بھارت میں مغربی بنگال کی عدالت نے آج آر جی کر میڈیکل کالج کی ٹرینی ڈاکٹر سے عصمت دری و قتل کے معاملے میں مجرم کو سزا سنادی۔
بھارتی میڈیا رپورٹس کے مطابق عدالت نے اس عصمت دری و قتل کے معاملے میں قصوروار قرار دیے گئے سنجے رائے کو عمر قید کی سزا سنادی، ساتھ ہی عدالت نے سنجے پر 50 ہزار روپے کا جرمانہ بھی عائد کردیا۔
رپورٹس کے مطابق مجرم سنجے رائے کے لیے متاثرہ ٹرینی ڈاکٹر کے والد نے سزائے موت کا مطالبہ کیا تھا، لیکن عدالت نے اس معاملہ میں دی جانے والی کم از کم سزا یعنی تاحیات قید کی سزا سنائی۔
عدالت کی جانب سے مغربی بنگال حکومت کو حکم دیا کہ وہ زیادتی و قتل کا نشانہ بننے والی لڑکی کی فیملی کو 17 لاکھ روپے کا معاوضہ ادا کرے۔
عدالت کی جانب سے سزا سنائے جانے کے وقت سنجے رائے بار بار یہی کہتا دکھائی دیا کہ ”میں قصوروار نہیں ہوں۔ مجھے پھنسایا جا رہا ہے۔ میں نے کوئی جرم نہیں کیا ہے۔“
بھارتی میڈیا کے مطابق ملزم خود کو بے قصور بتا رہا تھا۔ آج عدالت میں جب سنجے کو پیش کیا گیا تو جج نے اس سے کہا کہ تم قصوروار ہو، کیا سزا پر تمھیں کچھ کہنا ہے؟ جواب میں سنجے کا کہنا تھا کہ میں قصوروار نہیں ہوں۔ مجھے جان بوجھ کر اس کیس میں پھنسایا گیا ہے۔
ایران میں مسلح افراد کی فائرنگ سے 2 جج جاں بحق
یاد رہے کہ عدالت کی جانب سے 18 جنوری کو جب سنجے رائے کو آر جی کر عصمت دری و قتل معاملہ میں قصوروار قرار دیا تھا، تو اس وقت ہی واضح کر دیا تھا کہ اس معاملے میں زیادہ سے زیادہ سزا ’موت‘ اور کم از کم سزا عمر قید ہو سکتی ہے۔
