسوں نے 100 سے زیادہ شہریوں کو موت کے گھاٹ اتار دیا ہے، جب کہ درجنوں زخمی اور کئی زندگی بھر کے لیے معذور ہو چکے ہیں۔

بدمست ٹینکروں کو قابو کرنے کے لیے حکومت کی جانب سے ہیوی ٹریفک کے دن کے اوقات میں شہر میں داخلے پر پابندی بھی عائد کی گئی ہے لیکن حادثات نہیں رک سکے ہیں۔