کراچی: شارع فیصل پر شادی سے واپس آنے والی گاڑی روکنے پر فائرنگ سے ٹریفک پولیس اہل کار زخمی ہونے والے معاملے میں فیروز آباد پولیس نے 2 سیکورٹی گارڈز کو گرفتار کر لیا۔
تفصیلات کے مطابق کراچی میں شارع فیصل پر 2 روز قبل ٹریفک اہل کار اور سیکورٹی گارڈ کے درمیان تلخ کلامی کے دوران فائرنگ سے ٹریفک پولیس اہل کار زخمی ہو گیا تھا، پولیس نے اقدام قتل سمیت متعدد دفعات کے تحت مقدمہ درج کرنے کے بعد دو سیکورٹی گارڈز ناصر اور شبیر کو گرفتار کر لیا۔
پولیس کا کہنا ہے کہ فائرنگ سے ٹریفک اہل کار شاہد اور سیکورٹی گارڈ ناصر زخمی ہوئے تھے۔ سیکورٹی گارڈز کو ریمانڈ کے لیے آج عدالت میں پیش کیا جائے گا، ملزمان سے ٹرپل ٹو رائفل اور نائن ایم ایم پستول کے 2 میگزین ملے تھے، ٹریفک پولیس اہل کار شاہد کے پاس بھی نائن ایم ایم پستول تھی، گارڈز اور ٹریفک پولیس اہل کار کا اسلحہ فرانزک کے لیے بھیجا جا رہا ہے۔
قبل ازیں، ایف آئی آر کے متن میں لکھا گیا کہ شادی سے واپس آنے والی گاڑی کو روکنے پر متعدد افراد نے ٹریفک اہل کار پر تشدد کیا اور مسلح شخص نے فائرنگ کی، فائرنگ بی ایم ڈبلیو میں سوار گارڈ نے کی جس سے اہل کار زخمی ہوا۔
پولیس رپورٹ کے مطابق فائرنگ شادی سے واپس آنے والی گاڑی کو روکنے پر کی گئی، اس دوران مسلح شخص نے پستول سے فائرنگ کی، تشدد کرنے والے 10 سے زائد افراد میں سے 2 مسلح تھے، فائرنگ سے ٹریفک اہل کار زخمی ہوا تو اسے فوری طبی امداد کے لیے ساتھی اہل کار نے جناح اسپتال منتقل کیا۔
پولیس کا کہنا ہے کہ مقدمے میں اقدام قتل سمیت دیگر دفعات شامل کی گئی ہیں، مقدمہ بہادر آباد تھانے میں زخمی اہل کار شاہد کی مدعیت میں درج کیا گیا، واقعے کی تحقیقات کا آغاز کر دیا گیا ہے۔
