Tag: ٹورازم کارپوریشن خیبر پختونخوا

پشاور : ٹورازم کارپوریشن خیبر پختونخواہ اور ایڈوانچر ایجز کلب کے زیراہتمام زِپ لائننگ کا پہلا ایونٹ 18 فروری کو منعقد ہوگا جس میں نوجوان 40 فٹ کی بلندی سے زِپ لائننگ کرتے ہوئے نیچے 10 فٹ کی بلندی تک آئیں گے۔

تفصیلات کے مطابق خیبر پختونخواہ کی تاریخ میں پہلی مرتبہ ٹورازم کارپوریشن خیبرپختونخواہ اور ایڈونچر ایجزکلب کے باہمی اشتراک سے نوجوان مرد و خواتین کے لیے دو روزہ زِپ لائننگ ایونٹ منعقد کرنے کافیصلہ کیا گیا ہے جس کا آغاز 18 فروری کو ہوگا۔

یہ فیصلہ ٹورازم کارپوریشن کے کانفرنس روم میں منعقدہ اجلاس میں کیا گیا جس میں سیکرٹری محکمہ سیاحت محمد طارق، منیجنگ ڈائریکٹر مشتاق احمد خان، جنرل منیجر ایڈمن اینڈ پراپرٹیز سجاد حمید،ایڈونچر ایجزکلب کے خالد سمیت دیگر شخصیات نے شرکت کی۔

اس حوالے سے منیجنگ ڈائریکٹر مشتاق احمد خان نے بتایا کہ ٹورازم کارپوریشن خیبرپختونخواہ اور ایڈونچر ایجز کلب نے صوبے کے نوجوانوں کو ایڈونچر سے تعلق رکھنے والے اسپورٹس اور سرگرمیاں اپنے ہی شہر پشاور میں فراہم کرنے کا فیصلہ کیا ہے جس کا پہلا ایونٹ حیات آباد اسپورٹس کمپلیکس میں منعقد کیا جائے گا۔

خیال رہے کہ زِپ لائننگ کا ایونٹ اب تک خیبر پختونخواہ کے کسی بھی مقام پر نہیں ہوا جب کہ دوسری جانب ملک کے دیگر صوبوں میں یہ سہولت میئسر ہے اس لیے کے پی کے کھلاڑیوں کو اسلام آباد، لاہور ، کراچی اور دیگر شہروں کا رخ کرنا پڑتا تھا تاہم اب یہ کھلاڑی اپنے ہی صوبے میں زِپ لائننگ کرسکیں گے۔

مشتاق احمد خان نے مزید کہا کہ اس ایونٹ میں نوجوان 40 فٹ کی بلندی سے زِپ لائننگ کرتے ہوئے 10فٹ کی بلندی تک آئیں گے اور اس دوران 100 میٹر کا فاصلہ طے کریں گے جس کے لیے اسٹیل وائر استعمال کی جائے گی جو کہ ایک وقت میں 4 ٹن وزن برداشت کرسکتی ہے تاہم اس پر 100 کلوگرام وزن تک کے شخص کو زِپ لائننگ کرائی جائے گی۔

جب کہ زِپ لائننگ کا دوسرا ایونٹ 25 اور 26 فروری کو اور تیسرا و آخری ایونٹ 4 اور 5 مارچ کو حیات آباد اسپورٹس کمپلیکس میں ہی منعقد ہوگا جس میں شرکت کے خواہش مند کھلاڑی 03339307384 پر رابطہ کر سکتے ہیں اور اپنے ناموں کا اندراج کروا سکتے ہیں۔

دریں اثناء سیکرٹری محمد طارق کا کہنا تھا کہ ہماری کوشش ہے کہ صوبہ کے نوجوانوں کو سیاحت کے ساتھ ساتھ زیادہ سے زیادہ ایڈ ونچرز اور کھیلوں کی سرگرمیوں کے مواقع فراہم کیے جائیں گے جس سے قبل رافٹنگ، پیراگلائیڈنگ اور دیگر ایڈونچر ایونٹس کا انعقاد بھی کیا جائے گا۔

یاد رہے زِپ لائننگ زیادہ تر دو پہاڑوں کے مابین کی جاتی ہے جس کا اصل مزہ زیادہ سے زیادہ اونچائی پر آتا ہے تاہم کھلے میدان کی سطح پر دیگر شہروں کی طرح اب پشاور میں بھی زِپ لائننگ کا ایونٹ منعقد ہوگا۔