ARYNews.tv | Urdu – Har Lamha Bakhabar

Tag: ٹویٹر

  • اداکار شان کا وزیر اعظم عمران خان کو شاندار خراج تحسین

    اداکار شان کا وزیر اعظم عمران خان کو شاندار خراج تحسین

    کراچی: معروف پاکستانی اداکار شان شاہد کا کہنا ہے کہ وزیر اعظم عمران خان ایسے سپاہی ہیں جو لوگوں کے حقوق کے لیے لڑ رہے ہیں۔

    تفصیلات کے مطابق پاکستانی فلم انڈسٹری کے معروف اداکار شان شاہد نے سماجی رابطے کی ویب سائٹ ٹویٹر پر اپنے ٹویٹ میں وزیر اعظم عمران خان کی تصویر پوسٹ کرتے ہوئے انہیں شاندار الفاظ میں خراج تحسین پیش کیا۔

    شان نے اپنے ٹویٹ میں لکھا کہ کچھ سپاہی صرف اپنی عظمت کے لیے لڑتے ہیں لیکن کچھ سپاہی ایسے بھی ہیں جو لوگوں کے حقوق کے لیے لڑتے ہیں۔

    انہوں نے لکھا کہ دشمنوں کے جھوٹ میں یوں تو بہت طاقت ہوتی ہے لیکن اختتام پر جیت ہمیشہ سچائی کی ہی ہوتی ہے۔ شان نے عمران خان کے لیے مزید لکھا کہ ہماری سچائی ہماری امید۔

    اس سے قبل شان شاہد نے پاکستانی فلم انڈسٹری کی بحالی اور فروغ کے لیے اقدامات پر وزیر اعظم کا شکریہ بھی ادا کیا تھا۔

    انہوں نے کہا تھا کہ ہمیں ہمیشہ یقین تھا کہ یہ دن آئے گا جب ہم فخر، اقدار اور اپنی ثقافتی طاقت کو صحیح راستے پر واپس لانے کے لیے مل کر کام کریں گے۔

  • مختلف ممالک کی پولیس کا ایک دوسرے کو ڈانس کرنے کا چیلنج

    مختلف ممالک کی پولیس کا ایک دوسرے کو ڈانس کرنے کا چیلنج

    برن: سوئٹزر لینڈ پولیس کی مشہور افریقی گانے پر ڈانس کی ویڈیو دنیا بھر میں وائرل ہوگئی جس کے بعد مختلف ممالک کی پولیس نے اس گانے پر رقص کرنا شروع کردیا۔

    سوئٹزر لینڈ پولیس کی یہ ڈانس ویڈیو سوشل میڈیا پر چند روز قبل سامنے آئی جس میں مشہور افریقی گانے پر رقص کیا جارہا ہے۔ ویڈیو میں پولیس اور قانون نافذ کرنے والے مختلف اداروں کے افسران ہم آہنگ ہو کر تھرکتے دکھائی دے رہے ہیں۔

    یہ ویڈیو مختلف ویڈیوز کا مجموعہ ہے جس میں فیلڈ میں کام کرنے والے اہلکار، دفاتر میں بیٹھے افسران اور مانیٹرنگ اسکرینز کے سامنے موجود سیکیورٹی عملہ ڈانس کر رہا ہے۔

    یہ ویڈیو بے حد وائرل ہوئی تاہم اس کی مقبولیت میں اس وقت مزید اضافہ ہوگیا جب آئرلینڈ پولیس کو اسے بطور چیلنج قبول کرنے کا کہا گیا۔

    پرتگال میں مقیم ایک آئرش ریڈیو جوکی (آر جے) فرینکی بیٹس نے ویڈیو ٹویٹ کرتے ہوئے کہا کہ سوئس پولیس نے اس مشکل وقت میں اپنے لوگوں کے لیے کچھ خاص کرنے کا فیصلہ کیا، کیا آئرش پولیس بھی اس چیلنج کو قبول کرے گی؟

    اس ٹویٹ کو متعدد افراد نے ری ٹویٹ کیا یہاں تک کہ سوئس پولیس کے آفیشل ٹویٹر اکاؤنٹ سے بھی کہا گیا کہ وہ اس چیلنج کو پورا کیے جانے کے منتظر ہیں۔

    صورتحال اس وقت مزید دلچسپ ہوگئی جب آئر لینڈ کے ڈپارٹمنٹ آف جسٹس نے بھی اپنے اکاؤنٹ سے ٹویٹ کیا اور آئر لینڈ پولیس کو اکساتے ہوئے اس چیلنج کو پورا کرنے کا کہا۔

    بالآخر آئرش پولیس کے ٹویٹر اکاؤنٹ پر ٹویٹ کیا گیا اور کہا گیا کہ ہمیں چیلنج قبول ہے۔

    تاحال آئرش پولیس نے اپنے ڈانس کی ویڈیو جاری نہیں کی، قیاس ہے کہ پولیس افسران ڈانس اسٹیپس کی تیاریوں میں مصروف ہوں گے، تاہم ٹویٹر پر ہونے والی اس گفتگو سے دنیا بھر کے افراد محفوظ ہوئے۔

    یہی نہیں مختلف ممالک کی پولیس نے بھی اس ڈانس چیلنج کو پورا کرنا شروع کردیا۔

    فرینکی بیٹس نے ہی مختلف ویڈیوز ٹویٹ کیں جن میں سے ایک فرانسیسی پولیس اور ایک جنوبی افریقی شہر جوہانسبرگ کی پولیس کی ہے جس میں پولیس اہلکار اس گانے پر ڈانس کر رہے ہیں۔

    یاد رہے کہ افریقی زبان کا یہ گانا سنہ 2019 میں ریلیز کیا گیا تھا جس کے بعد فروری 2020 میں چند افریقی نوجوانوں نے اس پر ڈانس کیا جس کی ویڈیو بے حد وائرل ہوئی تھی۔

  • اسمبلیوں سے استعفے کی باتیں کرنے والوں کی عقل استعفے دے چکی: فردوس عاشق اعوان

    اسمبلیوں سے استعفے کی باتیں کرنے والوں کی عقل استعفے دے چکی: فردوس عاشق اعوان

    لاہور: وزیر اعلیٰ پنجاب کی معاون خصوصی ڈاکٹر فردوس عاشق اعوان کا کہنا ہے کہ اسمبلیوں سے استعفے کی باتیں کرنے والوں کی عقل استعفے دے چکی ہے، پی ڈی ایم ملک کے گلی کوچوں میں دربدر رسوائی سمیٹ رہی ہے۔

    تفصیلات کے مطابق وزیر اعلیٰ پنجاب سردار عثمان بزدار کی معاون خصوصی ڈاکٹر فردوس عاشق اعوان نے سماجی رابطے کی ویب سائٹ ٹویٹر پر اپنے ٹویٹ میں کہا کہ ہوسِ اقتدار میں اندھی ٹوٹی فروٹی کے رنگوں پر مشتمل ٹوٹی پھوٹی پی ڈی ایم فضل الرحمٰن کی قیادت میں جھوٹ، جھوٹ اور صرف جھوٹ کو آخری سہارا مانتی ہے۔

    معاون خصوصی کا کہنا تھا کہ پی ڈی ایم ملک کے گلی کوچوں میں دربدر رسوائی سمیٹ رہی ہے، دنیا پاکستانی معیشت کی معترف جبکہ فضل الرحمٰن اور اچکزئی افغانستان کے سحر سے نکل نہیں پا رہے۔

    انہوں نے کہا کہ اسمبلیوں سے استعفے کی باتیں کرنے والوں نے استعفے تو نہ دیے البتہ ان کی عقل استعفے دے چکی ہے۔

    معاون خصوصی کا مزید کہنا تھا کہ قومی سلامتی کے اداروں، دوست ممالک اور پاک چین اقتصادی راہداری سے متعلق منفی پروپیگنڈا شکست خوردہ پی ڈی ایم کی مسلسل ناکامیوں اور عوام کی جانب سے ان کو ملے زخموں کا نتیجہ ہے۔

  • برآمدات میں اضافے پر وزیر اعظم عمران خان کی مبارکباد

    برآمدات میں اضافے پر وزیر اعظم عمران خان کی مبارکباد

    اسلام آباد: وزیر اعظم عمران خان کا کہنا ہے کہ پاکستان میں نومبر میں برآمدات میں 8.3 اور دسمبر میں 18.3 فیصد اضافہ ہوا، برآمد کنندگان اور وزارت تجارت کو کامیابی پر مبارکباد پیش کرتا ہوں۔

    تفصیلات کے مطابق وزیر اعظم عمران خان نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ خطے میں برآمدی رجحان کے بارے میں اعداد و شمار موصول ہوئے، نومبر دسمبر میں پاکستان کی نسبت بھارت، بنگلہ دیش کی برآمدات منفی رہیں۔

    وزیر اعظم کا کہنا تھا کہ برآمد کنندگان اور وزارت تجارت کو کامیابی پر مبارکباد پیش کرتا ہوں۔

    انہوں نے کہا کہ پاکستان میں نومبر میں برآمدات میں 8.3 اور دسمبر میں 18.3 فیصد اضافہ ہوا، نومبر 2020 میں بھارت کی برآمدات 9 فیصد سے زیادہ گریں جبکہ بنگلہ دیش دسمبر 2020 میں برآمدات میں 6 فیصد سے زائد کمی ہوئی۔

    یاد رہے کہ دو روز قبل اسٹیٹ بینک کی جاری کردہ رپورٹ کے مطابق مالی سال 2021 میں پاکستان کی معیشت کرونا وائرس سے پہلے کی راہ پر دوبارہ گامزن ہوئی، پاکستان کی برآمدی کارکردگی متعدد دیگر ابھرتی معیشتوں کے مقابلے میں بہتر رہی۔

    رپورٹ کے مطابق برآمدات نے اپنی کرونا سے پہلے ستمبر کی سطح کو چھو لیا، ٹیکسٹائل، سیمنٹ اور دوا سازی کی بلند برآمدی وصولیوں سے مدد ملی۔

    اسٹیٹ بینک کا کہنا تھا کہ ملک کے زرمبادلہ کے ذخائر میں مزید اضافہ ہوا، کرونا سے نمٹنے کی ری فنانس سہولت کی رقم بڑھ کر 8.4 ارب روپے تک پہنچ گئی۔

  • ملک عمران خان کی قیادت میں خوشحالی کی راہ پر آگے بڑھ رہا ہے: شبلی فراز

    ملک عمران خان کی قیادت میں خوشحالی کی راہ پر آگے بڑھ رہا ہے: شبلی فراز

    اسلام آباد: وفاقی وزیر برائے اطلاعات و نشریات شبلی فراز کا کہنا ہے کہ مایوسی پھیلانے والے عناصر مایوس اور نادم رہیں گے، پاکستان عمران خان کی قیادت میں ترقی اور خوشحالی کی راہ پر تیزی سے آگے بڑھ رہا ہے۔

    تفصیلات کے مطابق وفاقی وزیر برائے اطلاعات و نشریات شبلی فراز نے سماجی رابطے کی ویب سائٹ ٹویٹر پر اپنے ٹویٹ میں کہا کہ ملکی ایکسپورٹس میں اضافے نے گزشتہ 10 سال کا ریکارڈ توڑ دیا ہے۔

    شبلی فراز کا کہنا تھا کہ مایوسی پھیلانے والے عناصر مایوس اور نادم رہیں گے، پاکستان عمران خان کی قیادت میں ترقی اور خوشحالی کی راہ پر تیزی سے آگے بڑھ رہا ہے۔

    انہوں نے کہا کہ گزشتہ شب مناظرے میں شاہد خاقان عباسی کی وہی حالت تھی جو ہارڈ ٹاک میں اسحٰق ڈار کی تھی، سچ کے سامنے ان کے ہاتھ پاؤں پھول جاتے ہیں۔ ندیم بابر نے ن لیگی جھوٹ کے پرزے پرزے کردیے۔ ہاری ہوئی ٹیم کے ٹاپ کھلاڑی کی بے بسی اور لاچاری دیدنی تھی۔

    اپنے ٹویٹ میں شبلی فراز کا کہنا تھا کہ ایک جانب بیرونی دشمن انڈین کرانیکلز کے ذریعے پاکستان کے خلاف جھوٹی معلومات پھلانے کا جرم کر رہے ہیں تو دوسری جانب پی ڈی ایم جھوٹ کا سہارا لے کر عوام میں مایوسی پھیلا رہی ہے۔

    انہوں نے مزید کہا کہ دونوں کے جھوٹ کی تجارت رنگے ہاتھوں پکڑی گئی ہے۔

  • کرونا وائرس مریض کا ڈاکٹر کے سامنے دل دہلا دینے والا انکشاف

    کرونا وائرس مریض کا ڈاکٹر کے سامنے دل دہلا دینے والا انکشاف

    واشنگٹن: ایک امریکی ڈاکٹر نے اپنے ایک ٹویٹ میں بتایا کہ کس طرح کرونا وائرس کے مریض پارٹیز کرنے اور لوگوں کو جمع کرنے میں مصروف ہیں، انہوں نے سخت دلگرفتگی سے کہا کہ لوگوں کی ذہنیت بدلنا ناممکن ہے۔

    امریکی ریاست رہوڈ آئی لینڈ سے تعلق رکھنے والی ایک ایمرجنسی فزیشن ڈاکٹر ربیکا کرب نے سماجی رابطے کی ویب سائٹ ٹویٹر پر ٹویٹ کیا کہ ان کے ایک کووڈ پازیٹو مریض نے انہیں بتایا کہ اس نے تھینکس گونگ پر ایک بڑی پارٹی دی تھی جس میں دوستوں اور اہلخانہ سمیت 22 افراد نے شرکت کی۔

    اگلے دن خاندان کے ایک شخص کا کرونا وائرس کا ٹیسٹ پازیٹو آگیا، اس کے بعد ایک ایک کر کے پارٹی میں شریک تمام 22افراد کرونا وائرس میں مبتلا ہوگئے۔

    اس ٹویٹ کے ذریعے ڈاکٹر نے یہ بتانا چاہا کہ اس وبا سے سب سے زیادہ نقصان اٹھانے کے باوجود امریکا میں اب بھی لوگ احساس سے عاری ہیں اور کسی طور سمجھنے کو تیار نہیں۔

    ڈاکٹر نے بعد ازاں یہ ٹویٹ ڈیلیٹ کردیا لیکن تب تک یہ وائرل ہوچکا تھا۔

    بعد ازاں انہوں نے ایک اور ٹویٹ میں لکھا کہ میرا سب سے بڑا خوف یہ ہے کہ ہماری ذہنیت اور سوچ کو کوئی تبدیل نہیں کرسکتا، کرونا وائرس سے متاثر افراد اور ان کے اہلخانہ کی تکلیف اس ملک کے لیے ایک بہت بڑا صدمہ ہے اور اس کے لیے کوئی ویکسین نہیں بن سکے گی۔

    ایک اور ٹویٹ میں انہوں نے اپنے ساتھی میڈیکل ورکرز کے لیے نیک خواہشات کا اظہار بھی کیا۔

    خیال رہے کہ امریکا کرونا وائرس سے دنیا کا سب سے زیادہ متاثر ملک بن چکا ہے اور کووڈ مریضوں اور ہلاکتوں کی تعداد کے حوالے سے سرفہرست ہے۔

    امریکا میں اب تک 1 کروڑ 60 لاکھ سے زائد افراد کرونا وائرس سے متاثر ہوچکے ہیں جبکہ کووڈ سے ہلاک مریضوں کی تعداد لگ بھگ 3 لاکھ ہوچکی ہے۔

    ملک میں فعال کیسز کی تعداد 64 لاکھ سے زائد ہے جبکہ 93 لاکھ سے زائد افراد اس سے صحت یاب ہوچکے ہیں۔

  • کرونا وائرس سے متاثرہ حالات میں استحکام کی جانب اہم قدم

    کرونا وائرس سے متاثرہ حالات میں استحکام کی جانب اہم قدم

    اسلام آباد: وزیر اعظم عمران خان کا کہنا ہے کہ احساس کفالت پالیسی سے خصوصی افراد کے 20 لاکھ خاندان مستفید ہوں گے، یہ کرونا وائرس سے متاثرہ حالات میں پائیداری اور استحکام کی جانب ایک قدم ہے۔

    تفصیلات کے مطابق وزیر اعظم عمران خان نے سماجی رابطے کی ویب سائٹ ٹویٹر پر اپنے ٹویٹ میں کہا کہ احساس کفالت پالیسی سے خصوصی افراد کے 20 لاکھ خاندان مستفید ہوں گے۔

    وزیر اعظم کا کہنا تھا کہ پروگرام کے تحت خصوصی افراد کے ہر خاندان کو ماہانہ 2 ہزار روپے ملیں گے۔ انہوں نے کہا کہ یہ کرونا وائرس سے متاثرہ حالات میں پائیداری اور استحکام کی جانب ایک قدم ہے۔

    یاد رہے کہ وزیر اعظم عمران خان کا احساس پروگرام موجودہ حکومت کا سب سے بڑا پروگرام بن چکا ہے۔

    وفاقی وزیر برائے مواصلات مراد سعید کے مطابق وزیر اعظم عمران خان کے احساس پروگرام کی وجہ سے ملک میں 200 پناہ گاہیں ہیں، عمران خان نے بے گھر افراد کو ریاست کا مہمان بنایا۔

    انہوں نے کہا تھا کہ اسلام آباد کی پناہ گاہوں میں اب تک 11 لاکھ 72 ہزار 654 شہریوں کو سہولت ملی۔

    مراد سعید کا کہنا تھا کہ ریاست نے محنت کشوں کو اپنا مہمان بنایا، محنت کشوں کو عزت سے کھانا بھی دیا جاتا ہے۔ رحم، انصاف اور احساس، فلاحی ریاست کی بنیاد اور عمران خان کا عزم ہے۔

  • کرونا کی وبا کو بہترین دماغوں نے شکست دے دی ہے: فواد چوہدری

    کرونا کی وبا کو بہترین دماغوں نے شکست دے دی ہے: فواد چوہدری

    اسلام آباد: وفاقی وزیر فواد چوہدری کا کہنا ہے کہ سائنس نے ایک بار پھر انسانیت کے لیے کام کر دکھایا، کرونا کی وبا کو بہترین دماغوں نے شکست دے دی ہے۔

    تفصیلات کے مطابق وفاقی وزیر برائے سائنس و ٹیکنالوجی فواد چوہدری نے سماجی رابطے کی ویب سائٹ ٹویٹر پر اپنے ٹویٹ میں کہا کہ سائنس نے ایک بار پھر انسانیت کے لیے کام کر دکھایا۔

    فواد چوہدری کا کہنا تھا کہ کرونا وائرس کی وبا 15 لاکھ سے زائد افراد کی جان لے چکی ہے، کرونا کی وبا کو بہترین دماغوں نے شکست دے دی ہے۔

    انہوں نے مزید کہا کہ برطانیہ کو پہلے ویکسین استعمال کی منظوری دینے پر مبارک باد۔

    اس سے قبل ایک تقریب سے خطاب کرتے ہوئے فواد چوہدری کا کہنا تھا کہ پاکستان کی ترقی کے لیے سائنس اور ٹیکنالوجی پر انحصار کرنا ہوگا، مستقبل بہت پیچیدہ ہے، فائیو جی ایک اور بڑا انقلاب ہوگا۔

    انہوں نے کہا کہ کرونا وائرس کے خلاف ویکسین بنانے والوں کو مبارکباد پیش کرتا ہوں۔

  • ملک میں کرونا وائرس کے جان لیوا وار جاری، جبکہ پی ڈی ایم پر سیاست کا نشہ طاری: فردوس عاشق اعوان

    ملک میں کرونا وائرس کے جان لیوا وار جاری، جبکہ پی ڈی ایم پر سیاست کا نشہ طاری: فردوس عاشق اعوان

    لاہور: وزیر اعلیٰ پنجاب کی معاون خصوصی ڈاکٹر فردوس عاشق اعوان کا کہنا ہے کہ ملک میں ایک طرف کرونا وائرس کے جان لیوا وار جاری ہیں جبکہ دوسری طرف ان حالات میں بھی پی ڈی ایم پر سیاست کا نشہ طاری ہے، خدارا! عوام اور ملک پر رحم کریں۔

    تفصیلات کے مطابق وزیر اعلیٰ پنجاب سردار عثمان بزدار کی معاون خصوصی ڈاکٹر فردوس عاشق اعوان نے سماجی رابطے کی ویب سائٹ ٹویٹر پر اپنے ٹویٹ میں کہا کہ صوبہ پنجاب میں کرونا وائرس کے مجموعی کیسز کی تعداد 1 لاکھ 17 ہزار 160 ہوچکی ہے۔

    معاون خصوصی کا کہنا تھا کہ کرونا وائرس سے 2 ہزار 945 افراد جاں بحق ہوچکے ہیں جبکہ صحت یاب افراد کی تعداد 98 ہزار 191 ہوگئی۔

    انہوں نے کہا کہ پنجاب میں گزشتہ روز 18 ہزار 198 کرونا وائرس ٹیسٹ ہوئے جس میں سے 654 کیسز مثبت رپورٹ ہوئے، گزشتہ روز 22 افراد جاں بحق ہوئے۔

    معاون خصوصی کا کہنا تھا کہ ملک میں ایک طرف کرونا وائرس کے جان لیوا وار جاری ہیں جبکہ دوسری طرف ان حالات میں بھی پی ڈی ایم پر سیاست کا نشہ طاری ہے، خدارا! عوام اور ملک پر رحم کریں۔

    انہوں نے کہا کہ پی ڈی ایم کا ٹولہ کرونا وائرس پھیلانے کا ذمہ دار ہے، مسترد شدہ عناصر کے دلوں میں دکھی انسانیت کے لیے درد نہیں۔ اقتدار کی ہوس میں مبتلا ٹولے کی آنکھوں پر کالی پٹی بندھ چکی ہے۔

    فردوس عاشق اعوان کا کہنا تھا کہ چوروں کا ٹولہ منفی سیاست کے لیے عوام کی زندگی داؤ پر لگا رہا ہے، پی ڈی ایم کی سیاہ کاریاں عوام کے سامنے بے نقاب ہوچکی ہیں، ان عناصر نے اپنے ادوارمیں کرپشن کر کے منہ پر کالک ملی۔

    انہوں نے مزید کہا کہ سیاہ کار آج اپنے کرتوت چھپانے کے لیے ملکی ترقی پر سیاہی ملنا چاہتے ہیں، 22 کروڑ پاکستانی لٹیروں کے جھانسے میں نہیں آئیں گے، اپوزیشن الٹی بھی ہو جائے تب بھی سیدھی طرح لوٹ مار کا حساب دینا ہوگا۔

  • سعودی محکمہ ٹریفک کی ڈرائیورز کو اہم ہدایت

    سعودی محکمہ ٹریفک کی ڈرائیورز کو اہم ہدایت

    ریاض: سعودی محکمہ ٹریفک نے ڈرائیورز کو ہدایت کرتے ہوئے کہا ہے کہ گاڑی کے عقبی حصے میں سامان کے لیے جنگلہ نصب کروانا گاڑی اور جان دونوں کے لیے خطرناک ہو سکتا ہے۔

    سعودی ویب سائٹ کے مطابق سعودی محکمہ ٹریفک نے گاڑی کے عقبی حصے میں سامان کے لیے جنگلہ نصب کروانے کے خلاف خبردار کرتے ہوئے کہا ہے کہ یہ سامان اور جان دونوں کے لیے خطرے کا باعث ہے۔

    محکمہ ٹریفک نے اپنے ٹویٹر اکاؤنٹ پر ایک ویڈیو اپ لوڈ کی ہے جس میں بتایا گیا ہے کہ گاڑی کے عقبی حصے میں نصب کیے جانے والے جنگلے غیر محفوظ ہوتے ہیں اور ان سے گاڑی کا توازن بگڑتا ہے۔

    محکمہ ٹریفک کی جانب سے کہا گیا کہ گاڑی پر لادے جانے والا سامان بھی انتہائی حد سے زیادہ ہوتا ہے۔

    محکمہ ٹریفک نے ویڈیو میں مزید کہا کہ مملکت میں گاڑیوں کے مالکان عقبے حصے میں جس قسم کے جنگلے نصب کرتے ہیں وہ کار ساز کمپنیوں کے تیار کردہ نہیں ہوتے، عام طور پر جس جگہ لگائے جاتے ہیں وہ گاڑی کے سائلنسر کے قریب ہوتا ہے جس سے آگ لگنے کا خطرہ بڑھ جاتا ہے۔