ARYNews.tv | Urdu – Har Lamha Bakhabar

Tag: ٹوکیو

  • دنیا کے کھیلوں کے سب سے بڑے میلے اولمپکس کا ٹوکیو میں رنگارنگ آغاز

    دنیا کے کھیلوں کے سب سے بڑے میلے اولمپکس کا ٹوکیو میں رنگارنگ آغاز

    ٹوکیو: دنیا کے کھیلوں کے سب سے بڑے میلے اولمپکس کا ٹوکیو میں رنگارنگ آغاز ہو گیا، بغیر تماشائیوں کے افتتاحی تقریب میں فن کاروں نے شان دار پرفارمنس پیش کی۔

    تفصیلات کے مطابق کئی برسوں کی تیاریوں اور رکاوٹوں کے بعد جمعہ کے روز جاپان کے معیاری وقت کے مطابق شب 8 بجے سے ٹوکیو اولمپکس کا باضابطہ آغاز ہو گیا ہے، تقریب میں 950 غیر ملکی معززین، سفارت کاروں، اسپانسرز اور انٹرنیشنل اولمپک کمیٹی کے ارکان نے شرکت کی۔

    کرونا وائرس کی جاری وبا کے باعث منتظمین بے حد مصروف ہیں، کھیلوں کے انعقاد کے زیادہ تر مقامات پر تماشائیوں کی آمد ممنوع ہے، اور شریک کھلاڑیوں پر سخت پابندیاں عائد ہیں۔

    207 ممالک اور خطوں کے 11 ہزار سے زائد کھلاڑی 33 کھیلوں کے مقابلوں میں 339 میڈلز کے لیے قسمت آزمائیں گے۔ بیڈمنٹن پلیئر ماحور شہزاد اور شوٹر خلیل اختر نے سبز ہلالی پرچم تھامے مارچ پاسٹ میں قومی دستے کی رہنمائی کی، کھیلوں کا یہ عالمی ایونٹ 8 اگست تک جاری رہے گا۔

    واضح رہے کہ جاپانی دارالحکومت میں اس وقت چوتھی ہنگامی حالت نافذ ہے، کھلاڑیوں اور کھیلوں کے عہدے داروں میں پہلے ہی درجنوں کرونا متاثرین کی تصدیق کی جا چکی ہے، منتظمین نے جمعہ کے روز بتایا کہ جمہوریہ چیک اور ہالینڈ سے آنے والے 3 کھلاڑیوں کا ٹوکیو پہنچنے کے بعد کرونا وائرس کا ٹیسٹ مثبت آیا ہے۔

    یکم جولائی سے اب تک کھیلوں سے متعلقہ مصدقہ متاثرین کی کل تعداد 106 ہو گئی ہے۔

    افتتاحی تقریب کے حوالے سے بھی ایک تنازعہ سامنے آیا تھا، اس تقریب کے ڈائریکٹر کو 1990 کے عشرے میں ہولوکاسٹ کے بارے میں دیے گئے بیان کے باعث، تقریب سے ایک دن قبل سبک دوش کر دیا گیا تھا۔

    اس سے قبل ایک موسیقار اس وجہ سے مستعفی ہوئے کیوں کہ انھیں دور طالب علمی میں اپنے ہم جماعتوں سے بدسلوکی کرنے پر تنقید کا سامنا کرنا پڑا تھا، ان ہم جماعتوں میں سے کچھ معذور بھی تھے۔

    دریں اثنا اولمپک مشعل وسطی ٹوکیو پہنچ چکی ہے، جہاں بلدیہ عظمیٰ کی سرکاری عمارت میں اس کا استقبال کیا گیا، ملک بھر میں اس کا طویل سفر مارچ میں فوکوشیما سے شروع ہوا تھا۔

  • کیا رواں برس اولمپک گیمز منعقد ہوں گے؟

    کیا رواں برس اولمپک گیمز منعقد ہوں گے؟

    ٹوکیو: سال 2020 میں ہونے والے ٹوکیو اولمپکس کی نئی تاریخ طے کرلی گئی، اولمپک گیمز اب جولائی 2021 میں ہوں گے۔

    بین الاقوامی ویب سائٹ کے مطابق انٹرنیشنل اولمپک کمیٹی (آئی او سی) کے سربراہ تھامس بیخ نے ایک انٹرویو میں کہا ہے کہ کرونا وائرس کی وجہ سے تاخیر کا شکار ہونے والے ٹوکیو اولمپکس رواں سال موسم گرما میں منعقد ہوں گے، اور اس حوالے سے کوئی پلان بی نہیں ہے۔

    آئی او سی کے سربراہ کا کہنا تھا کہ ہم ان کھیلوں کو محفوظ اور کامیاب بنانے کے لیے پوری طرح پرعزم ہیں۔

    دوسری جانب جاپان میں اولمپکس کے انعقاد کے حوالے سے عوامی حمایت میں کمی آئی ہے۔ ایک حالیہ پول کے مطابق 80 فیصد سے زائد افراد کا کہنا ہے کہ گیمز کو منسوخ یا دوبارہ سے ملتوی کر دینا چاہیئے۔

    ٹوکیو اولمپکس کے سی ای او توشیرو موتو کا کہنا ہے کہ منتظمین اس موسم گرما میں کھیلوں کا انعقاد کروانے کے لیے پرعزم دکھائی دیے اور ایونٹ کی منسوخی پر بات نہیں کی گئی۔

    تاہم انہوں نے تسلیم کیا کہ وہ اس بات کی ضمانت نہیں دے سکتے کہ اسٹینڈ تماشائیوں سے بھرے ہوں گے یا تماشائیوں کے بغیر ہوں گے۔

    رواں موسم بہار میں اس حوالے سے فیصلہ ہوگا کہ آیا غیر ملکی شائقین ٹوکیو اولمپکس میں شرکت کرنے کے اہل ہوں گے، اور کتنے تماشائیوں کو ان کھیلوں کے مقابلے دیکھنے کی اجازت دی جائے گی۔

    یاد رہے کہ ٹوکیو اولمپکس مارچ 2020 میں ہونے والے تھے جسے کرونا وائرس کے پھیلاؤ کے باعث مؤخر کر کے اگست میں منعقد کرنے کا اعلان کیا گیا تاہم اس وقت بھی ایونٹ کا انعقاد نہیں ہوسکا۔

    اب ٹوکیو اولمپکس کی نئی تاریخ 23 جولائی تا 8 اگست 2021 رکھی گئی ہے۔

  • ایوارڈ یافتہ جاپانی اداکارہ گھر میں مردہ پائی گئیں

    ایوارڈ یافتہ جاپانی اداکارہ گھر میں مردہ پائی گئیں

    ٹوکیو: ایوارڈ یافتہ جاپانی اداکارہ یوکو ٹیکوچی ٹوکیو میں اپنے گھر میں مردہ حالت میں پائی گئیں۔

    غیر ملکی میڈیا کے مطابق جاپانی اداکارہ یوکو ٹیکوچی اپنے گھر میں مردہ حالت میں پائی گئیں ہیں، پولیس نے تحقیقات کا آغاز کرتے ہوئے شبہ ظاہر کیا ہے کہ 2 بچوں کی ماں ٹیکوچی نے خود کشی کی ہے۔

    میڈیا رپورٹس میں بتایا گیا ہے کہ اداکارہ کی لاش سب سے پہلے ان کے شوہر نقابایشی نے دیکھی تھی، جس پر انھوں نے پولیس کو اطلاع دی اور پھر اسپتال منتقلی کے بعد ڈاکٹروں نے ان کی موت کی تصدیق کر دی۔

    واضح رہے کہ حال ہی میں متعدد جاپانی فلمی اسٹارز خود کشی کر چکے ہیں، تاہم ٹیکوچی کی موت کے بارے میں ابھی خود کشی کی تصدیق نہیں ہو سکی ہے، جاپانی میڈیا کے مطابق رواں ماہ کے آغاز میں اداکارہ سی اشینہ، جولائی میں اداکار ہروما میورا اور مئی میں ریسلنگ اسٹار ہانا کمورا نے بھی خود کشی کی تھی۔

    جاپانی اداکارہ یوکو ٹیکوچی

    یوکو ٹیکوچی کی پروموشن ایجنسی نے ان کی موت کی خبر کو حیران کن اور غمگین قرار دیا،اداکارہ کی عمر 40 برس تھی، انھوں نے 2004 سے 2007 کے درمیان لگاتار تین سال تک جاپان کے اکیڈمی ایوارڈز میں بہترین اداکارہ کا اعزاز حاصل کیا۔

    1998 میں جب ان کی جاپانی ڈراؤنی فلم ’رنگو‘ ریلیز ہوئی تو ان کی شہرت کو چار چاند لگ گئے، ہالی ووڈ نے بھی اس فلم کو 2002 میں دی رنگ کے ٹائٹل سے پروڈیوس کیا۔ یوکو ٹٰیکوچی 2018 میں مس شرلاک سیریز میں بھی لیڈی شرلاک ہومز کا کردار نبھا چکی ہیں، جس سے ان کی شہرت امریکا سمیت دیگر ممالک میں پھیل گئی۔

    خیال رہے کہ جاپان میں خود کشی کی شرح دنیا میں سب سے زیادہ ہے لیکن عالمی ادارہ صحت کے مطابق 2015 میں انسدادی اقدامات متعارف کرائے جانے کے بعد جاپان میں خود کشی کے واقعات میں کمی آئی ہے۔

  • کیا یہ خوبصورت آتش بازی اولمپکس 2020 کی افتتاحی تقریب کی ہے؟

    کیا یہ خوبصورت آتش بازی اولمپکس 2020 کی افتتاحی تقریب کی ہے؟

    جاپانی دارالحکومت ٹوکیو میں آتش بازی کی ایک وائرل ویڈیو کی حقیقت سامنے آگئی، آتش بازی کو اولمپکس 2020 کی افتتاحی تقریب میں کی جانے والی آتش بازی قرار دیا جارہا تھا۔

    گزشتہ چند دن سے سوشل میڈیا پر ٹوکیو میں کی جانے والی آتش بازی کی ایک ویڈیو بے حد وائرل ہورہی ہے، ویڈیو میں جاپان کی سب سے بلند پہاڑی ماؤنٹ فیوجی پر رنگین آتش بازی سے آسمان روشن دکھائی دے رہا ہے۔

    ویڈیو میں پس منظر میں بجتی موسیقی دیکھنے والوں کو مسحور کر رہی ہے۔

    سوشل میڈیا پر کہا گیا کہ یہ آتش بازی 2020 کے اولمپکس کھیلوں کی افتتاحی تقریب میں کی جانی تھی تاہم کرونا وائرس کی وجہ سے اولمپک گیمز کو ایک سال کے لیے ملتوی کردیا گیا، اولمپک گیمز اب 23 جولائی 2021 سے شروع ہوں گے۔

    ویڈیو کے حوالے سے کہا گیا کہ اس آتش بازی کو مزید ایک سال تک محفوظ رکھنا خطرناک ثابت ہوسکتا تھا چنانچہ حکام نے فیصلہ کیا کہ انہیں استعمال کرلیا جائے۔

    اسی آتش بازی کے خوبصورت مظاہرے کی ویڈیو سوشل میڈیا پر وائرل ہوگئی تاہم جلد ہی یہ ویڈیو جعلی ثابت ہوئی۔

    بین الاقوامی ویب سائٹس کے مطابق اس ویڈیو کے کچھ فریمز سنہ 2015 کی ایک ویڈیو سے مماثل ہیں، یہ ویڈیو 2015 میں ماؤنٹ فیوجی پر کی جانے والی اس آتش بازی کی ہے جو اقوام متحدہ کی جانب سے ماؤنٹ فیوجی کو عالمی ورثہ قرار دیے جانے کی خوشی میں کی گئی۔

    اولمپکس آتش بازی والی وائرل ویڈیو کے متعدد فریمز 2015 کی اس ویڈیو سے لیے گئے، بعد ازاں فائر ورک سیمولیٹر نامی ایک ویب سائٹ سے اس ویڈیو کو مکمل طور پر تخلیق کیا گیا۔

    دوسری جانب جاپانی میڈیا کے مطابق 24 جولائی کو جاپان کے 121 مقامات پر آتش بازی کا اہتمام کیا گیا تھا، یہ آتش بازی اسی روز کی گئی جب ملتوی شدہ اولمپکس 2020 کا آغاز ہونا تھا۔

    البتہ یہ آتش بازی نہ تو ویڈیو میں دکھائی گئی آتش بازی جیسی تھی، اور نہ ہی یہ وہ آتش بازی تھی جو اولمپکس 2020 کی افتتاحی تقریب کے لیے تیار کی گئی تھی۔

    ہجوم جمع ہونے سے روکنے کے لیے مذکورہ ایونٹس کے وقت و مقام خفیہ رکھے گئے تھے۔

  • ٹوکیو اولمپکس کا انعقاد سوالیہ نشان بن گیا

    ٹوکیو اولمپکس کا انعقاد سوالیہ نشان بن گیا

    ٹوکیو: جاپان میں کرونا وائرس کے باعث ملتوی ہونے والے اولمپکس کا انعقاد اب سوالیہ نشان بن چکا ہے۔

    تفصیلات کے مطابق جاپان میڈیکل ایسوسی ایشن نے خدشہ ظاہر کیا ہے کہ 2021 میں بھی اولمپکس کا انعقاد مشکل ہے، وبا پر قابو نہیں پایا گیا تو میگا ایونٹ منسوخ ہوسکتا ہے۔

    ایسوسی ایشن کا کہنا ہے کہ کروناویکسین کی دریافت تک حتمی فیصلہ کرنا مشکل ہے، اولمپکس کو 2021 سے آگے نہیں بڑھا سکتے، وبا 2021 تک رہی تو اولمپکس منسوخ کرنا پڑیں گے۔

    ٹوکیو اولمپکس کی نئی تاریخوں کا اعلان کردیا گیا

    خیال رہے کہ کرونا وائرس کے باعث ملتوی ہونے والے اولمپکس کی نئی تاریخیں مقرر کی گئی ہیں۔ جس کے مطابق ٹوکیو اولمپکس 23 جولائی سے 8 اگست 2021 میں ہوں گے، پہلے یہ مقابلے رواں برس 24 جولائی میں شیڈول تھے۔

    البتہ اب جاپان میڈیکل ایسوسی ایشن نے نئی تاریخوں پر بھی سوالات اٹھادیے ہیں۔ اسپورٹ تجزیہ کاروں کا کہنا ہے کہ مستقبل میں اولمپکس کا انعقاد مشکل ہے، اس کی بڑی وجہ بے قابو مہلک وائرس ہے۔

  • پی آئی اے کی خصوصی پرواز جاپان کے لیے آج روانہ ہوگی

    پی آئی اے کی خصوصی پرواز جاپان کے لیے آج روانہ ہوگی

    اسلام آباد: پی آئی اے کی خصوصی پرواز جاپان کے دارالحکومت ٹوکیو کے لیے آج روانہ ہوگی،خصوصی پرواز جاپانی سفارت خانے کا سامان بھی لےکر جائے گی۔

    تفصیلات کے مطابق کرونا وائرس کے باعث لاک ڈاؤن میں پھنسے جاپانی شہریوں کو ان کے وطن واپس پہنچانے کے لیے قومی ایئر لائن (پی آئی اے ) کی ایک خصوصی پرواز آج ٹوکیو کے لیے روانہ ہوگی۔

    کراچی ایئر پورٹ پر پرواز پی کے8855 سے جانے والےمسافروں کی آمد کا سلسلہ جاری ہے، جاپانی سفارت خانے کی فہرست کے مطابق بورڈنگ پاس دیے جائیں گے۔

    پی آئی اے کے اسٹیشن منیجر کی نگرانی میں مسافروں کی بورڈنگ شروع ہوگئی،خصوصی پرواز جاپانی شہریوں کو لے کر کراچی سے براستہ اسلام آباد ٹوکیو روانہ ہوگی، 85 سے زائد جاپانی شہری ایئر بس 320 طیارے سے اسلام آباد پہنچیں گے، اسلام آباد میں پی آئی اے کا طیارہ تبدیل کیا جائے گا۔

    بوئنگ777طیارے کی پرواز 200 سے زائد جاپانی شہری لے کر ٹوکیو روانہ ہوگی، خصوصی پرواز جاپانی سفارت خانے کا سامان بھی لے کر جائے گی۔

    پی آئی اے نے ہم وطنوں کیلئے ریلیف فلائٹس میں‌ اضافہ کردیا

    دوسری جانب بیرون ملک سے پاکستانیوں کو واپس لانے کےلیے قومی ایئر لائن نے ریلیف فلائٹس میں اضافہ کردیا، جس کے بعد خصوصی پرواز کے لیے آزربائیجان سے ہم وطنوں کو واپس وطن لایا جائے گا۔

  • ٹوکیو اولمپکس2020: پاکستان کے لیے ایک اور بڑا اعزاز

    ٹوکیو اولمپکس2020: پاکستان کے لیے ایک اور بڑا اعزاز

    دوحہ: پاکستان نے شوٹنگ میں ایک اور اولمپک کوٹہ جیت لیا، ایشین چمپئن شپ کے ائیر پسٹل ایونٹ میں گلفام جوزف نے شاندار کارکردگی کے بعد ٹوکیو اولمپکس 2020 تک رسائی حاصل کرلی۔

    تفصیلات کے مطابق پاکستان کے تین شوٹرز اولمپکس کا ٹکٹ حاصل کرچکے ہیں، قطر کے شہر دوحہ میں ایشین شوٹنگ چمپئن شپ جاری ہے جہاں پاکستان کے 19سالہ گلفام جوزف نے ائیر پسٹل ایونٹ کی فائنل فہرست میں جگہ بنا کر اولمپک کوٹہ حاصل کرلیا ہے۔

    گلفاز جوزف نے پہلی بار کسی انٹرنیشنل ایونٹ میں شرکت کی اور شاندار کارکردگی کے بعد ٹوکیو اولمپک کا ٹکٹ جیت لیا۔ نیشنل رائفل ایسوسی ایشن آف پاکستان کے سیکرٹری رضی احمد نے بتایا کہ یہ پہلا موقع ہے کہ پاکستان کے تین شوٹرز نے اولمپکس تک رسائی حاصل کی ہے، خلیل اختر اور غلام مصطفی بشر پہلے ہی اولمپک کوٹہ جیت چکے ہیں۔

    پاک آرمی کے شوٹر نے ٹوکیو اولمپکس کے لیے کوالیفائی کرلیا

    ان کا کہنا تھا کہ ماضی میں پاکستان شوٹرز نے اولمپکس میں شرکت تو کی ہے لیکن ان تمام شوٹرز نے وائلڈ کارڈ انٹری کی بدولت اولمپکس تک رسائی حاصل کی تھی جبکہ اولمپک کوٹہ ورلڈ کپ یا ایشین چیمپئن شپ پوائنٹس لینے کے بعد کھلاڑی کو یہ عزاز حاصل ہوتا ہے۔

    پاکستانی شوٹر کا بڑا کارنامہ، ٹوکیو اولمپکس 2020 میں جگہ بنالی

    رضی احمد نے مزید کہا کہ وائلڈ کارڈ انٹری انٹرنیشنل اولمپکس کمیٹی دیتی ہے جس کا انحصار کارکردگی پر نہیں ہوتا جبکہ اولمپک کوٹہ کے لیے کھلاڑی کو انٹرنشینل سطح پر پرفارم کرنا ہوتا ہے جس کے بعد وہ اولمپکس تک رسائی حاصل کرتا ہے، اس وجہ سے یہ پہلا موقع ہے کہ پاکستان کے تین شوٹرز اپنی کارکردگی کی بنیاد پر اولمپکس میں حصہ لیں گے۔

  • پاکستانی شوٹر کا بڑا کارنامہ، ٹوکیو اولمپکس 2020 میں جگہ بنالی

    پاکستانی شوٹر کا بڑا کارنامہ، ٹوکیو اولمپکس 2020 میں جگہ بنالی

    لاہور: کھیل کی دنیا سے پاکستان کے لیے ایک اور خوش خبری سامنے آگئی، باصلاحیت شوٹر بشیر نے ٹوکیو اولمپکس دوہزاربیس کے لیے کوالیفائی کرلیا۔

    تفصیلات کے مطابق جی ایم بشیر ٹوکیو اولمپک میں جگہ بنانے والے دوسرے پاکستانی شوٹر ہیں، رواں سال 2 ستمبر کو پاک آرمی کے شوٹر خلیل اختر نے اسی اولمپک کے لیے کوالیفائی کیا۔

    جی ایم بشیر نے پچیس میٹرر یپڈفائر ایونٹ کے لیے کوالیفائی کیا ہے، ایشین شوٹنگ چیمپئین شپ میں عمدہ کارکردگی دکھانے پر پاکستانی بشیر کو اولمپک میں جگہ ملی۔

    خیال رہے کہ قطری دارالحکومت دوحہ میں ایشین شوٹنگ چیمپئن شپ میں غلام مصطفی بشیر نے رپٹ فائر پسٹل ایونٹ میں شاندار کھیل کا مظاہرہ کیا اور پانچویں پوزیشن حاصل کی تھی جس کی بنیاد پر انہیں ٹوکیو اولمپکس کا کوٹہ مل گیا۔

    اولمپک کے لیے کوالیفائی کرنے والے پاکستان شوٹر کا تعلق پاکستان نیوی سے ہے، وہ ریو اولمپکس میں بھی پاکستان کی نمائندگی کرچکے ہیں، جہاں غلام مصطفیٰ نے پاکستانی پرچم اٹھا کر مارچ پاسٹ میں حصہ لیا تھا۔

    پاک آرمی کے شوٹر نے ٹوکیو اولمپکس کے لیے کوالیفائی کرلیا

    یاد رہے کہ ستمبر میں ریوڈی جنیرو میں ہونے والے عالمی شوٹنگ کپ کی ریپڈ فائر پسٹل کیٹگری میں خلیل اختر نے چھٹی پوزیشن پر رہتے ہوئے ٹوکیو اولمپکس کا ٹکٹ حاصل کیا۔

  • سمندری طوفان ہیگی جاپان کے ساحل سے ٹکرا گیا، 18 افراد ہلاک، درجنوں لاپتہ

    سمندری طوفان ہیگی جاپان کے ساحل سے ٹکرا گیا، 18 افراد ہلاک، درجنوں لاپتہ

    ٹوکیو: سمندری طوفان ہیگی نے جاپان میں تباہی مچادی جس کے نتیجے میں کئی شہروں میں سیلابی صورت حال پیدا ہوگئی، بجلی، مواصلات کا نظام درہم برہم جبکہ 18 افراد ہلاک ہوچکے ہیں۔

    تفصیلات کے مطابق جاپان میں سمندری طوفان ہیگی ساحلی علاقوں سے ٹکرا نے کے نتیجے میں18افراد ہلاک جبکہ متعدد افراد اب بھی لاپتہ ہیں، متعدد پروازیں منسوخ ہوگئیں، ڈیڑھ لاکھ گھروں کو بجلی کی فراہمی معطل ہوگئی ہے۔

    غیر ملکی خبر رساں ادارے کا کہنا تھا کہ جاپانی حکومت نے متاثرین کو ریسکیو کرنے کےلیے 27 ہزار فوجیوں کو متاثرہ علاقوں میں ریلیف آپریشن کےلیے بھیج دیا ہے۔

    جاپانی وزیر اعظم شینزو آبے کا کہنا ہے کہ حکومت متاثرین کی امداد کےلیے ہر ممکن کوشش کررہی ہے، میں وعدہ کرتا ہوں کہ اگر ضرورت پڑی تو مزید فوجی دستے بھی ریلیف آپریشن کےلیے بھیجے جائیں گے۔

    جاپان میٹرولوجیکل ایجنسی نے خدشہ ظاہر کیا ہے کہ طوفان کے باعث 180 کلو میٹر فی گھنٹہ کی رفتار سے چلنے والی ہوائیں مزید لینڈ سلائیڈنگ اور سیلاب کا سبب بن سکتی ہیں۔

    حکام نے خطرات کے پیش نظر علاقوں میں احتیاطی ہدایت جاری کردی ہیں جبکہ طوفان کے ٹکرانے سے قبل ہی شہریوں کی جانب سے اشیائے خوردونوش ذخیرہ کرلی گئی تھیں جس کے سبب مارکیٹوں میں سامان کی قلت پیدا ہوگئی ہے۔

    رپورٹ کے مطابق مشرقی ٹوکیو میں سیلابی صورت حال سے گھروں کو شدید نقصان پہنچا ہے اور ایک گھر کار پر آگرا جس میں موجود شخص ہلاک ہوگیا۔

    میٹرولوجیکل ایجنسی کی جانب سے کہا جارہا ہے کہ یہ طوفان 1985 میں جاپان میں آنے والے طوفان سے بھی زیادہ طاقتور ہوسکتا ہے جس کے نتیجے میں 1200 سے زائد افراد ہلاک یا لاپتا ہوگئے تھے

  • جاپان میں ملازم خواتین نے اونچی ایڑھی کے خلاف بغاوت کردی

    جاپان میں ملازم خواتین نے اونچی ایڑھی کے خلاف بغاوت کردی

    ٹوکیو : جاپان میں دفاتر میں کام کرنے والی خواتین نے اونچی ایڑھی والے جوتے لازمی پہننے کے حکم نامے کے خلاف اعلان بغاوت کر دیا ہے اور وہ خم ٹھونک کر میدان میں آ گئیں۔

    میڈیارپورٹس کے مطابق خواتین ملازمین کے ایک گروپ نے حکومت سے درخواست کی ہے جس میں انہوں نے کمپنیوں کے اونچی ایڑھی والا جوتا پہننے والے حکم کو صنفی امتیاز اور جنسی ہراسگی کے مترادف ٹھہرایا ہے۔

    درخواست اداکارہ اور مصنفہ یومی اشیکاوا نے داخل کروائی جس میں انہوں نے ایسے قوانین متعارف کروانے کا مطالبہ کیا جن کے تحت کمپنیوں کو منع کیا جائے کہ وہ خواتین ملازمین کو ایڑھی والے جوتے پہننے کا پابند نہ کریں۔

    کمپنیوں کے اس امتیازی سلوک کے خلاف یومی اشیکاوا نے ٹویٹر پر کوٹو نامی تحریک بھی شروع کی تھی جس کو خواتین میں بہت پذیرائی حاصل ہوئی۔

    اس تحریک کو اب تک کم از کم 19 ہزار ٹویٹر صارفین کی حمایت حاصل ہو چکی ہے۔ کوٹو جاپانی کے دو الفاظ کٹسو اور کٹسوو کی مختصر شکل ہے۔ کٹسو کے معنی جوتے اور کٹسوو کے تکلیف کے ہیں۔

    اس مہم میں حصہ لینے والی خواتین کا کہنا تھا کہ زیادہ تر کمپنیوں کی جانب سے اونچی ایڑھی پہننے کو لازمی قرار دیا گیا ہے اور خواتین کو مجبوراً اس کو اپنانا پڑتا ہے۔

    خیال رہے کہ 2015 میں کینز فلم فیسٹیول کے موقع پر ایک خاتون کو اونچی ایڑھی والی جوتی نہ پہننے پر ریڈ کارپٹ پر نہیں چلنے دیا گیا تھا جس کے بعد کینز فلم فیسٹیول کے ڈائریکٹر کو معذرت کرنا پڑی تھی۔

    سال 2017 میں کینیڈا کی برٹش کولمبیا اسٹیٹ نے کمپنیوں کو منع کیا تھا کہ وہ خواتین ملازمین کو اونچی ایڑھی کے سینڈل پہننے پر مجبور مت کریں، کولمبیا اسٹیٹ نے اس عمل کو خطرناک اور امتیازی قرار دیا تھا۔